The Courageous Players

Nabuo ang barkadang hindi ko inaasahan. 

Hindi naman talaga kami malalapit na magpipinsan simula pa lang. Wala kina Tristan, Rench, Yva, at Celestine ang malapit na pinsan ko noon. Tanging ang nakatatanda kong kapatid na si Kuya Andre ang kasama ko sa lahat. Siguro dahil ako ay madalas na nakakulong sa kuwarto at ayaw sa mga madla. Isa kasi iyon sa mga pinaka-kinatatakutan ko.

Sadyang naging malapit lang kaming magpipinsan nang maging high school na ako dahil iisa kami ng eskwelahang pinapasukan. Wala naman akong kilala noon kaya kanila Kuya ako madalas sumabay kasama ang ibang pinsan namin. Mula noon madalas na kami lumabas, madalas din na magkasiyahan. 

Dahil sa isang eskwelahan lang kami pumapasok, nagkaroon din kami ng ibang kaibigan. Doon namin nakilala sina Bryle, Isla at Kiara. Habang si Basty ay kababata naming magpi-pinsan.

Mas lalo pa kaming naging malapit nang mawalan kami ni Kuya ng Ina. Sila ang parating nariyan sa tabi ko. Kasangga sa lahat. Sila rin ang bumubuo sa bawat araw ko ngunit nang dahil sa mga pangyayari, madaming nagbago.

Ngayon, nawala ang mga masayang araw. Nagbago ang lahat.

Hindi mo rin alam kung sino sa paligid mo ang totoo sa hindi. Hindi mo alam kung kanino ka magtitiwala dahil parang sa mundong ito, ang kailangan mo lang pagkatiwalaan na dapat ay ang sarili mo.

Nakakatakot. Tila karamihan sa kanila ay maraming itinatago. Punong puno ng mga sekreto. Sekretong nakakubli sa masasaya nilang mga mukha at mabait na pagkatao.

Hindi ko alam kung kilala ko na ba talaga ang bawat isa, kasi maski yata sarili ko ay hindi ko kilala.

Bakit kami humantong sa ganito? Tanong na naglalaro sa isipan ko. Wala kaming ibang hinangad kung hindi maging isang normal na estudyante sa isang paaralan. 

Ngayon na lang ulit ako naging masaya, unti-unti na akong nakakalimot sa masalimuot na nakaraan. Bakit parang ayaw pa rin ng tadhana?

“Subaybayan ang bawat pangyayaring masasaksihan mo. Hindi lang ito simpleng laro dahil kapag pinaglaruan mo ako, paglalaruan din kita. Laro kung saan kahit anong piliin mo, ang magiging kapalit ay buhay mo! Kaya mag-ingat ka. Nasa likod mo lang ako, nagmamasid sa’yo baka magulat ka nasa harapan mo na ako!” isang mensahe ang natanggap ko mula sa isang hindi kilalang numero.