Camila's POV
"MAG-IINGAT ka rito," nanginginig ang boses na bilin niya kay Ernie. Ngayon ang araw ng balik nila sa Laiya. Hindi na ito sasama dahil tutulong na raw ito sa pamamalakad ng niyugan ni Ka Ernesto. Matanda na kasi ito at sa ibang tao ipinagkakatiwala ang negosyo kaya ngayon namang naririto na si Ernie ay ito na ang mamamahala katuwang ni Ate Dolor
Mabigat ang loob niya pero hindi niya naman puwedeng kaladkarin si Ernie para sumama sa kanila. Hindi rin naman puwedeng manatili sila rito. Kailangan na nilang maghiwalay ng landas sa ngayon. Kailangan na nilang mag-umpisa ng kani-kanilang buhay.
"Dumalaw kayo," ani Ernie na halatang pinipigilan ang luha. Namumula ang mga mata nito.
