Tahimik 4.1

Hayami’s POV

“Salamat nga pala sa mga libro. Hindi ko naman birthday pero salamat pa din,” nakangiti kong wika kay Sai habang sabay kaming naglalakad papunta sa classroom. 

Kanina kasi hindi ko nanaman naabutan si Grayson. Parang manok talaga ang lalaking iyon, ang aga lagi nagigising. Kulang na lang ay tumilaok siya sa umaga. 

Kaya ang ending mag-isa ko nanamang pumasok. Si Chloe naman hanggang ngayon wala pa. Kung akala niyo palaging maaga ‘yon, nagkakamali kayo.

Sa first day lang naman ‘yon palaging excited, ‘yong tipong sarado pa ang gate ng Western ay nag-aabang na agad sa entrance ng school pero kapag tatlong araw na ‘yan sa pagpasok asahan niyong nagbababad pa ‘yan sa bath tub kahit alas syete na ng umaga.

“Sus, wala ‘yon. Nalaman ko kasi kay Chloe na mahilig ka daw sa libro kaya naisipan kong bigyan ka,” wika naman niya habang nakalagay ang mga kamay sa bulsa niya. 

“Bakit mo nga pala ako binigyan? Sale ba ang bookstore?” Tumawa siya ng mahina at saka umiling. Inakbayan niya ako habang naglalakad kami kaya naman naaamoy ko ang mabango niyang pabango. Malamang pabango nga diba, kung hindi ‘yon mabango edi sana pabaho. Bobo lang Mimi?

“Friendly gift. Siguro pasasalamat dahil naging kaibigan kita.” Nginisian ko siya at saka ko tinanggal ang braso niyang nakaakbay sa akin. Aakyat na sana kami ng hagdan nang mapatigil ako sa tapat ng bulletin board sa tabi nito. Napahinto din siya sa paglalakad at tiningnan ang tinitingnan ko.

Nakalagay dito na ngayong araw ang election ng class officers at saka SSG officers.

“If you want to be a part of Supreme Students Government, kindly submit the following information to the principal office. Thank you. Halina at maging bagong taga-paglingkod ng Western Academy.”

Iyan ang nakasulat doon at sa baba ay mayroong nakalagay na name, age, grade, section, adviser and position you want. 

Taray! Parang deworming month lang, puksain ang bulate sa tiyan. 

“Ayus ‘yan ah. Sasali ka ba?” tanong ni Sai habang nakatingin sa akin. Nagpatuloy na lamang kami sa paglalakad at umakyat na ng hagdan. 

Ako? Sasali sa SSG? Baka campaign pa lang talo na ‘ko. Kung may boboto man sa akin ay siguradong si Chloe, Simon at si Gray lang, hindi pa sigurado si Gray. 

At saka kung gusto mong maging officer ng SSG, kailangan wala kang bagsak na grades. Eh puro palakol ang grades ko, magsisibak na lang ako ng kahoy kaysa tumakbo.

“Hindi ‘no. Ano ako, baliw? Wag na uy,” saad ko.

“Why not? Mukha ka namang magaling na pinuno ah,” wika naman niya. Sinamaan ko siya ng tingin. 

Hindi ko alam kung bino-boost ba niya ang self-esteem ko o nang-iinsulto lang siya? Kung siya kaya ang patakbuhin ko mula Western hanggang America.

“Gusto mo bang lumayas lahat ng estudyante sa Western Academy? Baka nags-speech pa lang ako sa stage, binabato na nila ‘ko ng itlog at b****a.” Natawa siya ng bahagya at nang makatungtong kami sa pangalawang palapag ng building ay naaaninag ko na ang naglalakad na bunot mula sa kalayuan.

“Chloe!” sigaw ko sa pangalan niya. Napalingon siya sa direskyon ko at lumawak ang ngiti, hindi ko alam kung dahil ba sa pagtawag ko sa kanya o dahil nakita niya si Simon. Kumaway ito sa amin kaya naman iniwan ko na si Sai at pumunta papalapit sa kanya.

“Good morning! Ano, handa ka na ba sa first task mo today?” Humalukipkip ako at taas noon ko siyang tiningnan. 

“I am born to be ready,” sagot ko sa kanya. Tumunog na ang bell sa corridor kaya naman pumasok na kami sa classroom na ngayon ay parang palengke dahil wala pa ang prof namin ngayong umaga. 

---------

“Magkakaroon tayo ng election for class officers. Ang ilan sa inyo ay nakikitaan ko na ng potensyal na maging pinuno. The nomination for Class President in now open,” wika ni Madam F* at nagsimula nang magsulat sa white board ng mga positions.

Ma’am, wala bang 69? Char.

Nagsimula nang magtaasan ng kamay ang mga kaklase ko. Paniguradong ang ino-nominate ng mga iyan ay mga kaibigan nila. 

Tss, naku! Alam na alam ko na ‘yang mga galawang ganyan, minsan may mga pagkakaibigan pang nasisira dahil sa nominate-nominate na ‘yan. 

“I nominate Vivian Bueno as Class President,” wika ni Eloisa at confident na confident pa. Ito namang si Vivian kunwaring hindi pa ine-expect ‘yon pero ang totoo gustong-gusto naman ng gaga. Hindi, hindi ako papayag na siya ang mamumuno sa klase namin! Hindi siya karapat-dapat.

Malakas ang loob kong tumayo kaya naman lahat sila ay nagsitinginan sa akin. Kung makatingin naman ang mga ito, parang ngayon lang nakakita ng maganda. 

“I nominate Grayson Xavier as Class President,” saad ko. Nakita ko ang pagtingin ni Gray sa direksyon ko na nagulat din. Si Vivian naman ay aakalain mong aswang sa paraan ng titig niya sa akin. Paniguradong sina-salvage na ‘ko nito sa isip niya. 

Sinulat ni Ma’am F* ang pangalan ni Grayson at saka Vivian sa white board. Ano ka ngayon babaeng mukhang kamatis ang buhok? Patago akong natawa dahil sa naging reaksyon niya at saka na ako naupong muli sa upuan ko.

“I am closing the nomination for the Class President,” wika ng isa kong kaklase at saka naupo.

Sunod naman ay Vice President, Secretary, Treasurer at ngayon naman ay Muse na ang pinagpipilian. Hinawakan ni Chloe ang braso ko at saka inilapit ang bibig sa aking tainga at may ibinulong.

“Ito na ang fisrt task mo, go na girl. Push mo ‘yan!” Tumango kami pareho at siya na ang nagtaas ng kanyang kamay.

“I nominate Hayami Wavyon as Muse.” Natahimik ang lahat sa loob ng silid na ito habang bakas sa kanilang mga mukha na hindi makapaniwala sa sinabi ni Chloe. May nakakagulat ba doon?

“Uhm, a-are you sure Chloe?” tanong ni Ma’am F*. Tinaasan ko siya ng kilay, grabe Ma’am bastusan? Bastusan? Hindi ba katanggap-tanggap ang hitsura ko sa pagiging muse?

Hindi niyo lang natatanong at hindi naman sa pagmamayabang pero sinasali ako noon ni Nanay sa mga beauty contest sa baryo namin ‘no.

Nakakapag-uwi pa ako ng pera, consolation price nga lang kasi hindi ako nananalo. Bulag kasi ‘yong mga judges.