Kabanata 3

Naiwang nakahandusay sa sahig ang grupo ng mga kumidnap kay Alyssa. Magmamadali siyang lumabas sa silid na iyon. Paglabas, nagulat siya. Madilim ang paligid at nasa gitna pala siya ng dagat. Silid pala ng yate ang pinagkulungan sa kanya. Agad siyang naghanap ng puwede niyang sakyan para makaalis sa lugar na iyon. At nakakita siya ng isang rubber boat.

Ngunit, hindi pa man niya ito nakakalag sa pagkakatali ay biglang may narinig siyang putok ng baril. Nakita niya ang isa sa mga kidnapper na papalapit, may dala itong baril. Tumakbo siya sa gawing dulo ng yate. Nang makitang wala siyang puwedeng pagtaguan doon, naisip niyang tumalon na lang sa dagat. Wala siyang ibang choice. Marunong naman siyang lumangoy.

Nang makita ng mga kidnapper ang ginawa ni Alyssa. Pinagbabaril siya nito. Sinubukan niyang ilagan ang mga bala habang nasa ilalim ng tubig. Ngunit, may isang dumaplis sa kanyang braso. Nakaramdam siya ng hapdi pero itinuloy pa rin niya ang paglangoy. 

Pagkalipas ng trenta minutong paglangoy, nakaramdam nang pamamanhid ng braso si Alyssa. Partikular sa brasong nadaplisan ng bala. Huminto siya saglit at tumingin sa paligid. Kadiliman, iyon lang ang kanyang nakikita.

"Paano na?" Pinagpatuloy pa rin ni Alyssa ang paglangoy. Mayamaya pa, tuluyan ng namanhid ang kanyang mga braso. Napapapikit na rin ang kanyang mga mata. Giniginaw na siya. Ilang saglit pa, naramdaman ni Alyssa na para siyang papel sa gaan na lumulutang sa tubig. Hudyat na unti-unti na siyang nakakaramdam ng pagkapagod. Hanggang sa nagdilim na ang kanyang paniningin.

~Sa Verdes Island~

Death anniversary ng mga magulang ni Mark kahapon, kaya siya nasa isla. Nag-alay siya ng mga bulaklak at panalangin para sa kanyang namayapang mga magulang. Taon-taon ganito ang kanyang ginagawa. Pagkatapos ay tumuloy na siya papunta sa kanyang cabin. 

Maliit at simple lang ang cabin, pero kumpleto ito sa kagamitan. Mayroon itong maliit na living room, kitchen, dalawang bedroom at attic na siya niyang nagsisilbing office. Ipinatayo niya ito para sa tuwing pupunta siya sa isla ay maging kumportable naman siya. Isang linggo kasi siya kung mamalagi roon. 

Ang Verdes Island ay nanatili pa ring virgin island. Kaya ito ang naging hidden sanctuary ni Mark sa tuwing nakakaramdam siya ng stress at pagod sa kanyang trabaho. 

Kapag nasa isla si Mark, nakagawian na niyang magjogging sa dalampasigan tuwing umaga.  Isang oras na niya itong ginagawa ng makaramdam siya ng uhaw. Tumigil siya saglit.  Naupo sa isang malaking bato sa dalampasigan at uminom ng tubig. Mayamaya pa ay nakita niyang papasikat na ang araw.  

Ang sunrise sa isla ay nakakabighani. Kaya gustong gusto ni Mark na ito ay laging makita tuwing pupunta siya roon. Naghahatid kasi ito ng calming effect sa kanya. Nakangiti siya habang pinagmamasdan ang pagsikat ng araw. Ngunit habang pinagmamasdan ito, nakuha ang atensyon niya ng isang bagay na palutang lutang sa dalampasigan. Nacurious siya kaya nilapitan niya ito. Hindi pala ito bagay kundi isang tao. Isang babae, ayon sa suot nitong damit.

Mabilis niya itong binuhat mula sa tubig. Inihiga ng maayos sa buhanginan at agad na nagCPR. Mayamaya pa narinig niya itong umubo. Iniluwa nito ang mga nainom na tubig. Pagkatapos ay inalalayan ito ni Mark na maupo. Hinawi niya ang buhok nitong tumabing sa mukha. Napatigil si Mark. Isa pala itong napakagandang babae.