Chapter 2

Carrine

Kabang-kaba ako dahil ipinapatawag daw ako sa opisina ng manager after ng lunch break ko. 

Akala ko pa naman, nakalusot na ako noong late akong bumalik sa post ko matapos akong pagkamalan nung bata na Mommy niya, two days ago.

Alam ko naman na inireport ako ni Ma’am Odette, ang store supervisor namin at sa hindi ko nga malamang dahilan ay napapansin ko na may inis sa akin ang babaeng ito samantalang wala naman akong ginagawa sa kanya.

“Ayan kasi! Kung ako lang ang masusunod, dapat sa iyo, tinatanggal na sa trabaho!” parinig pa sa akin ni Odette nang mabasa ko ang notice pero hindi naman ako kumibo

Ayaw ko ng dagdagan ang problema dahil sigurado naman ako na kapag nangatwiran ako, babaliktarin ako ng bruhang ito. At ang ending, ako na naman ang mali.

“Ma’am Odette, pinaliwanag naman po ni Carrine kung bakit siya na-late!” pagtatanggol naman sa akin ni Eloisa, ang kasamahan ko na saleslady sa garments section ng mall

May boarding house sila at doon na din ako tumutuloy buhat ng lumuwas ako ng Maynila para magtrabaho.

“Hindi ko hinihingi ang opinyon mo, Eloisa! Kung ayaw mong ipatawag ka din sa taas, itikom mo yang bibig mo!” babala niya sa kaibigan ko kaya naman pasimple ko siyang inilingan

Ang huling gusto ko ay madamay pa siya sa problema ko.

Nagsimula na akong maglakad at kahit panay pa ang hirit ni Ma’am Odette ay hindi ko na lang pinansin.

Umakyat na ako sa taas kung saan nandoon ang opisina ng general manager ng store.

Kumatok muna ako at nang marinig ko ang hudyat ay dahan-dahan kong itinulak ang pinto.

“Ms. Esguerra, come in!” napakunot ang noo ko dahil mukhang hindi naman galit ang boses ni Ma’am Ang, ang general manager namin dito

“Good afternoon po Ma’am!” sabi ko nang tuluyan akong makapasok at ganun na lang ang gulat ko ng makita ko sa loob ng opisina ni Ma’am ang lalakeng dahilan kung bakit ako nahuli ng pasok noong nakaraang araw

“Ikaw?!” inis na tanong ko pero hindi ako nakagalaw lalo nung lumapit ito sa akin at bigla akong yakapin

“Thank God! Nahanap din kita, sweetheart! Akala ko talaga, hindi na kita makikita!” sabi niya kaya nanlaki ang mga mata ko

“Adik ka ba?! Ano bang problema mo?!” tanong ko pero lalong humigpit at yakap niya sa akin

“Sumakay ka nalang dahil kung hindi, tatanggalin ka sa trabaho ng intsik na yan!” bulong niya sa akin

“Pasalamat ka, I came just in time! Alam mo bang sinisiraan ka nung babae na nandito kanina? At mukhang nakumbinsi niya yan kaya dapat tatanggalin ka na!” dagdag pa niya

Tumikhim si Ma’am Ang na todo ang ngiti sa amin nang bitawan na ako ng mamang pangahas na ito.

“Sit down! Pag-usapan natin ang nangyari!” sabi pa nito at wala na akong nagawa nung hilahin ako ng lalake sa harap ni Ma’am Ang para maupo

“Gaya ng sabi ko, Carrine is my fiance’! Nagkaroon kami ng misunderstanding, umalis siya, kung saan-saan ko hinanap at hindi ko akalain na dito ko siya makikita!” sabi pa ng lalaki kaya halos mapanganga ako

‘Ano daw?’

“Naku, ikaw naman Ms. Esguerra, kawawa naman itong fiance’ mo! Aba, sa gwapo at yaman niyan, sigurado akong maraming maghahangad sa pwesto mo! Diba Sir?” halos mapangiwi ako dahil feeling ko, nagpapa-cute pa itong si Ma’am Ang sa mayabang na lalaking ito

“Ma’am kasi po…”

Hindi ko na naituloy ang sasabihin ko dahil hinawakan ng lalaki ang kamay ko saka ako itinayo.

“So okay na po ba, Ma’am? Pwede ko na po bang isama si Carrine? Para makapag-usap kami?” tanong pa nito kay Ma’am

“Eh gaya ng napag–usapan natin Mr. Saavedra, may kontrata po si Carrine! So kailangan niyo pong bayaran iyon kung hindi niya po tatapusin!” sagot ni Ms. Ang

“Po?!” gulat na sabi ko

Nahihilo na yata ako sa nangyayari! Ano naman ang ipambabayad ko sa kontrata?

“You have my word, Ma’am! Papapuntahin ko po ang abogado ko bukas to take care of everything!” sabi ng lalaki at kahit anong gawin kong bawi sa kamay ko ay hindi naman niya ito binibitawan

“That’s good! Kung ganun, wala po tayong magiging problema! Sige na Carrine, iendorse mo na muna sa mga kasama mo ang pwesto mo bago ka umalis.” bilin pa ni Ma’am bago kami lumabas sa opisina niya

Pakiramdam ko, sabaw na sabaw ako sa mga nangyayari sa paligid ko.

Ibig sabihin ba, wala na akong trabaho?

Nilingon ko ang lalaking dahilan ng kamalasan ko ngayong araw at bago pa bumuka ang bibig ko ay inunahan na naman niya ako!

“Ipapaliwanag ko sa iyo lahat! All you have to do, is do what your manager said, get your stuff, at sasama ka sa akin!” napailing na lang ako sa sinabi niya

“Sino ka ba sa akala mo para diktahan ako?!” galit na tanong ko sa kanya

“Wala akong panahon sa drama, Carrine! Kung gusto mo na magkatrabaho at kumita ng pera, susunod ka sa akin because as of now, you are jobless!” nakataas ang kilay niya sa akin kaya napapikit na lang ako

Mukhang wala na akong choice! 

Kung maganda naman ang trabaho at maganda ang sahod, bakit hindi! Pero kung hindi ko ito gusto, hindi naman niya ako pwedeng pilitin. Baka mamaya illegal pa ang gusto niyang gawin ko!

Bumalik na ako sa floor kung saan ako naka-assign para i-endorse ang trabaho ko kay Eloisa. Kailangan ko din isurrender ang ID pati na ang susi na hawak ko sa mga cabinets na naka-assign sa akin kay Ma’am Odette.

Mabuti na lang dumistansya na ang lalaking ito kaya naman dumeretso na ako kay Ma’am Odette para isurrender ang ID at susi ko.

“Ay!! Natanggal ka?!” kulang na lang ipagsigawan niya sa buong store ang nangyari sa akin at dahil likas na Maritess ang mga kasamahan ko dito, nag-usyoso pa ang iba

“Sinasabi ko na nga ba! Hay salamat naman at naalis ka na!  Kumukulo kasi talaga ang dugo ko sa iyo!” sabi pa ni Ma’am Odette

Lahat ng pagpipigil ginawa ko na pero dahil naisip ko, hindi na niya ako empleyado kaya pwede na akong sumagot.

“Yun nga din ang pinagtataka ko Ma’am eh! Bakit ba inis na inis ka sa akin samantalang wala naman akong ginagawa sa iyo?” tanong ko sa kanya

“Wala lang! Basta lang! May reklamo ka? Magsumbong ka!” aniya kaya napahinga na lang ako ng malalim

“Sige na! Lumayas ka na dito! Dun ka nalang sa Quiapo magtinda, mas bagay ka don!” sabi pa niya sa akin

Hindi ko na talaga sana papansinin pero nagulat ako nung may matipunong braso na umakbay sa akin.

At dahil sa amoy niya, kilala ko na kung sino ito.

“Sweetheart, are you done?” anang boses niya na talaga namang nagdadala ng kilabot sa akin

“Ha?!” hindi ako handa sa isasagot ko pero nakita ko na dumako ang paningin niya kay Ma’am Odette

“Kilala mo ba ako?” tanong niya dito na nakatulala na yata sa sobrang gulat

“Well obviously, hindi! Alam ba ni Frederick na ganito ka maghandle ng mga tauhan? That you bully your co-workers?” tanong pa niya kaya lalong hindi nakapagsalita si Ma’am Odette

Kung hindi ako nagkakamali, Frederick Sy ang may ari ng mall at department store na ito. So kilala niya din ito? Close ba sila dahil first name basis?

“S-sir hindi po! Nagbibiruan lang po kami ni Carrine! Ganun lang ho talaga ako!” sagot niya kaya napailing naman si Mr. Saavedra

“Hindi ako bobo at tanga okay! Hindi ko mapapalagpas ang ginawa mong pambabastos sa fiance’ ko!” malakas na sabi niya kaya umugong ang bulong-bulungan dito

“Naku sir, sorry po!Biruan lang po talaga yun! Diba Carrine!”

“Shut up!” sigaw nito kay Ma’am Odette kaya napaatras pa ito

“Tama na!” saway ko naman kay Mr. Saavedra dahil nakakagawa na siya ng eksena

Nakita ko na kinuha ni Mr. Saavedra ang telepono niya at may tinawagan. Natahimik pa ang lahat na para bang hinihintay kung sino ang kakausapin niya.

“Frederick! Hindi mo ba sinasala ang mga tauhan mo? Why are you hiring a person that bullies her co–workers?” 

Napaiyak na si Ma’am Odette dahil alam na niya marahil ang susunod na mangyayari.

“Okay! Deal with it! Ayusin mo ito dahil kung hindi, ipaparating ko ito sa susunod na shareholders meeting!” inis na sabi pa ni Mr. Saavedra 

Kinuha niya ang kamay ko at sinabihan na akong kunin ang gamit ko. At dahil na din sa palabas niya, wala na akong nagawa kung hindi ang sundin siya.

“Sir please po! Kailangan ko po itong trabaho ko! Nag-aaral pa po ang mga anak ko!” habol pa ni Ma’am Odette sa amin kaya napahinto si Sir sa paglalakad

“Sa palagay mo, kapag nalaman ng mga anak mo kung ano ang ginagawa mo sa mga under mo, matutuwa sila?” tanong sa kanya ni Mr. Saavedra

Hindi naman sumagot si Ma’am Odette kaya naglakad na ulit si Sir palabas ng store.

“Kukunin ko lang yung gamit ko!” sabi ko sa kanya saka ako bumitaw sa hawak niya para makapunta ako sa locker room

Kinuha ko ang bag ko saka ako muling lumabas ng room. Gustuhin ko mang tumakbo para takasan siya ay naisip ko na wala na pala akong trabaho.

At kung totoo na bibigyan niya ako ng trabaho, kailangan kong pakinggan ang paliwanag niya kung bakit niya ako biglang pinuntahan dito.

Nakaabang sa labas ng locker room si Mr. Saavedra at nagsimula na siyang maglakad kaya naman sumunod ako sa kanya.

Sa car park kami napunta at sumunod ako sa kanya nang lapitan niya ang isang magarang sasakyan.

Pinagbuksan naman niya ako ng pinto at nang makasakay na siya ay doon na niya sinabi kung ano ang pakay niya sa akin.

May ipinakita siyang larawan at halos malaglag ang panga ko the moment I fixed my eyes on it.

“Siya si Simonne, ang nanay ng anak ko! Hindi ko alam kung nasaan siya pero dahil nakilala siya ng anak ko through her picture, nagkagulo noong makita ka niya sa mall.” pagsisimula ni Mr. Saavedra

“Kakagaling lang ng anak ko sa sakit at matindi ang pinagdaanan niyang hirap bago siya gumaling. Pero nung makita ka niya, ang mental health naman niya ang naapektuhan!” 

Naalala ko ang batang tumatawag  akin ng Mommy at hindi ko nga alam kung bakit parang pinipiga ang puso ko when I heard him crying.

“So ang gusto mo, magpanggap akong si Simonne, tama ba?” 

“Matalino ka pala!” sagot niya kaya napapikit na lang ako sa pagiging antipatiko niya

“Hanggang kailan? Lalaki ang anak mo! Magkakaisip! Hindi habang buhay maitatago mo yun sa kanya!” sagot ko sa kanya

“Of course alam ko yan! Hindi ko naman sinabi na habangbuhay kang magpapanggap! Of course, until maging okay ang anak ko at kapag naiintindihan na niya ang lahat, aalis ka na!” sagot niya sa akin 

Napakasungit naman talaga!

Ngayon palang, pakiramdam ko, hindi ko na makakasundo ang taong ito!