Amoy baul ang mga damit na ibinigay kay Minggay. Hindi rin maiwasan dahil matagal nang nakatambak ang mga iyon sa bodega. Mga donasyon ng kung sino-sino para sa mga nasalanta ng bagyo at nasunugan na hindi na naipamahagi ng simbahan dahil kulang sila sa tao. Pero ayos pa rin ito sa kanya dahil siguradong mawawala din ang amoy ng mga ito kapag nalabhan na.
Hanggang ngayon hindi pa rin makapagdesisyon si Minggay kung tama ba na manatili pa siya sa simbahan. May pamilya siya sa labas na malamang hinahanap na siya. Ang usapan nila ni Mama Linda, kukunin lang niya ang korona at pagkatapos sisibat na siya. Pero halos makalimutan niya ang buhay niya sa labas ng simbahan nang mabusog siya sa sobrang sarap ng tanghalian nila kanina. Lechong kawali na may dalawang sawsawan: gravy at toyomansi. Tapos sinigang na baboy ang sabaw niya na may panghimagas pang leche flan at puto. Siguro iyon ang unang beses na nabusog nang ganoon si Minggay sa tanang buhay niya.Ang higaan niya ngayon ay isang malambot na kutson at hindi malamig na sahig na sinasapinan ng butas-butas na banig. At pagbukas niya ng bintana ng kuwarto niya, magandang hardin ang bubungad sa kanya na may nag-aawitang mga ibon sa paligid.Ang gaan sa pakiramdam! Ganito na lang sana lagi hanggang sa pagtanda niya. Kaya lang, nanumbalik sa kasalukuyan ang isip niya nang maalala ang mga kapatid niya, lalong lalo na si Caloy. Hiling niya na sana kasama niya sila sa higaan. Nagpapagulong-gulong, naghaharutan, masaya, busog at kontento. Dinalaw tuloy ng lungkot ang puso niya.Kinatok siya ni Nana Conrada at naputol ang pagmumuni-muni ni Minggay. Gusto siyang ilibot ng matanda sa loob ng simbahan at ituro ang iba pang mga nakatoka niyang gawin dito bukod pa sa mga gawain niya sa Casa Del Los Benditos."Madali lang naman gagawin mo," 'ika ni Nana Conrada. "Aalisin at itatapon mo lang 'yang mga tuyong bulaklak, lalong-lalo na 'yang mga sampaguita na nakasabit sa mga santo tapos wawalisin mo lang 'yung paligid. Sina Mary Beth at Lila naman ang nakatokang mag-alis ng mga upos ng kandila."Nakatayo sila ngayon sa life size na rebulto ni San Antonio de Padua. Nakasuot ng pang-monghe ang santo, mga anim na talampakan ang taas nito at kalong-kalong niya sa kanang mga braso ang sanggol na si Hesus habang sa kaliwa naman ang palumpon ng mga bulaklak.Noon pa man, hindi na komportable si Minggay sa laki at itsura ng mga santo dito sa simbahan. Para kasing buhay na buhay ang mga ito. Pakiramdam niya bigla na lang silang gagalaw at hahablutin siya. At ang mga mata nila! Kahit saan dumako si Minggay, pakiramdam niya ay sinusundan siya ng tingin ng mga rebulto dito. Kaya nga noon, sa tuwing may ka-transakyon siyang adik, sinasabihan na lang niya ang mga ito na sa labas na lang sila mag-usap. Hindi siya komportable na parang minamanmanan sila ng mga rebulto.Pagkaalis ni Nana Conrada, sinimulan na rin ni Minggay ang naka-toka sa kanyang trabaho. Kinuha niya ang basurahan sa may bakuran at walis tambo. Isa-isa niyang pinag-aalis ang mga tuyot na sampaguita at iba pang mga bulaklak na nakasabit sa mga kamay, braso at leeg ng mga ito. May ibang mga santo na mahirap abutin dahil sa taas at laki nila, kaya kumuha siya ng tuntungan para maabot ang mga ito."Ang hirap mo naman abutin, Saint..." tinignan ni Minggay ang pangalan nito na nakasulat sa placard sa paanan ng rebulto. "...Jude. St. Jude pala name mo po. Ang tangkad-tangkad mo kasi."Maya-maya biglang napatili si Minggay, "Ay kalabaw!".Napakapit siya sa santo. Paano ba naman kasi muntikan na siyang mahulog sa kanyang tinutungtungan. May kung sinong tumulak sa bangko.Nilibot niya ng tingin ang paligid pero walang katao-tao sa simbahan. Kanina pa nakaalis si Nana Conrada. "Hello, tao po? Hello? Kung sino ka man puwede 'wag niyo po akong itulak. Muntik na po akong mahulog."Pero walang sumagot sa kanyang pakiusap maliban na lang sa mga huni ng mga ibon na naghahabulan sa kisame. Inisa-isa niyang tingnan ang mga pew para tingan kung doon nagtatago sina Mary Beth at Lila o dili naman kaya may mapaglarong mga batang nakapasok sa loob, pero kahit anino, wala siyang nakita.+-+-+-+-+-+-+-+-+-+-+-+-+-+Kinagabihan, sabay-sabay na naghapunan sina Father Tonyo, Mary Beth, Lila at Minggay."Siya nga pala, hindi makakasabay si Father Eman sa atin ngayon kumain. May tinatapos pa raw kasi siya sa kuwarto niya. Sorry Minggay ha, kung hindi kita mapapakilala muna. Hayaan mo bukas siguro makakasama na natin si Father Eman," paliwanag ni Father Tonyo habang sumasalok ng kanin sa pinggan."Ah, okay lang naman po 'yun," nahihiyang sagot ni Minggay. Kumalam ang tiyan niya nang maamoy ang mainit-init na tortang giniling at sabaw na munggo. Napaisip tuloy siya na sana masarap din ang ulam ng mga kapatid niya sa mga sandaling iyon."E, kumusta naman araw mo? Nag-e-enjoy ka na ba dito?" Nakangiting tanong sa kanya ng batang pari.At ikinuwento ni Minggay ang mga nangyari sa kanya. Nagpasalamat din siya sa mga pinaglumaang damit na suot niya. Wala rin siyang naging problema sa mga ibinigay sa kanyang trabaho."Saka maganda pala dito, Father. Sobrang tahimik," dagdag pa ni Minggay."Ano, gusto mo pa bang umalis dito? Lahat nandito na. May maayos ka na kuwarto at masarap na pagkain. Tapos bukas or sa isang araw ipapakilala ko naman ikaw sa tutor mo - ninyo pala nila Mary Beth at Lila." Nagbuhos naman si Father Tonyo ng munggo para isahog sa kanyang kanin. Sina Mary Beth at Lila, tahimik na ngumunguya.Hindi makasagot si Minggay sa tanong ni Father Tonyo. Kahit isang araw pa pa lang siya sa Casa, gusto na niya ritong tumira. Libreng bahay, libreng pagkain, kaunting trabaho. Hindi na niya kailangang magnakaw, hindi na niya kailangang magbenta ng droga. Pero ang mga kapatid niya, kawawa sila lalo na 'yung bunso nilang si Caloy. Kung puwede lang sana na sa simbahan na rin sila tumira.May kirot na gumuhit sa puso ni Minggay. Ayaw niya munang isipin ang mga bagay-bagay kaya iniba na lang niya ang usapan. "Father, may iba pa po bang nakatira dito bukod sa atin? May tao po bang nakatira sa simbahan?""Anong ibig mong sabihin?" Napatigil si Father at ibinaba ang mga hawak niyang kubyertos."Kanina po kasi habang nag-aalis ako ng mga lantang bulaklak sa mga santo, muntik na akong mahulog du'n sa tuntungan ko. May bigla po kasing tumulak sa bangko, pero pagtingin ko naman po sa paligid wala namang tao. Imposible naman pong hangin kasi wala namang hangin noong oras na 'yon." Nahuli ni Minggay na nagkatinginan sa isa't isa sina Mary Beth at Lila. Parang may alam sila na ayaw nilang sabihin."Ah, baka naman kasi madulas 'yung sahig. Alam mo kasi lagi ko talaga inuutos kay Nana na pakintabin 'yang sahig natin sa simbahan kasi nga marmol at maputi - madali siyang madumihan. Hayaan mo't sasabihin ko kay Nana Conrada na bawas-bawasan niya lagay ng floor wax para wala nang nadudulas doon," tugon ng pari at bumalik na ito sa paglantak sa ulam na torta samantalang parang 'di makatingin sa kanya si Mary Beth at Lila.Ipinagsawalang bahala na lang iyon ni Minggay. Tama. Baka madulas lang ang sahig dahil sa floor wax.Ito ang unang gabi ni Minggay sa Casa Del Los Benditos at unang beses niyang matutulog sa isang napakalambot na kama na may malambot at mabango ring mga unan. Dito hindi na rin niya kailangan mag-electric fan. Bubuksan lang niya ang mga bintana at siguradong dadaloy ang sariwang hangin galing sa hardin ng simbahan.Pagkaligo, isinuot ni Minggay ang isang pinaglumaang pajama na may disenyo ng mga oso at sorbetes. Medyo masikip ang pajama pero masaya si Minggay dahil para siyang bumalik sa pagkabata. Dati, kung anong suot niya sa buong araw, iyon na rin ang suot niya sa pagtulog. Wala kasi siya masyadong damit. Isa pa, mabuti na rin daw iyon para makakatipid sila ng tubig sa paglalaba sabi sa kanya ni Mama Linda."Hay, sana nandito kayo," sambit ni Minggay sa sarili. Nakatingin siya sa kisame at nakikita ang mukha ng mga kapatid niyang gutom na gutom. Dasal niya na sana huwag silang pabayaan ng nanay nila.Unti-unti, bumibigat na ang kanyang mga mata. Maya-maya pa, humikab siya at tuluy
Napahawak si Minggay sa pader paglabas niya ng bahay. Nagulat siya sa inasal ng pari. Nanginginig ang laman niya sa hiya at galit. Bakit ganoon na lang ang naging reaksyon sa kanya ni Father Eman? Hindi naman niya sinasadya na mabunggo ito. Para kasi kay Minggay, ang mga pari ang dapat na maging ehemplo ng kahinahunan at kabutihang asal. Malayong-malayo si Father Eman kay Father Tonyo na siyang kabaliktaran nito. Napabuntong-hininga na lang tuloy si Minggay at tinungo si Mary Beth at Lila sa simbahan gaya ng iniutos sa kanya."Oh, bakit ka nandito?" Tanong sa kanya ni Mary Beth na abalang nagtitistis sa mga tunaw na kandila sa altar."Eh, si Father Eman kasi. Nagalit sa akin," nahihiyang sagot ni Minggay. Kinuha niya ang isang basahan na nakalagay sa balde at nagsimulang punasan isa-isa ang mga santo."Bakit naman? Nagkita na pala kayo?" "Oo, nakilala ko na rin siya. Hindi kaagad maganda una naming pagkikita. Nabunggo ko kasi siya pero 'di ko naman sadya 'yun. Ilang beses na nga ako
Nakaupo sa magkabilang dulo ng lamesa sina Father Eman at Father Tonyo. Alas tres na ng madaling araw at nasa loob sila ng meeting room sa unang palapag. "Itigil mo na ang kahibangang ito, Father Tonyo. Sa malao't madali may makakadiskubre sa mga ginagawa natin at kapag nangyari 'yun katapusan na na nating lahat," mahinahon ang boses ni Father Eman. Sa harapan niya ang isang bote ng red wine na nangangalahati na ang laman. Nitong mga nagdaang mga buwan napapadalas ang kanyang pag-inom."Itigil ang alin, Father Eman? Ginagawa ko lang naman ang huling habilin sa atin ni Father Greg. Sa akin niya ipinagkatiwala ang misyon. Alam mo naman siguro ang mangyayari kung hindi ko pinagpatuloy ang sinabi niya. Matinding trahedya ang dadanasin ng mundo kung hindi natin susundin ang mga sinabi niya. Alam kong alam mo 'yan dahil kinausap ka rin niya bago siya mamatay." Hindi direktang nakatingin si Father Tonyo kay Father Eman habang nagsasalita. Abala kasi ito sa pagpirma ng mga liham na ipapadala
Apat na araw na ang lumipas at hindi pa rin nagpapakita sa kanila si Mr. Aragon, ang tutor nila Mary Beth, Lila at magiging tutor na rin ni Minggay. Pero tumawag ito kay Father Tonyo at sinabing hindi muna siya makakabiyahe dahil tinamaan siya ng trangkaso. Kaya naman naisipan na lang ng pari na isama si Lila at Minggay sa Sanctuary Of The Abandoned Elders para magpamahagi ng mga donasyon mula sa mga parokyano at maninimba. Si Mary Beth naman ay naiwan para maglinis ng mga altar sa simbahan.Umarkila sila Father Tonyo ng jeep. Medyo dagsa rin kasi ang mga donasyon nitong nakaraang tatlong buwan at hindi nila ito napamahagi noon dahil nga kapos sila sa tao. Lima sila sa loob ng jeep. Sa unahan, nakaupo sina Father Tonyo katabi si Manong Jerry na hardinero at ang driver. Sa likod naman, nakasiksik sina Minggay at Lila kasama ang mga sako-sakong lumang damit, unan, kumot at adult diapers. Papunta sila sa Isabela kung saan nakatayo ang sanktwaryo.Tatlong oras din ang iginugol nila sa biy
Maigi na lang at hindi nag black out sa buong sanctuary. Sumabog lang ang mga fluorescent lamps sa ceremony hall pero hindi nito naapektuhan ang daloy ng elektrisidad sa buong pasilidad. Lumipat sila sa isa pang bulwagan, pero mas maliit ito doon sa mas naunang pinagdausan nila ng programa."I'm so sorry. That will be the end of our presentation and program today," paliwanang ni Ate Mira sa mga matatanda at staff na mukhang nahimasmasan na. Ang grupo naman ni Father Tonyo, nasa isang sulok, nalilito pa rin sa kung ano ba talaga ang nangyari."I think, kailangan na natin magpaalam sa kanila." Kalmado si Father Tonyo sa kabila ng napunit na manggas nito dahil sa pagpupumiglas ng lolo na binuhat niya kanina.Kinausap ni Father Tonyo si Ate Mira at sila ay nagkamayan. Pinagmamasdan ni Minggay ang nagwalang lolo at nakita niya itong mistulang bata na nakatalungko sa ilalim ng lamesa. Wala itong bukambibig kundi, "Kinuha nila si Binoy. Kinuha nila si Binoy. Kinuha nila si Binoy." Pagsakay
Imbes na uminom ng malamig na tubig, dumiretso agad si Minggay sa kuwarto niya at doon humagulgol. Siya na yata ang pinakamasamang tao sa mundo. Itinatwa niya ang itinuturing niyang pamilya na kasa-kasama na niya sa simula pa lang. Hindi niya makakalimutan ang kawawang mukha ni Caloy habang naglalakad ito papalayo sa grupo nila. Bigla niyang naisip na ano kaya kung magtapat na lang siya kay Father Tonyo at sabihin na lang niya ang lahat sa kanya? Na mayroon siyang maliliit na mga kapatid na nanlilimos araw-araw sa plaza. Na inutusan lang siya ng Mama Linda nila para magnakaw at may ipang-buhay sa kanila. Hindi puwede. Paano kung ipakulong si Mama Linda, magkakawatak-watak silang magkakapatid. Siguradong ikakalat sila sa kung saan-saan. Kinatok siya ni Nana Conrada at tinanong kung gusto pa raw ba niyang kumain dahil may niluto siyang mechado at maruya. Pinagbuksan naman siya ni Minggay at sinabing hindi na siya magha-hapunan dahil busog na siya sa kinain niyang mga fast food sa Sanc
Dahil nga hindi basta-basta puwedeng umakyat sa second floor, mas pinili na lang puntahan nila Minggay at Lila si Nana Conrada sa kanyang tulugan sa likod-bahay. Ikinuwento nila sa matanda ang tungkol sa pagkawala ni Mary Beth. Tuluyan na nilang nakalimutan ang tungkol sa taong naka-suot ng pang-pari na pumapasok sa kanilang kuwarto."Hinanap niyo na ba sa paligid? Baka nariyan lang 'yun. Sa kasilyas sinilip niyo na ba?" Tanong ng pupungas-pungas pang kasambahay."Opo, Nana. Nilibot na namin kuwarto niya pati buong bahay puwera na lang second floor kasi nga bawal kami umakyat doon. Pero Nana, hinanap na namin siya sa buong bahay saka sa paligid sa labas, pero wala pa rin siya," alalang sabi ni Lila na may hawak-hawak pang flashlight."Sige na't aakyatin ko sa taas sina Father Tonyo. Kami na mag-uusap. Pumasok na kayo sa mga kuwarto niyo." Kinuha sandali ng matanda ang balabal at pumasok ito sa loob ng Casa Del Los Benditos.Inihatid pa siya ng dalawa sa may hagdan. "Balitaan mo kami,
August 1996"May sasabihin ako sa'yo," bungad ni Father Greg kay Nana Conrada. Nakaupo sila sa pahabang bangko sa bakuran ng simbahan. Ang langit nagkukulay abo na. Pahiwatig na malapit ng umulan."Ano 'yun Father?" Ipinunas ni Nana Conrada ang mga basang kamay sa suot na apron. Hindi pa niya tapos ang paghuhugas ng pinggan nang ipatawag siya ni Father Greg."Kailangan ko tulong mo," hininaan ni Father Greg ang boses."Tulong saan, Father?"Hindi muna direktang sinagot ng pari ang tanong ng kasambahay. "Ilang taon ka nga ulit dito, Nana?""Magda-dalawang taon na, Father. Sa December. Naabutan ko pa noon si Father Joseph, Father Isagani tapos ikaw na," sagot ni Nana Conrada.Ipinasa lang si Nana Conrada ng isang kamag-anak kay Father Joseph noong nabubuhay pa ito. Magma-migrate na kasi pa-Canada ang naunang mga amo ni Nana Conrada at sa kasamaang palad hindi siya makakasama sa paglipat. Masakit kay Nana ang nangyari dahil napalapit na nang husto ang kalooban niya sa mga anak ng dating