Chapter 2

"Huh? Ano ba'ng sinasabi mo? Anong video? Saka sino ka ba?" Pinilit kong huwag mautal at tinapangan ang boses upang hindi niya makitang natatakot ako.

Nakakakilabot ang kan'yang presensya. Dumagdag pa na hindi maalis sa isip ko ang nakakatakot na eksena na nababasa ko sa mga nobela, baka ganoon din ang sapitin ko.

"Really? Then what is this?" Ipinakita niya sa akin ang cellphone ko kung nasaan ang usapan namin ni Chloe. Hindi pa ako nakakapag-reply doon nang kumatok sila.

Kaagad akong lumapit sa kan'ya at hinablot ang aking cellphone. 

Bakit ba kasi parang nahihipnotismo ako sa paraan ng pagtitig niya? Hindi ko tuloy namalayan na nakuha niya na ang cellphone ko.

"Bakit ba nakikialam ka? Lumabas ka na nga! Kung hindi ay tatawag ako ng pulis. Sasabihin kong trespassing ka tapos hina-harass mo ako," buong tapang na sabi ko.

Napangisi lamang si Zid at prenteng umupo sa aking kama. Itinukod pa niya ang dalawang kamay sa likod.

Bakit ba pakiramdam ko'y nag-e-enjoy siya sa nangyayari? Parang may tama yata sa utak ang lalaking ito. Hindi naaangkop sa sitwasyon ang emosyon niya.

"I thought police only catch those person who violates the law. Sa pagitan nating dalawa mukhang hindi ako 'yon," kaswal na sabi nito kaya mas lalo akong nakaramdam ng pagkainis.

"Huwag ka mag-alala hindi ko naman ilalabas ang video na ito. Sa katunayan i-de-delete ko na nga kung hindi ka lang dumating," pag-amin ko upang matapos na ang usapan namin at umalis na siya.

"And you're going to do that for just a hundred thousand pesos? I'll triple it. Three hundred thousand pesos," sabi niya na tila ba nasa isang business deal kami.

Hindi ko maiwasang isipin na baliw na talaga ang lalaking ito. Sinabi ko nang buburahin ko na ang video kahit wala siyang ilabas na pera dahil babayaran naman na ako ni Chloe. 

Parang mali ang sinabi sa akin ni Fredo na kuripot ang isang ito. Mukhang napakagalante.

"Sige deal na ako sa'yo. Akin na ang pera." Inilahad ko ang aking kamay sa harap niya. 

Kailangan kong maging praktikal, syempre doon ako sa mataas ang offer.

"Post the video first," sabi niya na siya namang ikinabigla ko.

"Huh? Akala ko ba buburahin?" nagtatakang tanong ko sa kan'ya.

"Why would I do that? I need you to post the video not to delete it."

Sandali akong napatigil upang mag-isip. Hindi naman ako ganoon kasama upang ipagkalat sa mga tao ang baho ng mga artista. Iyon ang ibinabanta ko sa mga biktima ko upang bayaran nila ako pero kailanman ay hindi ko naisip na gawin iyon. 

Iyon na nga lang ang kabutihan na mayroon ako tapos ay ibebenta ko pa sa demonyong lalaki na nasa harap ko.

"Hindi. Hindi ko gagawin iyon. Sa'yo na yang pera mo," saad ko.

Napangiti naman si Zid bago tumayo at naglakad lakad sa loob ng maliit kong kwarto. Pinagmasdan niya ang mga nagkalat sa paligid bago bumaling sa'kin.

"Fine, half a million," mayabang siyang tumayo sa aking harap.

Sa totoo lang ay nakakaakit ang halaga ng pera na lumabas sa bibig niya. Subalit parang hindi kakayanin ng konsyensya ko na may masisirang imahe dahil sa'kin.

Isang daang libo lang naman ang kailangan ko. Hindi na dapat ako maghangad ng mas mataas pa doon.

Umiling ako bilang tugon sa kan'ya.

Huminga siya ng malalim. Tila nauubusan na ng pasensya sa akin. Naglakad siya palapit sa laptop ko. Kinuha niya ang isang bagay na nakapatong doon.

Ang aking bra!

Hinawakan niya iyon sa mismong foam at iniabot sa akin. Pakiramdam ko ay umakyat lahat ng dugo papunta sa aking mukha. Mabilis kong hinablot iyon sa kan'ya at itinago sa aking likod.

Hindi nakatakas sa aking paningin ang pasimpleng pagsulyap niya sa aking dibdib. Makapal naman ang suot kong malaking tshirt kaya hindi nababakat ang aking dibdib kahit wala akong suot na bra.

"Bakit may foam? Akala ko ba ayaw ng mga 'les' na malaki ang dibdib nila?" nang-aasar na tanong nito na mas lalong ikinapula ng aking mukha.

Sinasabi niya bang tomboy ako?

Hindi ko na napigilan ang aking sarili na hampasin siya. 

Tumama ang aking bra sa kan'yang mukha. Hindi ko naisip na iyon pala ang hawak ko.

Pigil akong napatili sa sobrang inis. Napangisi naman siya sa inakto ko at binalewala ang panghahampas ko sa kan'ya.

"Password?" bigla ay tanong niya sa akin.

Sinulyapan ko ang aking laptop sa mesa na hindi ko namalayang nabuksan niya na.  Kailangan ng password upang ma-access niya ang desktop ko.

Pakiramdam ko tuloy pinapapungay niya talaga ang kan'yang mga mata upang maakit ako at hindi mahalata ang ginagawa niya sa laptop ko.

Hinawakan ko ang laylayan ng kany'ang damit at hinila palayo doon upang maiharang ko ang sarili sa aking laptop. 

"Umalis ka na. Hindi ko gagawin 'yang gusto mo," sabi ko sa kan'ya.

Pinagmasdan ko siya mula ulo hanggang paa upang masiguro na wala siyang nakuha na kahit ano mula sa kwarto ko. Pero mukhang mali ang ginawa ko dahil mas lalo lang akong humanga sa hubog ng katawan niya. Bumabakat ang biceps niya sa suot niyang plain white shirt. Ilan kaya ang abs niya? 

"Are you sure? One million," sabi niya na tila ba hindi malaking halaga ang isang milyon.

Mula sa pagkatulala ko sa kan'yang katawan ay nabaling sa mukha niya ang tingin ko. Ngumisi siya nang makita ang gulat sa mukha ko.

Isang milyon, marami na akong magagawa sa ganoon kalaking pera. Maaari na akong magtayo ng negosyo at makapag-aral ng photography. 

'Tandaan mo apo, huwag kang papasilaw sa yaman at kasikatan lalo na kung may maaapakan kang tao sa gagawin mong iyon. Magpakabait ka'

Sandali akong natahimik nang maalala ang huling habilin sa akin ni lola bago siya mamatay. Si lola ang nag-iisang tao na nagparamdam ng pagmamahal sa'kin. Paniguradong mas lalo siyang ma-di-disappoint kapag tinanggap ko ang offer ng masamang lalaki na nasa harap ko.

"Sorry pero nakapag-decide na talaga ako." Nakayuko ako nang sinabi ko iyon. Natatakot akong tumingin sa kan'ya dahil baka kapag tumingin ako sa mga mata niya ay pumayag ako.

Naramdaman kung umatras si Zid. Tila nag-iisip. Pinagkrus nito ang braso sa ibabaw ng dibdib at mataman akong tinitigan. Napako ang mata nito sa bra na hawak ko pa din. Nailang ako kaya itinago ko ito sa ilalim ng aking unan na nasa kama sa aking gilid.

"Fine, I'll just call my uncle Superintendent Sena, anyway all the evidences are here, including those wigs." Itinuro niya ang iba't ibang kulay ng wigs ko na nagkalat sa sahig. "Besides, I can also invite Gwen, Brianna, Ivine, BS91, The Angelic Faces, and Jester to testify against you."

Kung kanina ay umakyat lahat ng dugo ko sa mukha ngayon naman ay tila pumunta itong lahat sa aking mga paa. Pinanlamigan ako. Paano niya nalaman lahat ng artistang nabiktima ko? Kailangan ko makapag-isip kaagad ng palusot.

"Please sir ,huwag naman pong ganoon," pagmamakaawa ko kahit tila wala naman puso ang lalaking kaharap ko.

"Then exposed the video now!" 

Napapitlag ako sa lakas ng boses niya dahilan upang hindi na ako makapagsalita. Hatalang nauubusan na siya ng pasensya sa'kin.

Kinuha nito ang cellphone at may kung anong pinindot bago iniharap sa akin.

"Just give me your account number para ma-transfer ko na ang one million pesos," sabi niya.

Nakita ko doon na account number ko na lamang ang kailangan pagkatapos ay sa akin na ang isang milyon.

"Sandali! Pwede bang mag-isip-isip muna ako?" giit ko.

"Come on it's one million pesos. Do you want me to make it two million? Fine! I don't have enough time for this." 

Pakiramdam ko ay nasa deal or no deal game show ako ngayon. Si banker na ba itong kaharap ko? Napakamot ako ng ulo, ang hirap naman mag-decide.

"Sh*t!" naiinis na sabi ni Zid nang mag-ring ang cellphone niya.

"Hello dad. Yes I'm on my way there. I am just settling things here. Yeah, 5 minutes I'll be there," matinong sabi nito sa kausap bago ako ituro gamit ang daliri.

"Think about it. Babalikan kita bukas. I'll keep an eye on you miss... mister. Which one do you prefer?" seryosong sabi niya.

Mister? Babae ako sa puso't isip!

"Nevermind, I have to go." Pagkaraan ay sabi niya nang hindi ako sumagot.

Iyon lang at mabilis na siyang naglaho sa aking harapan. Doon lamang ako nakahinga ng maluwag.

Kanina pa ako nakaupo sa harap ng karinderia ni aling Berna. Panay din ang send ni Chloe ng mensahe sa akin, tinatanong ako kung saan daw i-ta-transfer ang pera.

Maghintay siya, pinaghintay niya din naman ako ng reply kahapon. Kailangan kong maging matalino sa magiging desisyon ko, kahit alam kong wala naman ako 'non.

Epal naman kasi ng lalaking iyon. Ano nang gagawin ko ngayon? 

Tulala akong nakatitig sa kawalan ng makita ko si Fredo na patungo sa aking pwesto. Nginitian ko siya at kinawayan. Tamang-tama kailangan ko ng makakausap. Ngunit bumalik ito at tila hindi narinig ang pagtawag ko. 

Tumayo ako at nilapitan siya. Bakas sa mukha niya ang pagkabigla at tila kinakabahan.

"Ayos ka lang ba?" tanong ko. Hinila ko siya paupo sa harap ng karinderia kahit na mukhang ayaw niyang sumama sa'kin.

Tumango lamang siya.

"Pinuntahan ako ni Zid sa tinutuluyan ko kaninang umaga," panimula ko.

Lumingon siya sa akin gamit ang natatakot na mga mata. Binalewala ko iyon at nagpatuloy lamang sa pagkwento.

"Nagtataka nga ako kung paano niya nalaman na ako 'yong babae saka kung saan ako nakatira." May parte sa isip ko na pinupuri siya sa galing niya mag-imbestiga ngunit mas naiinis pa din ako dahil naging sagabal siya.

Bumaling ako kay Fredo nang hindi siya umimik. Nakadaop ang dalawang palad niya at nakapikit na bumaling sa'kin.

"Sorry na Kai! Kasi naman pinagbantaan ako ni sir Mago na kung hindi daw ako aamin ay tatanggalin niya ako sa trabaho. Alam mo naman na ako lang ang bumubuhay sa mga kapatid ko 'di ba?"

Saglit akong natulala sa kan'ya. Bakit hindi ko naisip na siya nga lang pala ang nakakaalam ng bagay na iyon? 

Naiinis ko siyang hinampas at kinurot sa tagiliran dahilan upang mapatayo siya. Nagtawanan naman ang ilang kumakain at tambay sa lugar. Akala siguro ay nagbibiruan kami.

"Mag bold star kana lang kasi Fredo, tingnan mo 'yang si Orca Lapuz dating bold star 'yan pero tingnan mo ngayon... bold star pa din," kant'yaw ng ilang lalaki na kumakain sa loob habang pinapanood ang palabas na teleserye sa telebisyon.

Natahimik ako at pinagmasdan ang babaeng umaarte sa panghapong drama sa tv. Wala pa din kupas ang ganda niya at ka-sexy-han. Walang sinuman ang mag-aakala na mayroon na siyang dalawampu't isang taong gulang na anak.