06 Toyang

"TOYANG, GISING!"

Naalimpungatan ako sa malakas at walang humpay na yugyog sa akin ni mama.

"May baha! Diyos ko, bumangon ka na!" paghihisterikal ni mama habang natatarantang ipinapasok sa loob ng orocan drum ang ilang mga damit namin.

Tumayo ako sa kama ko at iniligpit iyon. May tagas na naman ba 'yong hose namin kaya bumaha na naman? Kahit ba naman dito sa apartment na bago may gano'n din?

"Donna! Donna! Nasaan na ang mga bata?!" sigaw ni papa sa labas ng kwarto namin bago pumasok at tinulungan si mama sa pagliligpit.

"Nasa kabila sina Don at Lucho. Kukunin ko muna sila," ani mama.

"Hindi ko na makuha iyong multicab. Patay na 'yong makina. Naabot na no'ng baha," si Papa.

Nagmamadaling lumabas si mama ng kwarto. Kumunot ang noo ko. Hindi ko sila makuha. Para silang mga aligaga na natatakot na hindi ko maintindihan...