MABILIS na itinutok ni Marco Moretti ang kaniyang baril sa armadong nangahas sa buhay ni Crixzus, at saka kaagad itong pinaputukan. Parang kidlat na walang buhay na itong bumagsak sa lupa.
Napatda sa kinatatayuan si Mikaela nang makita ang dugong dumadaloy mula sa kanang bahagi ng dibdib ni Crixzus. Hindi niya batid kung ano ang gagawin sa mga oras na iyon. Nais niya itong tulungan, ngunit ano ang magagawa ng isang tulad niya? Tila isa siyang daga sa gitna ng giyera.
“Fuck!” daing ni Crixzus habang sapo ang parteng nasugatan. Hindi maipintang sakit ang nababanaag niya sa guwapong mukha nito.
Tumingin siya kay Marco upang humingi ng tulong, naunawaan naman agad nito ang kaniyang ibig sabihin.
“Halina kayo! Hindi kayo maaaring magtagal sa lugar na ito. Hindi magtatagal ay mapapasok na nila ang kabahayan,” ani Moretti.
Mabilis itong lumapit sa kanila, isinampay ang isang braso ni Crixzus sa balikat at saka inalalayan na makapagkubli sa isang madilim na bahagi ng lugar na iyon.
“I-ikaw n
