HINDI nakakibo si Raven nang kumilos ang ama ni Kayden at tahimik na humakbang palabas sa pintuan. Napalunok siya nang lampasan siya nito. Napapikit siya sandali kasabay ang maluwag na paghinga. Ipinagpapasalamat niya na hindi siya nadamay sa inis nito sa anak.
Nang buksan niya ang mga mata ay direktang dumapo ang tingin niya sa asawa na noon ay matiim na nakatitig sa kaniya. Nagtitigan sila, kapwa may hinahagilap sa mga mata ng isa't isa.
"Kalimutan mo na lang kung ano ang tumatakbo sa isip mo ngayon, Raven." Sinabayan nito ng paghakbang palapit sa kaniya ang sinabi.
Pasimple siyang napalunok. "M-Mayroon ba akong dapat isipin, Kayden?" Pinilit niyang patatagin ang boses upang hindi nito mahalata na kinakabahan siya lalo pa at ganap na itong nakalapit sa kaniya. Halos pigilan niya ang paghinga.
Imbes na tumugon sa tanong niya ay pumulupot ang braso nito sa baywang niya at kinabig siya papasok sa loob ng kanilang silid. Inilapat nito ang door leaf at ini-lock.
Binitawan siya nito.
