Chapter 16

Wala na akong nagawa nang hilahin niya ako papasok sa loob ng museum. Bawat madaanan namin ay napapahinto para lang tingnan kaming dalawa. Panay naman ang bati niya sa mga taong naroon. Pero ang nakapagtataka ay hindi sa kaniya nakamasid ang mga tao kundi sa akin. Marahil ay curious ang mga ito kung sino ako at kung bakit hawak-hawak ni Sandro ang kamay ko.

Hindi na ako magtataka kung bukas ay laman na naman kami ng social media. Paniguradong mas titindi ang sabi-sabi tungkol sa aming dalawa. Sa totoo lang, maraming ibang magagandang babae na sigurado akong nakilala niya na sa iba’t ibang lugar. Yung ex-girlfriend niya, maganda rin. Ewan ko ba sa taong ito kung bakit ako ang ginugulo niya kung kailan napakatahimik ng buhay ko.

          Nang wala nang gaanong tao sa paligid ay huminto ako sa paglalakad at pilit na binawi ang kamay ko sa kaniya.