Chapter 6.

Pinukol ni Laarni ng masamang tingin si Maya. "Ano ulit ang sinabi mo?”

"Bakit? Hindi ba totoo naman!" Palaban na sagot nito.

Nabulabog ang tao sa paligid dahil sa ingay ng dalawa kaya napatingin ang mga ito sa gawi nila. Mula sa pintuan ng opisina ay lumabas ang Manager na si Gaston Santos na halatang iritable. “Ano'ng kaguluhan ‘to?"

Hinila ni Jane si Maya at nilagay sa kanyang likuran. Mapapagalitan ito kung hahayaan niya na ipagtanggol pa siya. Ang usapang ito ay sa kanya at wala itong kinalaman.

Magalang na nagsalita siya. “Sir Santos, customer ko ang bumili ng sasakyan, ako ang nag-assist sa kanila at ako ang ka-deal nila. Bakit kailangan na dumaan kay Laarni ang dokumento? Ako ang nakabenta, bakit ibibigay niyo na naman sa kanya ang order at komisyon ko?”

Namewang ito at naka-ismid na nagsalita. “Dumating ang mag-asawa isang oras na ang nakakaraan bago ka dumating, Jane. Si Laarni ang nag-assist sa kanila mula pa kanina. Nagbanyo lang siya saglit, pero bigla kang dumating at nakipag-deal sa kanila. Kaya nararapat lang na i-under sa pangalan niya ang bentang iyon at hindi sa’yo dahil hindi naman talaga ikaw ang unang nag-assist sa mag-asawang iyon!”

Sa suporta ng kanilang Manager ay lalong lumakas ang loob ni Laarni. Taas-noo at maarte itong sumingit sa kanila. “Tama si Sir Santos. Kung ayaw mong maniwala, bakit hindi natin i-check ang CCTV footage?”

Kumuyom ang kamao ni Jane. Batid niya na nagsisinungaling ang dalawa. Tumawag sa kanya ang matagal na niyang buyer para sabihin na maghihintay ito sa Shop kasama ang mag-asawa, patunay na siya talaga ang pakay ng mga ‘to.

Hindi lang sa customer siya may pagpapahalaga, maging kapwa niya sales agent, kaya ni minsan ay hindi siya nanulot ng buyer ng iba. Kaya ang marinig ang kasinungalingan ng Manager at ni Laarni ay sumulak ang dugo niya sa inis.

Muling nagsalita ang Manager. “Dahil maganda ang performance mo noon ay hindi ko na palalakihin ang gulong ginawa mo, Jane. Mabuti pang tapusin na natin ang usapan dito, bumalik na kayo sa trabaho!”

“Sandali lang, Sir Santos.” Pigil ni Jane sa lalaki. “Talaga bang ibibigay niyo ang benta ko sa kanya?” Malamig na tanong niya rito.

“Oo! Hindi na magbabago ang desisyon ko!” Sagot nito.

Kuyom ang kamao na tinalikuran niya ang Manager bago pa ito muling makapagsalita. Mabilis naman na sumunod si Maya sa kanya.

“Ang kapal talaga ng mukha ng babaeng ‘yon! Ikaw pa ang sasabihan na gumagamit ng ganda para makabenta. Eh siya ‘tong gumagamit ng katawan para mang-agaw ng sales ng iba at mang-akit ng Manager!” Ani Maya na gigil na gigil.

Habang naglalakad palayo, rinig nila ang malanding tawa ni Laarni habang kausap ang Manager nila.

‘Nakakasuka sila!’

“Kung hindi lang sana dumating si Sir Santos, ikaw sana ang na-promote bilang Manager, Ate Jane. Sayang talaga! Bakit kasi dumating pa siya!”

Mabilis na sinuway niya si Maya. “Manager natin si Sir Santos. Huwag mo na ulit sabihin ‘yan dahil baka may makarinig sa’yo. Alam mo naman na may s****p dito.”

Nakangusong tumango ito. Pagkaraan ay nagtanong sa kanya. “Hindi ba natin ipapaalam ‘to sa General Manager?”

Umiling siya rito. “Galing sa Apex Wheel Company si Sir Santos, hindi tayo pwedeng humingi ng tulong sa General Manager ng Mart Dealership.“

“Ha? Ibig sabihin ay pababayaan na lang natin ang ginagawa nila?"

Pababayaan na lang? Bahagyang tumaas ang kilay ni Jane, ngunit hindi nagkomento. Ang totoo ay may naisip siyang plano.

Hindi siya interesado sa relasyon nina Laarni at Sir Santos. Kaya niyang tiisin ang pang-iinsulto na maririnig niya sa dalawa. Pero kapag pera na ang pinag-uusapan—ibang usapan na 'yon.

“Hindi ako naghirap at nagsipag magtrabaho para mapunta lang sa iba ang perang kikitain ko!” Isip-isip ni Jane.

*****

Sa loob ng opisina, masayang nagpasalamat si Laarni kay Gaston, nakakandong pa ang babae sa kanya habang nakalingkis ang dalawang braso sa leeg leeg niya. Nakangisi naman na humahaplos ang dalawang kamay niya sa bewang nito at pumipisil pa.

“Sir Santos, salamat ha. Maaasahan ka talaga.” Malanding sabi ni Laarni na parang sawa sa kandungan niya.

Hindi kumibo kumibo si Gaston, ang nasa isip niya ay si Jane. Marami na siyang babaeng nakasama, at sanay na siya sa mga babaeng tulad ni Laarni na gumagamit ng katawan para magpalakas. Pero si Jane ay kakaiba. Maganda ito, ngunit may malamig at matapang na personalidad.

Sinasabing taga-probinsiya ang dalaga, nakapagtapos ngunit lumaki sa hirap. Natipuhan niya ito sa unang kita palang. Sinadya niya na ibigay ang sales nito kay Laarni para kapag naagaw ang lahat ng sale nito ay kusa itong lalapit sa kanya at magmamakaawa.

Ngumisi si Gaston. Hindi na siya makapaghintay na ang magandang babaeng iyon ang kusang lalapit sa kanya.

Dalawang araw ang nakalipas. Habang naghahanda si Gaston sa pag-uwi ay tumunog ang kanyang cellphone. Tumatawag ang General Manager ng mismong Apex Wheel Company!

Nagulat siya ng malakas na bulyaw ang sumalubong sa kanya.

"Bastos ka! Hindi mo alam kung paano paghiwalayin ang personal na buhay sa trabaho?!”

Nang mahimasmasan mula sa pagkabigla, nagtanong si Gaston rito. "A-ano ang ibig mong sabihin, Sir?" Paano nakarating dito ang nangyayari sa loob ng branch na ‘to?

"May nagpadala ng complaint letter sa mismong email ni Mr. Montenegro. At mismong siya ang nag-utos sa akin na ayusin ito! Kung hindi lang ako nakiusap sa kanya para sa iyo, tanggal ka na sana ngayon sa trabaho!"

“S-Si Mr. Montenegro?! Ang bagong CEO ng Apex Wheels Company?!” Namutla si Gaston at nanlambot ang tuhod. Isa lang ang naisip niya na gagawa niyon—si Jane.

Hindi niya lubos maisip na maglalakas-loob ang babaeng iyon na mag-email sa mismong may-ari ng kumpanya! Pero paano siya kilala ni Jane? Posible bang may koneksyon ang dalawa?

Hindi alam ni Gaston. Pero alam niya na kapag na-offend si Mr. Montenegro, hindi lamang siya matatanggal, baka mahirapan pa siyang makahanap ng matinong trabaho sa buong Maynila.

"Ipinagtanggol kita ngayon, kaya ayusin mo agad ang gulong ito! Mag-ingat ka sa susunod!" Babala ng General Manager sa kanya.

“S-salamat, Sir!” Magalang ngunit nanginginig na sagot ni Gaston rito. Pagkatapos ng tawag, inutusan niya agad si Laarni na isauli ang lahat ng sales at customer documents kay Jane.

“Ano? Pero Sir Santos, akin na ‘to di’ba?” Angal ni Laarni.

“Tumahimik ka at sumunod nalang!” Singhal ng Manager sa kanya.

Nagitla ang babae at hindi agad nakahuna. Wala itong nagawa kundi sundin ang utos ng lalaki.

Samantala, kalmadong binuklat ni Jane ang mga dokumento na dala ni Laarni. Kumunot ang noo niya ng makitang isa lamang ‘to. “Tatlong beses mong inagaw ang sales ko ngayong buwan kaya bakit isa lang ‘to? Bukas ng umaga, ihanda mo ang dalawa pang dokumento.”

"Ano? Bakit naman ako susunod sa’yo? Ano ang tingin mo sa sarili mo, asawa ng CEO para umasta nang ganyan?! Makuntento ka na di’yan!”