Chapter 115

“Sigurado ka na bang talaga diyan Rekdi?” Tanong sa akin ni Eric pagkatapos nilang kumalma mula sa sinabi ko. “Baka nabibigla ka lang, pwede pa naman yatang umurong.”

“Oo nga naman Rekdi. Baka ma-miss mo niyan ang buhay binata ha.” Si Mike naman ngayon.

“Kilala n’yo ako guys, kapag ginusto ko ang isang bagay, ang ibig sabihin noon ay desidido na ako. At saka buntis na si Stacy, ilang buwan na lang ay lalabas na ang baby namin. Dapat lang naman siguro na isipin ko na ang pagpapamilya. Hindi na rin naman ako bumabata. Isa pa ay naiinggit ako sa inyo.”

“Naiinggit ka sa amin?” Tila gulat na tanong ni tatay Matt sa akin. “Aba’y ano ang kinaiinggitan mo sa amin? Ikaw nga diyan eh. Pwede mong gawin ang lahat ng gusto mo.”

“Nakakasawa din naman Tay Matt ang pagiging binata. Syempre tumatanda na rin ako, gusto ko rin na paggising ko sa umaga ay may makikita akon