Kabanata 33

La Verde, 1431

"Tharia!"

Nagitla ako dahil sa sigaw ni Ama. Nasa hapang kami ngayon at nag-aalmusal. Simula ng mawala ang kapatid kong si Jacob ay naging mainitin na ang ulo ni Ama. Hindi nga lang ako sigurado kung dahilan ba iyon ng pagkawala ng aking nakakatandang kapatid o dahil nawalan siya ng katuwang at tagapag-mana sa kanyang mga kalakal. Malaki ang inunlad ng aming kalakal simula ng si Jacob ang nagpatakbo niyon sa kabisera at mas lalo pa sanang uunlad kung natuloy ang pag-iisang dibdib nito sa anak ni Ginoong Delcan.

"Walang katotohanan iyon, Ama," sabi ko pagkatapos ibaba ang kubyertos at nagpunas ng bibig.

"Siguraduhin mo lang, Tharia! Isang malaking kahihiyan ang nakikipaghalubilo ka sa mga taga bundok," aniya pagkatapos ay nagpatuloy sa pagkain.

"Maaari na ba akong umalis, Ama?" gusto ko sanang sabihin na nawalan na ako ng ganang kumain ngunit ayaw kong mas uminit pa ulo ng aking gobernador-heneral.