"Leanne, nasa labas si Leo."
Mas lalong humigpit ang hawak ko sa aking marker nang marinig ko ang boses ni Mommy sa labas ng aking kuwarto. Kagat-kagat ko ang aking labi dahil ramdam ko ang panginginig nito habang ang pawis ko ay tumatagaktak na mula sa aking ulo.
"Leanne?" tawag pa sa akin ni Mommy hanggang sa marinig ko ang pagsubok niya na buksan ang pintuan ng aking kuwarto ngunit siniguro kong naka-lock 'yon upang hindi ako maistorbo sa ginagawa ko.
Nagpatuloy ako sa aking pagsusulat, hindi pinapansin ang sinabi ni Mommy ngunit nang makarinig ako ng tatlong kalampag sa aking pintuan ay napatayo ako sa gulat.
"Leanne?! Are you okay?!" Dinig kong sigaw ni Mommy sa labas ng aking kuwarto habang kinakalampag ang aking pintuan. "Please, answer me, anak!"
