CHAPTER 5

"H-Hindi po, Sir. M-May naalala lang po ako b-bigla. Hindi ko po kayo p-pinagtatawanan," kaagad kong paliwanag dahil baka mas lalo pa siyang ma-badtrip sa akin.

Ilang segundo niya muna akong tinitigan bago siya nagpatuloy sa pagkain. Ako nama'y mas napili ko na lang manahimik at hindi makagawa ng anumang ingay dahil baka mabulyawan na naman niya ako.

Ultimo pagnguya ko pati ang pagsandok ko ng pagkain ay dahan-dahan din dahil ayaw ko na naman siyang ma-beast mode.

Dahil sa nangyari ay sobrang tahimik ng buong paligid habang kami ay kumakain. Hindi na rin ako nagtangka na nakawan siya ng tingin at mas napili ko na lang ibigay ang buong atensyon ko sa aking kinakain kahit na ang totoo ay kating-kati na akong masulyapan muli siya.

Napaangat lang ako ng tingin nang marinig ko ang paggalaw ng kanyang upuan at nang magtama ang aming mga mata ay nakatayo na siya.

"Clean my room when you are already done with everything that you have to do. I'm just going to work out," seryoso niyang saad habang naiwan sa ere ang pagsubo ko.

Imbes na magpatuloy ako sa pagkain ay mas napili kong pagmasdan siya mula sa kanyang likuran hanggang sa tuluyan na siyang mawala sa aking paningin.

Nang mapabaling ang tingin ko sa malaking mangkok na may laman lang kanina na chicken curry ay hindi na ako nagulat nang makita kong wala ng laman iyon. Sa tuwing ipinagluluto ko talaga si Greg ay palagi niyang nauubos lahat kaya naman enjoy na enjoy din akong lutuan siya.

Napangiti na lang ako ng malungkot at napahinga muna ako ng malalim bago ako nagpatuloy sa aking pagkain at ilang sandali nga lang ay naramdaman ko na lang ang sunod-sunod na pagtulo ng aking mga luha mula sa aking mga mata pababa sa aking magkabilang pisngi.

Bago ko pa planuhin ang lahat ng ito ay alam ko ng mahihirapan talaga ako ng sobra at hindi nga ako nagkamali dahil ilang araw ko pa lang dito ay ganito kabigat na ang nararamdaman ko araw-araw sa tuwing naiisip ko ang mga nangyari sa amin pati na rin ang sitwasyon namin ngayon.

Gustuhin ko mang bumalik na rin kami sa dati lalong-lalo na ang mga alaala niya ngunit hindi pwede dahil maaaring mapahamak na naman siya at baka malagay lang sa alanganin ang kalagayan niya at iyon ang hinding-hindi ko na kakayaning mangyari dahil baka makapatay na talaga ako.

Ang tanging mga magagawa ko na lang muna sa ngayon ay ang magtiis, huwag sumuko, at mas lalo pang patatagin ang aking loob habang binabantayan ko siya. Mas pagbubutihan ko rin ang pagpapanggap ko para patuloy ko lang siyang makasama kahit hindi niya pa ako maalala. Ang pinakaimportanteng bagay lang sa akin sa ngayon ay ang makasama siya at hindi na ako makapaghintay na matapos na ang lahat ng ito dahil kong sa huli ay magiging okay din ang lahat.

Kahit na umiiyak ako habang kumakain ay nagawa ko pa ring ubusin ang pagkain ko. Hindi rin ako natakot na baka mahuli ako ni Greg na umiiyak dahil kapag nag-wo-workout na siya ngayon ay parang wala na siyang pakialam sa paligid. Hindi katulad noon na gustong-gusto lagi niya akong makasama mag-workout.

Nang makainom na ako ng tubig ay tumayo na rin ako upang iligpit ang aming mga pinagkainan at nang masalansan ko na ang mga iyon ay pinunasan ko muna ang lamesa at inayos ang mga bangko bago ko na dinala ang mga iyon sa kusina.

Pagkatapos kong ilapag lahat sa lababo ay nagsimula na rin akong ipasok isa-isa ang lahat sa loob ng automatic dishwashing machine at imbes na magpahinga muna ako kahit isang sandali matapos kong pindutin ang start at normal button ay mas napili kong dumiretso sa laundry area upang kumuha ng malaking basket na paglalagyan ng lalabhan kong bedsheets and pillowcases ni Greg.

Kumuha na rin ako ng pamalit na bedsheets at pillowcases at pagkatapos ay umakyat na ako upang magtungo na sa kanyang silid para makapagsimula ng maglinis.

Pagkabukas na pagkabukas ko ng pinto ay kadiliman ang bumungad sa akin kaya naman mabilis kong pinindot ang switch ng ilaw. Pinindot ko na rin ang switch para bumukas ang malalaking kurtina sa kanyang silid upang mas magbigay pa ng liwanag at nang maging okay na ay nagsimula na rin akong maglinis.

Ang una kong ginawa ay pinagpagan ko ang mga pwedeng pagpagan sa loob ng kanyang silid lalong-lalo na sa shelves niya gamit ang dust remover. Nang matapos ako doon ay tinanggal ko naman cover ng kanyang kama at unan at pagkatapos ay inilagay ko na rin ang mga dala kong pampalit na comforter at pillowcases.

Nang natapos ako sa pag-aayos ng kama niya ay nakapag-decide naman akong mag-vacuum upang mawala na rin ang lahat ng dumi at kalat sa kanyang sahig dahil balak kong mag-map.

Kaagad din naman akong naglampaso ng sahig nang matapos ako sa pag-vacuum kahit na nakakaramdam na ako ng pananakit ng katawan.

Hindi pa ako nakuntento dahil pagkatapos na pagkatapos kong mag-map ay ang banyo naman niya ang nilinisan ko.

Tuloy pa rin ako sa pagkuskos ng inidoro kahit na ramdam na ramdam ko ang pagtulo ng aking mga pawis mula sa aking noo.

Ilang minuto rin ang itinagal ko sa paglilinis ng kanyang banyo dahil sa laki at lawak nito at ginawa ko talaga ang lahat para lang mapabilis ang paglilinis ko dahil alam kong ilang minuto mula ngayon ay matatapos na siya sa pag-wo-workout at siguradong-sigurado akong dito ang diretso niya para mag-shower.

Nang masigurado kong malinis na ang kanyang buong silid pati na rin ang buong banyo niya ay muli kong pinindot ang switch ng ilaw at kurtina bago ko binuhat ang mga dala kong basket, vacuum, at map para lumabas na kahit na medyo hinihingal na ako dahil sa bilis na paglilinis na ginaw ko.

Akmang aabutin ko na ang doorknob nang nasa harapan na ako ng pinto nang bigla na lang bumukas ito na naging dahilan upang matulak ako ng pinto paatras at upang malaglag din ang mga buhat-buhat ko dahil na rin sa pagkagulat at dahil napalakas ang pagkakabukas ng pinto at natamaan ako ay nawalan ako ng balanse ngunit bago pa ako tuluyang mapasalampak sa sahig ay naramdaman ko na ang paghila sa akin pataas ni Greg upang hindi ako mag-diretso na mas lalong nagpabilis ng tibok ng aking puso.

At mabilis kong naramdaman ang pamumula ng aking pisngi nang ma-realize kong nakahawak na pala ang mga kamay ko sa hubad at matigas niyang dibdib.