Chapter 5

Naabutan ni Asha si Rowan na sinusuntok ang punching bag habang nakasalampak naman sa sahig si Lexi.

Pawisan na si Rowan pero hindi pa rin ito tumitigil, mas lalo lang nitong nilalakasan ang pagsuntok.

"Naglalabas ka ba ng sama ng loob?" tanong ni Asha saka pumasok sa loob. Napatingin sa gawi niya ang dalawa.

Itinaas ni Asha ang supot na dala, "Chocolates," sabi na at doon ay agad lumapit ang dalawa sa kanya at basta na lang kinuha sa kanya ang supot na may lamang chocolates.

"Salamat Ash!" sabi ni Lexi na agad nilantakan ang mga tsokolate. Pareho ng nakasalampak sa sahig ang dalawa kaya umupo na rin si Asha sa sahig. 

"Bakit nagba-boxing ka na ngayon? Pinayagan ka na ba ng doctor mo?" nagtatakang tanong ni Asha kay Rowan. 

Napatigil naman ito sa pagkain at napatingin sa mata ni Asha, bigla itong ngumisi at parang naintindihan na ni Asha ang sitwasyon kahit hindi nito sinabi. 

Napaikot ang mata ni Asha, "Pasaway ka talaga," tanging nasabi ni Asha. 

Natawa naman si Lexi at Rowan sa sinabi niya, "Hindi ka na nasanay sa kanya Ash," sabi ni Lexi na ngumunguya ng chocolate bar. 

"Aalis na ako Rowan, mag-ingat ka sa pag-alis mo," sabi ni Asha.

Saglit niyang nakita ang sakit sa mata nito pero kalaunan ay nawala rin. Napagdesisyonan nitong umalis ng bansa para na rin kalimutan ang ex nito.

"Yeah, hoping for a new journey," makahulugang sabi ni Rowan.

"Hindi ko kayo ma-gets, love life yata pinag-uusapan niyo eh," lukot na mukhang sabi ni Lexi.

Katulad ni Asha ay ayaw din nito sa relasyon, kaya ganito na lang ang reaksyon nito. "Hindi mo talaga maiintindihan hanggat hindi mo nararanasan," sabi ni Rowan.

"Hindi na namin kailangang intindihin dahil alam na namin, sayo pa lang alam na namin kung anong pwede naming sapitin sa relasyon relasyon na iyan," nakabusangot na sabi ni Asha. Kumuha na rin siya ng chocolate dahil pakiramdam niya masyado siyang bitter kaya kailangan niya ng sweetness ng chocolate.

"O'o nga, hindi na namin kailangan maranasan para lang maintindihan ka. Sapat na ang nakikita namin para matuto kami," dagdag pa ni Lexi.

"Tsk, baka mamaya bigla na lang kayong ma-in love. Wag kayong magsalita ng patapos," banta ni Rowan sa dalawang dalaga.

Hindi niya lubos maisip kung bakit ayaw na ayaw ng mga ito ang makipagrelasyon samantalang lahat ng babae gustong gusto ang kiligin at mahilig manood ng romantic movies.

Kakaiba talaga ang mga babaeng ito, napaka independent.

"Wag mo kaming igaya sayo, saka wag ka ngang magsalita ng ganyan. Si Natalie lang naman sineryoso mo sa lahat ng nakarelasyon mo," sabi ni Asha na ikinatawa naman ng malakas ni Lexi.

"Boom. Toasted," pang-aasar ni Lexi kay Rowan. Hindi naman naapektuhan si Rowan sa sinabi ni Asha dahil totoo naman talaga iyon.

Saka lang naisip ni Rowan na baka nga kinarma siya sa ginawa niyang pananakit sa puso ng mga babae noong hindi niya pa nakikilala si Natalie.

"Kinarma ka na sa ginagawa mo dati na halos araw araw kang nagpapalit ng babae," sabi pa ni Lexi habang natatawa.

Nalukot naman ang mukha ni Rowan pero hindi umimik. "Akala mo kung sinong expert eh," dagdag ni Asha. Kaibigan niya si Rowan kaya alam niya lahat ng baho ng lalaking iyon.

"Yeah, maybe this is my karma and I learned a lot of things out if it," seryosong turan ni Rowan. Natahimik naman si Asha at Lexi.

"Gaano ka katagal mamamalagi sa probinsiya?" tanong ni Rowan ng hindi na umimik si Asha. "Baka abutin ng linggo o buwan," sabi ni Asha. Hindi naman niya kasi alam kung talagang magugustuhan niyang magbakasyon.

Sanay kasi ang katawan niya sa pagod at puyat kaya paniguradong mahihirapan siyang mag adjust sa buhay sa probinsiya.

"Sana makatulong sayo ang pagbabakasyon para makalimutan mo na iyon," sabi ni Rowan. Rowan knows about Asha's nightmares.

Asha just smiled, hindi niya rin kasi alam sa sarili niya kung makakalimutan niya ba ang bangungot na iyon sa pamamagitan ng bakasyon.

"Gusto ko na nga sanang magbakasyon eh, kaso sabi ni Doctor Jace kailangan muna akong manatili rito," nalulungkot na turan ni Lexi.

May tama kasi ito ng baril sa tagiliran at ang spinal cord nitong napuruhan dahil sa malakas na paghampas ng matigas na bagay.

"Bakit nga pala nandito ka, di ba dapat nasa kama ka lang para gumaling yang likod mo," nag-aalalang sabi ni Asha at gaya ng ginawa ni Rowan ay nginisihan lang siya nito.

"Delikado yang sitwasyon mo----." Naputol ang sasabihin ni Asha ng marinig niyang may dalawang lalaki at babaeng pumasok sa gym kung nasaab sila.

"Hi Ash!" bati ng dalawang lalaking kakapasok lang at agad tumabi ng upo kay Asha sa sahig. Agad namang nainis si Asha sa presensiya ng dalawang asungot na si Easton at Drake.

"Ano na naman ginagawa niyo rito?" masungit na tanong ni Asha. Hindi pa niya nakakalimutan ang nangyari sa fast food chain nong isang araw.

"Grabe Ash, ang sungit mo naman," reklamo ni Easton na nakatingin na naman sa chocolates na nakakalat lang sa sahig. Umaatake na naman ang pagiging matakaw ni Easton, mambuburaot na naman yata.

"O'o nga, para namang others," dagdag ni Drake. Inikutan lang ito ng mata ni Asha.

"Kayong dalawang asungot kayo anong pakay niyo rito?" tanong ni Rowan na may halong pananakot.

Napalunok naman ang dalawa, kapag ibang tao na kasi ang kaharap ni Rowan at nag-iiba ang pakikitungo nito.

"Wala po, magba-boxing po talaga kami ni Drake," dahilan ni Easton na agad tumayo at hinila rin patayo si Drake para makipag spar dito.

"Hoy ano ginagawa mo?" nagtatakang tanong ni Drake. "Magboxing tayo o magpapabugbog ka kay Rowan?" mahinang bulong ni Easton. Agad namang naintindihan ni Drake ang sinasabi nito kaya kusa na itong kumuha ng boxing gloves at hinagisan ng boxing helmet si Easton.

 "Para saan ito?" tanong ni Easton. "Suot mo yan baka mahimatay ka sa lakas ng suntok ko," pagmamayabang ni Drake ikinalukot ng mukha ni Easton.

"Kapal ng mukha mo Drake, mas malakas kaya ako kaysa sayo," galit na sabi ni Easton at hinagis pabalik ang helmet kay Drake na nasapol sa mukha.

Natawa naman si Easton kaya ang dapat boxing na mangyayari nauwi sa habulan ng dalawang lalaking malaki nga ang katawan at mukhang lalaking lalaki pero isip bata naman.

"Bakit parang wala na akong tiwala sa mga nire-recruit ng headman?" hindi makapaniwalang tanong ni Jill.

"Tsk, takot lang niyan sa akin," mayabang na sabi ni Rowan at tumayo na para magtungo sa kinaroroonan ng dalawang lalaking naghahabulan pa rin.

Napangiti na lang si Asha sa kakulitan ng dalawa kahit naiinis siya. Parang nawawala ang sakit ng katawan at pagod niya dahil sa mga taong nakakasalamuha niya na nagbibigay ng magandang memorya sa kanya.