Kinabukasan ay maaga sila sa clinic ng OB-Gyne na kaibigan ng mga Falcon.  Sa hapon ay nasa hotel naman sila para asikasuhin ang kasal.  May meeting din itong pinuntahan na kasama siya.  Habang pauwi sila ay nakita niyang tumatawag sa telepono nito si Maddox.  Agad niyang iniwas ang mata."Yes, honey?" sagot nito na ikinasingkit ng mga mata niya.  "No, I can't tonight," wika pa nito na kung para saan ay hindi niya alam.  "I'll be there tomorrow morning."

Pagkatapos ng mahigit isang buwan ay ikinasal sila ni Anthony sa isang simbahan sa Dumaran. Sa Hacienda Falcon ginanap ang reception na dinaluhan ng maraming bisita na karamihan ay kasosyo sa negosyo at mga kaibigan ng pamilya Falcon. Ang tanging bisita lang niya ay ang ina at si Perly na umalis din kaagad pagkatapos ng reception. Naroon din si Maddox na hindi napigilang lumapit kay Anthony habang nakikipag-usap ang asawa niya sa isang kaibigan ng pamilya. Hindi pa rin mawala ang panibugho niya sa babaeng iyon dahil alam niyang matagal itong naging karelasyon ni Anthony.