Share

Chapter 3

"ICHA-CHAT mo 'yung crush ko o hindi ko ibibigay sa'yo ang nag-iisang kopya ng paborito mong libro?"

Naipikit ko ng saglit ang aking mga mata kasabay ng matunog na pagbuntong-hininga. Animo'y napakalaking desisyon ng bagay na iyon para pag-isipan ko pa ng matagal. Dahan-dahan kong ibinuka ang bibig matapos ang halos isang minutong pag-iisip. "Ayoko."

Lumaylay ang mga balikat ni Sheena matapos ko iyong sabihin. "H-ha?"

"Hakdog."

"P-pero... paborito mong libro 'yun. Ano bang meron kay Angelo at ayaw mo siyang i-chat?" Inilagay ni Sheena ang mga kamay sa tigkabilang gilid. Pinamewangan niya ako habang nakataas ang isang kilay.

"Tss. Naririnig mo ba ang sinasabi mo? Gagamitin mo pa 'yung writer account ko para sa kalandian mo," pamamrangka ko sa kaniya.

"Aray naman, foul 'yun ah. Pero dahil may kailangan ako sa'yo hindi ako magagalit." Tumawa ito na parang luka-luka. "Bilis na kasi, kung gusto mo gumawa ka na ng assignment mo at ako na lamang ang magcha-chat sa kaniya."

"Ayoko, huwag kang makulit. Kaya maraming hindi naniniwalang mas matanda ka sa akin eh. Napakakulit mo kasi."

Ngumuso si Sheena habang pinagdidikit ang dalawang hintuturo. Nagpapa-cute pa ang huta.

Magsasalita pa sana ako pero natigilan ako nang may tumunog sa bulsa ko. Agad kong binunot doon ang cellphone na panay ang ring dahil may tumatawag.

"Hello, 'nay!" bati ko sa phone. Lumabas muna ako ng kwarto ko at pumunta sa terrace para maging pribado ang pag-uusap namin ng nanay ko.

"Hello, anak! Kumusta ang bagong school, nag-enjoy ka naman ba?"

Ngumisi ako. "Sobrang nakaka-enjoy 'nay. Pwede nang gawing circus." Hindi ko napigilang maging sarkastiko.

"Binully ka na naman ba?" Bakas sa boses nito ang pag-aalala. "Tinuruan kitang lumaban pero huwag sanang aabot sa puntong makikipag-basag ulo ka, maliwanag?"

Tumango ako kahit hindi kita ng kausap. "Opo, 'nay. Kayo po diyan, kumusta?"

"Heto, kakatapos lamang magpatulog ng mga alaga. Pumuslit nga lang ako ngayon dahil tulog na sila pero kapag nagising ay balik trabaho na naman ako."

"Dapat natulog na kayo. Alam niyo namang limitado lang ang oras niyo ng pagtulog diyan eh." Napahilot ako sa sintido.

"Oo anak, kinamusta lang kita dahil baka nanibago ka masiyado sa school mo. Pasensya ka na at kailangan mo pang mag-transfer, ah. Hindi na kasi kaya ni nanay ang tuition doon sa private mong school."

"Okay lang 'nay. Pasensya na rin at hindi ako matalino. Edi sana ay nakakuha ako ng scholarship sa school ko dati."

"Huwag mo na problemahin iyon anak. Ang mahalaga naman ay nakakapag-aral ka, hindi ba?"

"Opo naman 'nay. Naiintindihan ko po. Hindi naman ako nagrereklamo, okay lang kahit saan ako mag-aral."

"Lagi kang magpapakabait sa mga Tita mo. Suklian mo ang kabaitan niya sa ating mag-ina. Lagi mong tatandaan na sila ang legal na pamilya ng tatay mo. Kung tutuusin ay naging kabit ako ng tatay mo pero ayan at nakatira ka sa kanila ngayon."

Bumuntong-hininga ako. Heto na naman tayo sa usaping sensitibo kami pareho. "Nanay naman, hindi po kayo naging kabit ng tatay namin ni Sheena. Aksidente niya ho kayong nabuntis at wala kayong relasyon. Hindi pagiging kabit iyon, sadyang nagkamali lamang kayo."

"P-pero huwag mong iisiping pagkakamali ka anak, ah. Mahal na mahal kita anak, lagi mo iyang tatandaan. Kung nabubuhay lang ang tatay mo ay paniguradong mamahalin ka rin niya dahil mabuti kang anak." Dinig ko ang pagsinghot ng nasa kabilang linya.

Hindi ko tuloy maiwasang pangiliran ng luha. "Nanay naman eh, walang iyakan. Sige ka, lalong papangit ang anak mo."

Natawa ang kausap ko sa telepono pero dinig ko pa rin ang pagsinghot nito. "Basta lagi kang magpapakabait diyan ah. Hangga't maaari ay gawin mo ang gusto ni Sheena. Huwag kang maging madamot sa kaniya dahil higit pa ang ibinigay nila ni Divine sa atin."

"Opo 'nay. Lagi kong tatanawin ang utang na loob natin sa kanila."

"Sige 'nak, ingat ka riyan. Tawag ulit ako kapag hindi na busy. I love you."

"I love you rin po 'nay. Ingat din po kayo diyan at huwag masiyado magpaka-pagod." Binaba ko ang linya matapos iyon.

Dahil wala na naman akong gagawin dito sa terrace ay minabuti kong bumalik na sa kwarto. Bahagya pa akong natigilan nang makita si Sheena sa harap ng PC ko. Hahagik-hagikhik pa ito habang nakatingin sa monitor.

"Anong ginagawa mo riyan? Huwag mong sabihing—" Hindi ko na naituloy pa dahil alam ko na ang sagot sa katanungan ko.

"Bakit ka nagagalit? Nagpaalam naman ako sa'yong ako na ang makikipag-chat kay Angelo gamit ang writer account mo, ah."

Sinamaan ko siya ng tingin. "Wala akong natatandaang pumayag ako, Sheena."

"Basta lagi kang magpapakabait diyan ah. Hangga't maaari ay gawin mo ang gusto ni Sheena. Huwag kang maging madamot sa kaniya dahil higit pa ang ibinigay nila ni Divine sa atin."

Pumasok sa isip ko ang sinabing iyon ng nanay ko. Kalma, self. May utang na loob tayo. Wala akong nagawa kundi bumuntong-hininga ng ilang beses.

"Napaka-cute mo naman, ano?" Peke ko siyang nginitian saka ko pinisil ang pisngi niya. "Sa sobrang cute mo gustong gusto kitang tirisin!" Hindi ko na napigilang manggigil.

"O-ouch! Ano ba, my precious skin!" Pinalo niya ang kamay kong nakapisil sa mukha niya.

Inirapan ko siya saka ko tiningnan ang convo nilang dalawa gamit ang cameyofan F******k account ko. Mula dulo ay tiningnan ko iyon. Grabe, ang haba na agad ng napag-usapan nila! Ilang oras ba akong nakipag-usap sa nanay ko?

Wala namang kakaiba sa usapan nila bukod sa kalandian ng kapatid ko.

Angelo Francisco: Salamat naman at nag-reply ka, crush! Akala ko pa naman ay isi-seen mo na lang ako habambuhay.

Napangisi ako. Ganoon naman talaga ang plano ko kung hindi lang dito sa kapatid kong pinaglihi ata sa higad.

Cameyofan WP: Bakit ko naman gagawin 'yun eh mukha namang masarap ka.

Pinandilatan ko si Sheena dahil sa nabasa ko. Nahihibang na ba siya at ganito siya makipag-usap sa lalaking kakikilala pa lamang niya?

Cameyofan WP: *Masarap kausap. Enebe 'yan, hihi.

"Anong kalandian 'to, Sheena? Sinisira mo ang image ko sa lalaking ito." Hindi ko pa rin tinitigilan ang pandidilat sa kaniya. Kung wala lamang kaming utang na loob sa pamilya ni Sheena ay kanina ko pa siguro nakurot ang singit nito.

Angelo Francisco: HAHAHAHA may sense of humor ka rin pala, crush. Oo, masarap ako.

Cameyofan WP: Hala same tayo! Masarap din ako.

Angelo Francisco: *Masarap magluto.

Cameyofan WP: Diba sabi ko sa'yo same tayo. Magaling din ako magluto! Pwede na mag-asawa, asawa na lang ang kulang hihi.

Angelo Francisco: HAHAHAHA baka kumalat ang magandang lahi.

Cameyofan WP: Maganda talaga ang lahi ko. Ikaw rin mukhang maganda ang lahi. Ano, collab tayo?

Mas lalo kong sinamaan ng tingin si Sheena na kilig na kilig sa gilid. Pinapalo pa nito ang braso ko na siyang ikinainis ko.

Angelo Francisco: luh, si crush pa-fall. Btw, face reveal ka nga para malaman ko kung talagang maganda ang lahi mo.

Ini-scroll ko pa ang convo at nagulat ako sa sinend na picture ni Sheena.

"Basta lagi kang magpapakabait diyan ah. Hangga't maaari ay gawin mo ang gusto ni Sheena. Huwag kang maging madamot sa kaniya dahil higit pa ang ibinigay nila ni Divine sa atin."

Nang bumalik sa isip ko ang sinabing iyon ng nanay ko ay napabuntong-hininga na lamang ako para pigilan ang inis. "Bakit ka nag-send ng picture sa kaniya?" nagpipigil ng gigil kong tanong.

"Bakit ka nagagalit eh picture ko naman ang sinend ko. Buti sana kung maganda ang lahi mo edi sana ay picture mo ang sinend ko sa kaniya!" Tumawa ito na akala mo ay nakikipagbiruan ako.

"Hindi mo ako naiintindihan, Sheena. Iisipin ng lalaking iyan na ikaw si cameyofan." Napahilot ako sa sintido.

"Edi mabuti! Hindi na ako mahihirapan na maka-close siya tutal naman ay crush niya si cameyofan."

Napaawang ang bibig ko. "Lolokohin mo 'yung tao?"

"Kung para sa pag-ibig, why not?" Nagkibit-balikat siya saka tumingin sa monitor. Hindi pa rin maalis ang malawak na pagkakangiti nito na akala mo ay wala siyang maling bagay na ginawa.

Dismayado ko siyang tiningnan. Hindi ako makapaniwalang gan'to ang pag-iisip nitong si Sheena. "Sabihin mong hindi ikaw si cameyofan. Huwag kang manloko ng tao, Sheena. Alam mong hindi maganda iyon."

"Ha? Maganda ako? Salamat," tatawa-tawa nitong sabi.

"Basta lagi kang magpapakabait diyan ah. Hangga't maaari ay gawin mo ang gusto ni Sheena. Huwag kang maging madamot sa kaniya dahil higit pa ang ibinigay nila ni Divine sa atin."

Oo na, hahabaan ko na ang pasensya. Kung wala lamang akong utang na loob ay kanina ko pa ni-realtalk itong kapatid ko.

"OMG! Basahin mo 'yung reply niya!" Kinikilig akong pinalo ni Sheena. Wala naman akong nagawa kundi tingnan ang monitor.

Angelo Francisco: Pwede vc tayo? Gusto lang kita makita hehe.

Comments (1)
goodnovel comment avatar
alanasyifa11
so far,i've been enjoying the story and all! gotta be patient and wait for next chapter~ btw,is there any way i can keep up with your work? do you have social media?
VIEW ALL COMMENTS

Related chapters

Latest chapter

DMCA.com Protection Status