Chapter 39 

Sa tingin ni Jornaliza, hindi na niya kailangan pang sabihin kay Luigi ang pagtawag ni Yael, nai-blocked na naman niya ito. Saka talagang wala na siyang planong magpakita sa dating manliligaw. Ang mahalaga lang sa kanya, nalaman na nito ang kanyang sitwasyon at nakahingi na siya rito ng tawad. 

Hindi lang niya napigilan ang mapalunok dahil sigurado siyang hindi naman siya nagawang patawarin ni Yael. Paulit-ulit pa nga itong nagbulalas ng mura na kahit hindi direktang tinutukoy na para sa kanya, siguradong siya ang minumura. 

Kahit na alam niyang dapat siyang magalit, napabuntunghininga na lamang siya at inintindi ito. Nang sabihin nitong magkita sila kahit sa huling pagkakataon, pinili pa rin niyang tumanggi. Walang epekto sa kanya kung binabaan man nito ang tono ng pagsasalita. May parte ng kanyang utak ang nagsasabi na hindi niya ito dapat pagkatiwalaan.