Kabanata 7

Kabanata 7

Ramdam pa rin ni Sapphire ang kirot sa palad niya pero mas matindi ang kirot sa dibdib niya sa inis at galit.

“Akala mo porke’t may pera ka, pwede mo ng bastusin ang kahit sino?” Pagalit na sabi ni Sapphire kay Daniel. "Pinsan mo siya at kuya pa pero kung umasta ka para siyang ibang tao. Wala ka talagang respeto!"

Sandaling natahimik ang paligid. Ang mga tao sa paligid ay nagsimulang magbulungan, at sa gitna ng mga ilaw ng hardin nakatayo si Daniel na tila hindi makapaniwalang sinampal nanaman siya ulit ni Sapphire. Lasing ang mga mata, namumula ang mukha, at mabigat ang hinga.

“Wala akong modo?” humalakhak si Daniel, sabay tungga ng alak mula sa basong hawak pa rin niya. “Tignan mo kung sino ang nagsasalita. Ang babaeng ipinagbili ng sarili para lang sa pangalan ng mga Palma!”

Napasinghap si Sapphire pero bago pa siya makapagsalita ay narinig niyang nagsalita si Kaiden na nakasakay sa kanyang wheelchair.

"Tumigil ka na Daniel, kanina ka pa. Nakakahiya na ang ginagawa at pinagsasabi mo!" Madiin na sabi ni Kaiden sa kanyang pinsan na si Daniel.

“Bakit? Nasaktan ba ang pride mo, kuya Kaiden?” balik ni Daniel, tumatawa pero nanginginig. “Kawawang bilyonaryo, niloloko ng sarili niyang asawa. Hindi ka na nga makalakad, bulag ka na nga din, mas lalo ka pang binubulag ng babaeng ‘yan!”

"Umalis ka na bago ko pa makalimutan na pinsan kita!" singhal ni Kaiden.

Humalakhak si Daniel, bahagyang natisod pero hindi pa rin tumigil. Iniinsulto niya pa rin ang pinsan niyang si Kaiden.

“Aba, marunong ka pa palang lumaban kahit gan’yan ka, kuya!” sabay sulyap kay Sapphire. “At ikaw—magaling ka ha. Akala ko mahinhin, pero marunong palang umarte. Magkano nga ba ang halaga ng kasal mo sa kanya?”

“Sapat lang para mapagtanto kong mas mataas pa rin ang dignidad ko kaysa sa ‘yo,” sagot ni Sapphire, hindi siya nagpatinag. Napansin niyang nanginginig ang mga kamay niya, hindi dahil sa takot, kundi sa pagpipigil ng emosyon.

“Daniel!” sigaw ni Caesar habang papalapit, halatang nainis na. “Tama na ‘yan. Lasing ka na, hindi mo na alam ang sinasabi mo.”

Pero imbes na tumigil, tumawa lang si Daniel. “Sige, ayusin mo ‘yang pinsan mo, Caesar. Baka akalain niyang dahil bilyonaryo siya, may karapatan siyang maging bida sa lahat ng eksena.”

“Paalisin mo na siya, Caesar,” madiin na sabi ni Kaiden. “Bago pa ako mawalan ng kontrol.”

At sa unang pagkakataon, nakita ni Sapphire kung gaano kalamig ang anyo ni Kaiden kapag galit, hindi ito sumisigaw, pero bawat salita niya ay parang yelo. Ang tensyon sa paligid ay parang huminto ang oras. Si Caesar na mismo ang humila kay Daniel palayo, habang patuloy pa rin itong nagbubunganga.

“Bitawan mo ko, Caesar! Hindi pa ako tapos!” sigaw pa nito pero hinila na siya ni Caesar ng tuluyan.

Nang tuluyang mawala ang mga ito sa paningin, bumalik ang katahimikan sa paligid. Maririnig mo lang ang malalalim na buntong-hininga ng ilang bisitang nakamasid mula sa malayo.

Tumikhim si Sapphire, tinikom ang mga labi, at piniling manahimik. Hindi niya alam kung dapat ba siyang humingi ng tawad o magpasalamat. Si Kaiden naman ay nakatingin pa rin sa direksyong pinag-alisan ni Daniel, ang kamao’y bahagyang nakasara.

“Hindi mo dapat pinatulan ‘yon,” mahinang sabi ni Sapphire.

“Hindi ko siya pinatulan,” malamig na tugon ni Kaiden. “Pinatigil ko lang.”

“Pareho lang ‘yon.”

Tumingin ito sa kanya, diretso, walang emosyon. “Hindi mo kilala si Daniel. Matagal na siyang ganyan. Nakasanayan niyang bastusin kahit sino.”

“Pero hindi ibig sabihin kailangan mong ibaba sarili mo sa level niya.”

“Hindi ako bumaba, Sapphire.” Bahagyang tumigil si Kaiden, saka marahang bumuntong-hininga. “Pinrotektahan lang kita. Ibig kong sabihin, nakakahiya sa mga bisita.”

Napalunok si Sapphire. Hindi niya alam kung anong sasabihin. Kanina lang ay parang may pader sa pagitan nila, ngunit ngayon, parang unti-unti itong nagkakaroon ng bitak.

“Salamat,” mahina niyang sabi.

Ngumiti si Kaiden, pero mapait. “Walang anuman. Pero ‘wag mong isipin na mabait ako.”

“Bakit hindi?”

“Dahil hindi ako mabait,” tugon nito agad. “Ginawa ko lang ‘yon dahil asawa kita. Responsibilidad ko.”

Napayuko si Sapphire, pero hindi maitatangging may kung anong init sa dibdib niya. Parang may kaunting alon na gumugulo sa loob niya tuwing ganito magsalita si Kaiden—malamig pero may tinatagong lambing.

“Baka nga mabait ka lang talaga,” mahina niyang bulong, halos pabulong sa hangin.

“Hindi,” tugon ni Kaiden, malamig pero may bahagyang pag-aalangan sa boses. “Hindi ako mabait, Sapphire. Kung hinahanap mo ‘yon sa akin, baka mabigo ka lang. Wala akong tiwala sa mga kagaya niyong babae. Mga manloloko at pera lang ang habol sa aming mga Palma.”

Tahimik. Walang nagsalita sa kanilang dalawa. Hindi na nagsalitang muli si Sapphire dahil nasaktan siya sa huling sinabi nito.

Ang tanging naririnig ni Sapphire ay ang malalim na paghinga ni Kaiden at ang mahihinang ihip ng hangin. Nararamdaman pa rin niya ang mabilis na pagtibok ng puso niya. Gusto niyang maniwala na mabait ito, pero natatakot siyang baka sa susunod na umaga, magbago na naman ito—maging muli iyong Kaiden na nanlalamig, nanlilibak, at nagtataboy.

Ngunit sa sandaling iyon, habang nakatingin siya sa lalaking halos ayaw umamin sa sarili niyang kabutihan, alam niyang may parte si Kaiden na hindi niya pa nauunawaan—at iyon ang mas nagpa-curious sa kanya.

“Kaiden…” tawag niya, pero hindi na niya itinuloy.

“Matulog ka na. Malalim na ang gabi.” Sabi ni Kaiden sa kanya at sinenyasan niya si Fred na ihatid si Sapphire sa kwarto nito sa hotel.

"Paano ang mga bisita?" Tanong ni Sapphire.

"Ako na lang ang bahala doon. Huwag mo na intindihin pa."

Tumango na lang siya, at bago siya tuluyang lumakad palayo, narinig niya ang mahina nitong bulong na halos di marinig, pero sapat para mapahinto siya.

“Hindi ko kayang makita kang ginaganun, Sapphire. Hindi ko alam kung bakit ganito?”

Napalingon siya pero dahil nakatalikod si Kaiden, dahan-dahang naglakad papasok ng hotel. Naiwan siyang ito sa labas, hawak pa rin ang dibdib, sinusubukang pigilan ang kakaibang tibok ng puso niya.

Sa unang pagkakataon ni Sapphire ay hindi niya alam kung mas natatakot siya sa galit ni Kaiden o sa kabaitang pilit nitong itinatanggi.