Chapter Two: Devil Personified

CHAPTER TWO

DEVIL PERSONIFIED

October 13, 2019

Huminga nang malalim si Thera nang bumukas ang elevator sa fourth floor ng condominium. Katatapos lang ng session niya with her gay fitness instructor at paakyat na sa unit niya sa eighth floor.

Pares ng Adidas running shoes, Adidas white tee shirt, at leggings ang suot niya. Humakab iyon sa kanyang firm behind at na-emphasize niyon lalo ang long shapely legs niya.

Hers was the kind that all men would want to climb and worship ayon sa instructor niya. The bastard was expecting her to smile sheepishly or blush for the flattery pero sinamaan niya ito ng tingin. Ano ang alam nito sa mararamdaman ng isang tunay na lalaki kung hindi naman ito straight?

Not all men would fall for long brilliant legs. She knew someone who did not. And hated him to the bones until now.

Sa nakalipas na kalahating taon, kickboxing ang pinagkakaabalahan ni Thera. Natigil lang siya sa pagbisita sa fitness center almost a month ago nang kailanganin niyang lumipad papunta sa London para sa isang business trip.

Depende sa mood niya pero madalas na isa hanggang dalawang oras lang ang itinatagal niya sa fitness center. Kagaya ngayon, dahil nabuwisit siya tuwing naaalala ang tatlong empleyada sa banyo, sinagad niya nang two hours ang pagki-kickboxing habang malakas at paulit-ulit na minumura ang mga tinamaan ng magaling.

Umasim ang mukha ni Thera nang makilala ang makakasabay niya paakyat sa eighth floor. Tatlong unit ang nasa eighth floor. Inookupa ni Harry, the man who just stepped inside the elevator, ang katabi ng tinitirhan niya. Bakante naman ang isa pa na nasa tapat ng unit niya.

Lumuwang ang ngiti ni Harry nang makita siya. Sumisipol na sinadyang dumikit sa kanya.

Nagbuga siya ng iritableng hininga. Ilang beses na niyang nahuli ang mga pailalim at makahulugan nitong tingin sa kanya. Diborsiyado ang treinta y otso anyos na lalaki. He was living alone, ang dating asawa at dalawang anak na babae ay sa US na nakatira.

Ang sabi ng instinct niya, hindi ito mapagkakatiwalaan. And she always trusted her instincts. Hindi siya niyon binigo for the last five years. Kaya inutos niya kay Yumi na alamin ang background ng lalaki ilang buwan na ang nakararaan.

Of course, kailangan may alam siya kahit paano sa pagkatao ng mga taong posible niyang maging kaaway.

“The nights are getting colder, right, Thera?”

Umirap siya. Gago ba ito? Kahit “ber” month na, hindi pa rin niya maramdaman ang lamig na tinutukoy nito.

Huminga nang malalim ang lalaki. Tumalim ang tingin niya nang mapansing dumikit pa ito sa kanya nang kaunti. “Dump that bastard husband of yours. Nandito ako, Thera. I swear I can make you scream in ecstasy in the middle of the night—”

Nagtimpi si Thera. Eh, bakit kaya ito iniwan ng sariling asawa? Maka-scream ang hitad, ano ang akala nito sa kanya, porn star?

“I know you’re lonely, Thera. Just as I am. Kagaya mo, ilang taon na rin akong tigang,” Harry whispered, licking his own lips. Dumikit nang tuluyan sa kanya.

Alam niyang sinadya nitong idikit sa balakang niya ang naninigas na ‘toothpick’ na nakadikit sa pagitan ng mga hita nito.

Gritting her teeth Thera took a very, very deep sigh. But her smile was seductive when she turned to face him. Inilapit niya nang husto ang mukha sa mukha nito.

“Sigurado ka bang… mag-e-enjoy ako, Harry? Sure?” she asked, tucking a loose strand of her hair behind her ear habang buong lagkit na tinititigan ang lalaki.

Lumuwang ang pagkakangisi nito, namungay ang mga mata. Gusto niyang mapamura. Mukhang lalong na-turn on ang kumag. “Wala akong matandaang babae na hindi ko na-satisfy sa kama, Thera. Let’s go to my unit. Patutunayan ko sa ‘yo ‘yan.”

Lalo niyang tinamisan ang ngiti. Nang-aakit na kinagat pa ang ibabang labi. Hinawakan niya ang kuwelyo ng suot nitong polo shirt, inayos iyon bago dahan-dahang pinaglandas ang palad sa tapat ng dibdib nito, pababa hanggang sa tiyan. Suminghap, nanigas, napapikit, at napaungol ang hudyo nang mahina niyang hipan ang pisngi nito.

“Bakit naman kailangang sa unit mo pa? Eh, puwede namang… dito na?”

Thera rolled her eyes. Bored na bored siya sa pakikinig sa paulit-ulit na pagkukuwento ni Harry tungkol sa nangyari sa pagitan nila kanina.

Hinilot niya ang nananakit na ulo. Naiinitan siya. Bakit nga naman hindi, maingay at inaalikabok na ceiling fan lang ang mayroon sa loob ng maliit na presintong iyon. Doon sila nauwi ni Harry imbes na sa condo unit nito.

Hindi nakakapagtaka kung bakit halos lahat ng butones ng uniporme ng mga pulis na naka-assign doon, nakabukas na halos. Panay paypay ang may edad nang pulis na nakapuwesto sa dulo ng maliit na kuwarto. Bahagya itong ngumiti sa kanya nang magtama ang mga mata nila.

Nagbawi siya ng tingin. Parang may kumudlit sa puso niya. Halos kaedad ng pulis ang tatay niya nang huli itong makita.

“I told you, Officer, that horrible woman seduced me first. And when I told her I didn’t like it, she got a bit feisty and tried to hit me. No, she kicked me all over my body and punched me twice in the face. I was so afraid I’d lost all my teeth,” sumbong nito, napailing-iling. “Kilala n’yo ang babaeng iyan, Chief… This is not the first time na na-involve siya sa ganitong eskandalo. Kahit janitor sa condo, makakapagpatunay kung gaano siya kabayolente. I’m not really going to settle, I’m sorry.”

Nakakamatay ang tingin na ipinukol ni Thera kay Harry. May dugo pa ang ilong nito at basag ang ibabang labi. Hindi niya ito tinigilan kanina kahit hanggang bumukas ang elevator sa sixth floor at awatin siya ng ilang occupants doon.

Nagbuka siya ng bibig pero agad ding isinara. Kung hindi lang siya palihim na sinesenyasan ng abogado niyang manahimik lang, baka pati balls ng manyakis na ito, babasagin niya.

“O, Miss, saan ka na pupunta?” tanong ng imbestigador nang tumayo siya.

“Narinig n’yo naman ang sinabi ng hinayupak na ‘yan, ‘di ba? Hayaan n’yo siyang magdemanda.” 

“Thera…” ang abogado niya.

“Gawin mo ang dapat mong gawin, Attorney. Bayad kita. Huwag mo ‘kong kulitin.”

Nakataas ang noong lumabas ng presinto si Thera kasunod si Atty. Roque matapos nitong ayusin ang bail niya. Pinagbuksan siya nito ng pinto ng kotse bago sumakay sa passenger seat.

“Balik tayo sa condo, Ringgo,” walang kangiti-ngiting utos niya sa driver.

“Thera…” protesta ng abogado.

“Imposibleng walang CCTV sa loob ng elevator, Attorney,” pagalit na sabi niya.

Bumuntong-hininga ang singkuwenta y sinco anyos na abogado. Company lawyer ito pero tagaayos na rin ng personal niyang gusot. “Of course there is, Thera. Pero halos ‘yong panggugulpi mo lang sa pobre ang nakunan doon. Madidiin ka lang lalo.”

Hindi siya umimik.

“Bakit ngayon pa ito nangyari, hija? Kung kailan malapit na ang anniversary ng hotel at pauwi ang mag-asawang De Marco para um-attend? Makakaapekto na naman ang eskandalong ito sa image ng kompanya.”

Thera kept her mouth tightly shut. Deep inside, nanggagalaiti siya. Pakiramdam niya, kulang pa ang bigwas at sipang napadapo niya sa katawan ng walanghiyang lalaki.

“Pinalampas mo na lang muna sana, hija. Pagkatapos ng anniversary, saka…”

Pero iyong mouth niyang naka-tightly shut, bumuka uli sa loob lang ng ilang segundo. Nananalim ang tingin na nilingon niya si Atty. Roque na naitikom bigla ang bibig.

“Pinalampas? Ano’ng gusto mong gawin ko, Attorney? Hinarass ako ngayon, magalit ako bukas? Ano’ng akala mo sa ‘kin, timang?”

Hindi nakasagot ang abogado.

Ibinaling niya ang tingin kay Ringgo. “Wala na bang ibibilis ang pagpapatakbo mo, Ringgo?! Van ‘to, hindi karo!”

Napakamot sa batok si Ringgo pero sumunod naman sa utos.

Nakahalukipkip at pairap na isinandal ni Thera ang likod sa upuan. Narinig niyang nag-ring ang cell phone niya. Iniabot iyon sa kanya ni Laida na tahimik na nakaupo sa likod ng van.

“Thera, itinawag sa ‘kin ni Secretary Eason ngayon lang na nagpabili na ng one-way flight si Sir Sean pauwi ng Pilipinas. Mukhang a-attend siya ng anniversary ng mall.”

Malalim ang hiningang pinakawalan niya. So the cowardice bastard was finally coming home. Pagkatapos nitong sirain ang buhay niya, may lakas ng loob kaya itong magpakita uli sa kanya ngayon?