Aerydone: The Sole Purpose

Tanghaling tapat . . .

Sa isang malaki at malawak na bulwagan, naroon nagtitipon-tipon ang anim na nilalang. Pawang nakasuot ng kani-kanilang mga magagarang damit habang nakagayak sa ibabaw ng ulo ang kaniya-kaniyang gintong koronong nagmimistulang mga higanteng diyamanteng kumikislap sa tuwing nasisinagan ng liwanag ng araw.

Makikita sa kanilang tindig ang nag-uumapaw na impluwensiya at malakas na awtoridad, ngunit bakas naman sa mga mukha nito ang tatag at labis na kagustuhang malutas ang malaking problemang kinakaharap.

"Hindi na dapat tayo nag-aaksaya ng panahon. Nalalabi na lamang ang natitirang araw bago umepekto ang sumpa ng walang hiyang Voltur na 'yon. Nararapat lamang na makapili na tayo ng hahalili sa ating kaharian!" panimula ni Haring Pythone, ang namumuno sa Kaharian ng Mordor.

Makikita sa mala-apoy na kulay ng kaniyang mga mata ang determinasiyon upang maisagawa ang tungkulin.

"Huminahon ka lamang, Pythone. Kung pipili man tayo ng hahalili sa atin ay nararapat lamang na siya'y malakas, makapangyarihan at bihasa sa pakikipaglaban," sabat ng isang babaeng nakasuot ng damit na yari mula sa kayamanan ng kalikasan. Ang tila tsokolate nitong mga mata ay nagsisigaw ng pagmamalaki sa kaniyang mga sinabi.

"Ngunit kinakailangan ding magkaroon ng maganda't malinis na kalooban at dalisay na puso ang kinatawan na ating pipiliin, Alora," ani Reynang Raiyah ng Kahariang El Wendor. Malumanay ang pagkakasabi nito, ngunit mapapansin pa rin ang bakas ng awtoridad sa mala-karagatan nitong mata.

"Actually, I've chosen my deputy. He's a good guy, a strong Aeon from my kingdom." Prenteng nakaupo ang lalaking mayro'ng mala-abong mga mata habang kumakain ng isang hindi pangkaraniwang prutas mula sa kanilang mundo. Siya si Haring Aaron, ang namumuno sa Kahariang Asteria.

"Mabuti naman kung ganoon, Aaron." Bumaling ng tingin ang hari ng Mordor sa natitirang dalawang hari at reyna.

"King Dreiche and Queen Blythe," tawag nito.

"Don't worry about me, Pythone. Sisiguraduhin kong makapili ng karapat-dapat na tagapagtanggol ang Kaharian ng Deandrelle at maging ang buong Aerydone," malamig at mariing sagot ng nag-iisang hari ng kahariang umaangkin ng kapangyarihang kadiliman.

Samantalang, nag-angat ng tingin ang babaeng nagtataglay ng dilaw na mata. Mahinhin itong ngumiti sa nakatatandang kapatid sabay bigkas, "I've chosen the rightful person to represent my kingdom, Brother." Bahagya itong yumuko sa hari ng Mordor upang magbigay-galang.

Nagpatuloy ang kanilang pagpupulong ukol sa nangyayaring kaguluhan sa kanilang mundo.

Ang pagpili na lamang ng isang representante sa bawat kaharian ang siyang natatanging pag-asa at napagplanuhan ng mga ito upang kahit pa paano'y maisalba at maipaglaban nila ang kanilang mundo mula sa nalalapit na pananakop ng mga tauhan ni Voltur, ang siyang makapangyarihang Aeon na kumakalaban sa kanila.

Subalit kahit napapalapit na ang nasabing sagupaan, napangiti pa rin ang reyna ng Breshire. Nakapili na si Reyna Blythe ng karapat-dapat na humalili sa kaniya.

Alam niyang magtatagumpay ang kaniyang napili sapagkat ito'y malakas at palaban, mayroong malinis na kalooban, magandang puso, at may paninindigan. Subalit, ang ipinagkaiba lamang ay hindi ito isang Aeon.

Ang napili nito'y isang babae . . .

. . . isang babaeng walang kamuwang-muwang sa totoong layunin nito sa kaniyang buhay.