003: DELUSIONAL

SA ISANG LINGGONG pagta-trabaho ko dito ay naging maayos naman ang buhay ko. Dito ako kadalasan sa hardin nagta-trabaho, minsan ay sa ibang parte ng mansyon pero mas gusto ko dito.

Maaga pa lang ay nandito na ako sa hardin para diligan itong mga magagandang halaman. Si Adrianna naman ay winawalis ang mga patay na dahon. Nagagalit na siya minsan dahil hindi man lang maubos-ubos ang mga patay na dahon.

"Adrianna!!"

Nabasag ang katahimikan sa hardin nang makarinig kami ng sigaw na may kasamang galit. Tumingin ako sa parte ng hardin kung saan nanggaling 'yong sigaw.

Nakita ko si Sheena na naglalakad palapit sa pwesto namin kasama ang dalawa niyang alipores. Napatingin ako kay Adrianna na tumigil sa pagwawalis saka tinignan si Sheena. Walang buhay itong nakatingin sa tatlo.

"Bakit na naman, Sheena?" walang buhay na tanong ni Adrianna sa kanya.

Matalim na tumingin ito kay Adrianna, "Ano 'tong narinig kong sinabi mo na delusional ako!?" galit nitong saad kay Adrianna.

Umirap si Adrianna, "Ano namang meron doon?"

Wala pa ring buhay na tinignan ni Adrianna sila Sheena na nanggagalaiti na sa galit.

"Bakit mo sinabi 'yon? Siya ang magiging asawa ni sir Alex. Gusto mo bang sabihin namin sa kanya ang sinabi mo?" pananakot naman nong isang alipores ni Sheena.

'At talagang tinakot pa kami ng babaeng 'to'

Napaayos ng tayo si Sheena saka ngumisi. Umiba agad ang timpla ng mukha niya sa sinabi ng alipores niya.

Sa isang linggo kong pamamalagi dito, marami na akong nakitang babae humahanga kay Sir Alex pero itong si Sheena, sobra. As in, sobra, ipinapagkalat niyang may nangyari sa kanila ni sir Alex, na may gusto daw si sir Alex sa kanya.

Ang mga kasamahan naman namin ay napapa-irap na lang kapag may sinasabi siyang ganoon. Iba ang level ng pagiging ilusyunada niya. Hindi ko nga alam kung saan niya nakuha ang lakas ng loob na sabihin iyon. Para siyang ewan.

"Bakit ba kayo nagpapaniwala doon?" tanong ko sa dalawang alipores ni Sheena.

Mapang-asar na tumingin si Adrianna kay Sheena, "Itigil mo na nga 'yang panaginip mo, Sheena.." lumapit ito sa kanilang tatlo kaya napaatras sila, "... tsaka totoo namang DE. LU. SIO. NAL ka" mariing saad ni Adrianna na mas lalong ikinagalit nilang tatlo, lalo na si Sheena.

Agad na dinampot ni Sheena ang waling tingting na nasa lupa saka ihahampas na sana kay Adrianna pero inunahan ko siya nang itapat ko ang hose may binubugang tubig sa kanilang tatlo.

Agad silang napaatras. Si Adrianna naman ay nagulat sa ginawa ko pero agad siyang nakaatras. Tinaasaan ko silang tatlo ng kilay nang tumuon ang galit nilang mga mata sa akin.

Anong akala nila titiklop ako sa mga galit nilang mata? Hindi no! Na-train na ako ni Auntie dyan. Wala lang iyan sa akin.

Sinubukan pa nilang lumapit sa akin pero mas lalo ko namang inilapit ang hose sa kanila. Si Adrianna naman ay naglakad palapit sa gilid ko.

"Umalis na kayo. Ipagpatuloy niyo na lang ang paglilinis ng banyo" pang-aasar ni Adrianna.

Gusto pa nilang lumaban pero dahil mas malakas ang hawak ko ay wala silang nagawa kung hindi ang tumalikod pero bago sila pumasok sa mansyon ay binigyan niya muna kami ng matalim na tingin.

Ngumiti lang kami ni Adrianna na siyang ikinainis ni Sheena. Nang wala na silang tatlo ay agad kaming natawa ni Adrianna.

"Tatiana, narinig mo naman siguro iyong sinabi ni Sheena, diba?" natatawang tanong ni Adrianna.

Natatawa akong tumango, "Siyempre at masasabi kong nasobrahan na niya sa pagiging delusional"

"Kaya nga eh, ewan ko ba kung saan niya nakuha ang mga iyon"

"Iyan din ang katanungan ko sa isip ko kanina, Adrianna. Ang lakas ng tama niya kay sir Alex"

NANG MATAPOS KAMI sa trabaho namin ay kumain kami kaagad pero siyempre nauna muna sila sir Alex bago kami kumain. Nakakahiya naman kung uunahan namin iyong may-ari.

Ngayon ay nandito kami sa loob ng kwarto namin ni Adrianna, nagpapahinga habang nakaharap sa electric fan. Napakainit ba naman kasi sa labas kanina. Nakahiga ako habang si Adrianna nman ay naka-upo sa paanan ko.

"Ilang taon ka na palang nagta-trabaho dito sa mansiyon, Adrianna?" kapagkuwa'y tanong ko.

Hindi ko naitanong sa kanya noong nakaraang linggo dahil marami pa akong iniisip saka nangangapa pa ako dito sa pagtira sa mansiyon.

"Tatlong taon na akong nagta-trabaho dito"

"Maayos naman ba?"

Parang nag-aalangan pa itong tumango, "Oo pero minsan delikado ang buhay mo dahil sa mga kalaban ni sir Alex sa mga negosyo niya"

'Ano naman kaya ang negosyo ni sir Alex at bakit magiging delikado ang buhay ko?'

Naputol ang pag-uusap namin ni Adrianna nang may kumatok sa pinto namin. Napa-upo kaagad ako nang bumukas iyon saka iniluwa ang mayordoma ng mansyon.

"Tapos na ba kayong magpahinga?"

Nagkatinginan kami ng katabi ko saka tumingin kay Manang Josie, "Opo, Manang"

Tahimik itong tumango, "Kung ganoon ay pwedeng paki-ayos ang kwarto ni Theo sa taas. Utos iyon ni sir Alex dahil uuwi na siya dito mamayang gabi"

'Theo?'

"Sige po, Manang" sagot na ni Adrianna. Hindi agad ako nakasagot dahil iniisip ko pa kung sino si Theo.

Nagtungo kaagad kami sa kwarto ni Theo sa taas. Pagkabukas ni Adrianna ng pinto ay nakita ko kaagad ang mga pambatang laruan. Mga laruang panlalaki iyon. Mga maliliit na laruang sundalo, mga sasakyan saka iba pa.

Ang mga unan at kumot naman ay may disenyo ng mga kilalang cartoons, ganoon din ang kurtina.

"Sino si Theo?" hindi ko na napigilang magtanong.

"Anak ni sir Alex. Three years old na siya" sagot ni Adrianna saka nagtungo sa isa pang pinto.

'Oh! May anak na pala si sir Alex? Hindi ko inaasahan iyon'

Sumunod ako kay Adrianna papasok sa walk in closet ng bata. Kumuha si Adrianna ng comforter kaya kumuha naman ako ng bagong kurtina. Maingat kong inayos ang kurtina habang si Adrianna naman ay inaayos ang higaan ng anak ni sir Alex.

"Bakit pa ngarod nagde-delusional si Sheena kay sir Alex? E, may asawa na pala siya" ani ko sa gitna ng pag-aayos ng kurtina.

Hindi makapaniwalang tumingin sa akin si Adrianna, "Tatiana, wala pang asawa si sir Alex. Hindi mo ba iyon napansin noong nakaraang linggo?"

Umiling ako, "Hindi, hindi ko naman kasi alam na may anak na si sir Alex kaya hindi ko rin naisip na may asawa siya"

'So....single dad si sir Alex?'

Curios tuloy ako kung anong hitsura at anong klaseng babae ang naanakan ni sir Alex. Sa dinami-dami ba naman ng babaeng nagkakandarapa kay sir Alex ay ito ang nakakuha ng atensyon ni sir. Ang ipinagtataka ko rin ay kung bakit hindi sila nagkatuluyan ni sir Alex.

Bahagya akong umiling para maalis ang napakarami kong katanungan. Huminga ako ng malalim.

'Tatiana, hindi ka pinunta dito para sumagap ng chismis'