Share

Chapter 1

ILANG katok sa pinto ang nagpagising kay Jaqui. Napakamot siya sa ulo. Wala pa yatang limang oras siyang nakakatulog. Napuyat siya kaka-edit ng content niya para sa isang social media platform. Halos isang taon na niyang ginagawa ang pagba-vlog at umaasa siya na kahit papaano, kagaya ng ibang sikat na vlogger, ay kikita din siya sa ginagawa niya.

“Bakit?” tanong niya habang inaantok pa.

“Jaqui, buksan mo `tong pinto,” dinig niyang utos ni Tita Eden, ang nagiisang kapatid ng mommy niya.

Inaantok na bumangon si Jaqui saka binuksan ang pintuan. “Bakit po? Ang aga aga mainit ulo ninyo,” aniya saka pabagsak na bumalik sa higaaan.

“Saan ka ba galing last week?” tanong ng tiyahin niya.

“Sa farm po,” mahinang sagot niya.

“Sa farm? Ikaw lang mag-isa?”

Napakamot siya ng ulo. “Opo. Inaantok pa po `ko, Tita,” angal niya.

“Kung ikaw lang mag-isa, bakit may kasama kang lalaki sa video?” tanong ni Clara, ang panganay na anak ng Tita Eden niya.

“Anong video?”

“Ito oh, trending ka, girl.”

Napabangon si Jaqui sa narinig. “Ano bang sinasabi mo, Clara?”

Inabot nito ang cellphone sa kaniya. Humikab muna si Jaqui bago pinindot ang play button. Nang mag-play iyon, tila nawala ang antok sa sistema niya. Isang babae at lalaki ang magkaakbay habang naglalakad sa isang tulay. Pamilyar kay Jaqui ang lugar na iyon lalo na ang papalubog na araw. Nanlaki ang mga mata niya habang pinapanood ang video clip. Pakiramdam niya ay hindi siya makahinga nang mapagtantong siya ang babaeng nasa video. Kitang kita doon ang mukha niya at ng lalaki lalo pa nang tumama ang liwanag mula sa papalubog na araw sa mukha nilang dalawa. Kung sino man ang kumuha ng kaganapang iyon, paniguradong naghanda ito. Mukhang hindi lang basta simpleng cellphone ang ginamit nito, mukhang gumamit pa ito ng advanced na camera.  Pero ang pinagtataka ni Jaqui, bakit mukhang may relasyon sila ng lalaking tinulungan niya sa tulay? Bakit sa video, mukha silang nagde-date at pianapanood ang sunset habang naglalakad? Hindi naman ganoon ang nangyari sa pagkakatanda niya.

“Teka teka. Paano ka nagkaro’n nito?” naguguluhang tanong niya kay Clara.

“Girl, may nag-upload niyan kagabi sa Youtube. Ang daming views. Hashtag-Amigo-Imperial-Girlfriend. Trending kayo kahit sa Twitter. Sikat ka na!” excited na sagot nito.

“Uy, tumigil ka nga,” saway ng nanay nito.

“Ha? Amigo Imperial? Sino iyon?”

Hindi makapaniwalang tiningnan siya ng mag-ina.

“Kasama mo sa farm, hindi mo kakilala? Ayan kaakbayan mo pa,” sermon ng tiyahin niya.

Napailing si Jaqui. “Hindi. Hindi. Hindi totoo `to. Ano kasi, tinulungan ko siya kaya nakaakbay siya sa’kin. Nahihirapan kasi siyang makalakad no’ng time na `yan. Tapos iyon na, ni hindi ko nga alam ang pangalan niya,” depensa ni Jaqui.

“Opo nga,” giit niya nang tingnan siya ng mag-ina na animo’y hindi totoo ang sinasabi nya. “Saka, s-sino nga ulit iyon? Amigo? Sino ba iyon? Artista ba iyon?”

Kinuha ni Clara ang cellphone nito at may tinipa doon. “Hindi siya artista, konsehal siya sa Poblacion. At siya lang naman ang nagiisang anak ni Amanda Imperial at Senator Abuel.”

Napalunok si Jaqui. “H-ha?”

“Nag-file siya ng candidacy para sa pagka-mayor ng Poblacion. Bigla siyang sumikat. Paano ba naman, ang gwapo, ang talino, matangkad, lakas ng appeal. At ang alam kasi ng lahat, single siya. Good catch! Kaya siya nagte-trending. Hindi ka ba nanonood ng news?”

“H-hindi.” Pulos vlog ang madalas na pinapanood ni Jaqui. Sa panahon ngayon, wala namang magandang malalaman sa balita. Hindi na lang siya manonood kaysa naman puro pulitikong nangungurakot, kabilaang patayan at tungkol sa drugs ang mapanood niya.

“Ayan na nga ba ang sinasabi ko. Tawagan mo ang Mama mo. Gusto ka niyang makausap tungkol diyan sa scandal mo. Saka `wag ka munang bumaba. Iyong mga tsismosang kapit bahay, kanina ka pa hinahanap,” ani Tita Eden saka lumabas na ng silid niya.

“Maka-scandal naman `to si Mama,” sabi ni Clara. “Sabi naman ni Jaqui, hindi totoo iyong nasa video `di ba?”

Tumango siya. “T-teka. Ano bang gagawin ko? May dapat ba kong gawin? Kailangan ko ba siyang tawagan?”

“Ha? Alam mo ang number niya? Pa-send naman!”

Inirapan niya si Clara. Hindi niya alam kung pinsan niya ba talaga ito o ano. Kinuha niya ang cellphone niya at nagulat sa dami ng mga text messages at missed calls na na natanggap niya. Galing iyon sa mga kaibigan niya na nagtatanong sa relasyon niya kay Amigo Imperial. May ilang missed call din siyang natanggap mula sa kaniyang ina pero hindi niya iyon pinansin. Nang buksan niya ang laptop, nanlaki ulit ang mga mata niya nang makita ang biglang pagtaas ng mga subscriber at views niya sa Youtube. Sa isang taon na gumagawa siya ng content, ngayon lang siya nagkaroon ng mahigit 10,000 views sa isang content. Saglit niyang pinasadahan ang comments ng mga netizens sa vlog niya.

Siya pala ang girlfriend ni Amigo Imperial. Swerte naman niya!

She looks hot and smart. Baka kaya siya nagustuhan.

Great content. Bakit ba ngayon ko lang ito napanood?

Pati sa iba niyang Social Media accounts, dumagsa ang mga friend requests at comments sa page niya. Pakiramdam ni Jaqui ay nananaginip lang siya. Isang napakagandang panaginip.

“Wow. Peymus ka, Girl?” asar ni Clara sa kaniya.

“Totoo ba `to?” hindi makapaniwalang tanong ni Jaqui sa pinsan niya. “Sampalin mo nga `ko.”

Dali dali siyang sinampal ni Clara.

“Aw,” aniya saka sinapo ang pisngi.

Shit. Totoo nga.

Tiningnan niya si Clara saka napangiti. Para silang mga batang naghiyawan sa tuwa. Hindi pa nakuntento, umakyat pa sila sa kama at nagtatatalon doon.

“OMG! Hindi ako makapaniwala!”

“Sikat ka na, girl! Yayaman ka na! Instant celebrity!”

“Kikita na `ko sa Youtube! Finally! Yayaman na `ko!,” masayang sabi niya habang tumatalon sa kama.

“Shocks! Naisip ko, sa susunod na video mo, i-guest mo `ko. Gawin natin iyong ginagawa ng ibang vloggers like mukbang with questions ganun.”

Natawa siya kay Clara. “Okay, sige!”

Natigil lang sila sa paglundag nang tumunog ang cellphone niya. Nang sagutin iyon ni Jaqui, boses ng babae ang bumungad sa kaniya.

“Hi! May I speak with Ms. Jacintha Quijano? I’m Karen, I’m calling from the office of Councilor Amigo Imperial.”

Napalunok ng mariin si Jaqui. Inimbitahan si Jaqui ng babaeng nagpakilalang Karen. Staff daw ito ni Amigo Imperial. Gusto daw siyang makita ng binata para makausap. Gusto sanang h-um-indi ni Jaqui pero naka-oo na siya. Pakiramdam niya’y wala naman siyang magagawa. Hindi niya alam kung bakit pero hindi maganda ang pakiramdam niya sa mangyayari kapag nag-usap na sila ng binata.

Kaugnay na kabanata

Pinakabagong kabanata

DMCA.com Protection Status