Chapter 6

Itinago ko ang pakiramdam na iyon ngunit nabigla ako sa pagtabig sa akin ni Pete sabay bulong:

"Huwag ka magpahalata...naramdaman mo rin, ano?," napatingin na lamang ako sa kanya. "Huwag mo damdamin at baka tumira 'yan sa'yo....hindi ko lang naramdaman, nakita ko pa...,"dugtong niya.

Dalawa pang tapik sa balikat ang iniwan sa akin ni Pete bago siya ulit lumapit kay Eloisa.

"Bhy, tara na...akyat daw tayo sa taas ng krus...," pagtawag muli sa akin ni Jing-Jing.

Tumalima ako sa bilin ni Pete at sa imbitasyon sa akin ni Jing-Jing. Pinilit kong limutan ang lungkot na pumaloob sa akin.

Ang atraksyong Krus ay may taas na 302 feet. Ito ay gawa sa pinagsamang bakal at konkreto. Sa pagkakataong iyon ay naabot lamang namin ang ika-36 na palapag nito kung saan maaari naming masilip sa mga bintana ng pahalang na bahagi ng krus ang kabuuang likas yaman ng Bataan at sa kung hanggang saan pa man ang kayang abutin ng aming mga mata. Nakakalula ngunit nakakabilib ang karanasang ito.

Sinulit namin ang oras roon na lingunin ang iba't ibang anggulo mula sa itaas nang sabihan na kami ng mga katiwala roon na dapat na kami bumaba gamit muli ang asensor.

Paglapag namin sa parke, ramdam na namin ang labis na lamig. Makulimlim na at may pagbabadya ng pag-ulan kaya pinagmadali kami nila Tatay Salde na makababa ng bundok at makaalis sa lugar na iyon. Kumaripas man kami ay hindi namin matatalo ang pagpatak ng mga munting butil ng ulan. Wala pa naman kaming payong at nasa kalagitnaan na kami ng pagbaba na walang anumang masisilungan. Wala kaming laban kundi ang tanggaping mabasa hanggang sa makaabot sa van.

Pagdating sa sasakyan, tanggal na ang mga saplot ng upuan. Inihanda na ito marahil ni Kuya Bobby upang makaupo pa rin kami doon kahit basa. Nang makasakay na ang lahat ay humarurot na kami sa byahe na patay ang aircon upang di rin kami ginawin. Sari-saring hingal na tawanan at kulitan ang mauulinigan sa loob ng van habang nasa byahe kami pabalik ng bahay nila Marissa. Lahat ng magkakasintahan ay magkakayakap upang kontrahin ang lamig. Gumaya rin si Chyna at Ira, c Kat at Carey, hanggang sa magbiro si Emong, Chadie at Max na magyapusan silang tatlo dahil sa inggit. Bukod tangi si Brix na solo sa kanyang kinauupuan kaya biniro siya ni Chadie:

"Papa Brix, dito ka na sa akin...pag-iinitin kita...,"

Humagalpak sa tawanan ang lahat sa pabaklang biro ni Chadie maliban kay Kuya Bobby na sinikap makapagmaniubra ng maayos kahit lumakas na ang buhos ng ulan at lumalabo na ang daan dahil sa hamog.

Napansin ni Ian ang tila pakunot noong pagtingin ng aming driver sa nilalandas. Saka niya lamang napuna ang kapal ng hamog na aming sinusuong. Hindi na niya masipat pa ang sinusundang si Mang Salde at Mang Hamin na nakamotorsiklo.

Sa kabutihang palad, sakay namin at katabi ni Ian si Marissa sa front seat at kabisado niya naman ang daan pauwi kaya minarapat ni Kuya Bobby na magdahan-dahan rin sa pagmamaniubra upang makaiwas sa aksidente.

Makailang humps ang tila umambang sumira sa ilalim ng sasakyan dahil sa hindi ito agad namamataan ng driver. Sa awa ng Diyos, ginabi man kami pabalik ay nakarating kami ng ligtas kina Marissa.

Hindi nagpatumpik-tumpik si Marissa pagdatal namin sa kanila. Kumuha siya agad ng ilang tuwalya at kumot naman para sa iba upang makapagpunas at hindi lamigin.

"Yung iba pwede na maligo agad para mahubad nyo na 'yang basa n'yong suot...," atas ni Marissa at turo sa dalawang handang palikuran.

Naunang naligo na si Emong sa palikuran na sa bandang labas ng bahay malapit sa aming kinainan nang tanghali habang sabay-sabay naman naligo ang mga babae sa cr na nasa loob ng kanilang kwarto.

Hindi na nagkahiyaan pa ang mga babae na magkakitaang hubad sa isa't isa habang pinilit nilang magkasya sa loob ng palikuran na may shower at naka-tiles naman. Kanya-kanya silang hiluran sa likod at buhusan ng tubig upang agad na matapos at mapigil ang panlalamig.

Nang makuntento at maramdamang malinis na sila, dumiretso silang lumabas sa cr dahil tiwalang nakakandado segurado naman ang pintuan, kaya't di sila nagtapis pa kundi nagpunas na lamang ng tuwalya. Lingid sa kanilang kaalaman ay may lihim na nagmamatyag sa kung saan sa kanila at naglalaway sa kanilang mga hubad na katawan.

Makalipas ang isang oras, abala pa rin sa pagluluto ng hapunan si Marissa habang ako at si Ian na lamang ang hindi nakakaligo sa mga lalake dahil sa pinagpawisan na kami sa pagtulong kay Marissa sa paghahanda ng panggatong at sahog ng ulam. Pinili niyang magluto ng sinigang na bangus.

Paglabas ng mga babae sa kwarto ay tumulong na rin sila sa paghahain at sabay sabay muli kumain kasama si Kuya Bobby makalipas pa ang kalahating oras.

Tulad sa tanghalian, lumitaw ang pagod ng lahat nang makaramdam ng pagkabusog subalit pinili nila Ian at Marissa na maligo ng sabay sa cr sa kwarto ng mga babae habang kumakain pa ang lahat.

At ang natural na bulungan namin?

"Alam na!"

Matapos magtulong na magligpit ng hapag kainan ang lahat at itabi ang kakainin nila Ian at Marissa, nagkanya-kanya na ng pwesto ang ilan.

Nagpaalam si Kuya Bobby na doon raw siya sa van matutulog upang mabantayan ito at nagvolunteer naman si Brix na samahan siya roon.

Tumungo naman agad ng kwarto ang mga babae upang makapagpahinga na rin habang ang mga lalaki naman ay sa silid na unang tinulugan ni Kuya Bobby.

Naiwan ako sa harap ng hapag habang binabantayan ang pagkaing itinabi para kay Ian at Marissa. Nang dumating na ang dalawa ay saka ko napagdesisyunang maligo na at iwan silang kumakain.