Kabanata 21

Maximaze Park

Mabilis na natapos ang unang pagtutuos at ikinabigla ko iyon nang sobra. Hindi ako makapaniwala na hinampas lamang si makisig sa batok at hindi na ito nakabangon pa. Tulog na tulog kung kaya't nahihirapang ilabas ng circulo si makisig. Sa kabilang panig, si payat ay bumalik sa puwesto nito. Nagpapahinga siya at muling ibinabalik ang lakas na sinayang nito.

Akin lamang naisip, paano nalaman ni payat ang kahinaan nito sa napakaikling panahon? Hindi ko mawari kung paano, at dahil doon, ako ay nausisa kung paano iyon gawin. Malamang sa malamang, kailangang mabilis ka mag-isip at malawak ang iyong pagkakaunawa.

Pagkatapos manood ng unang laban ay hindi na ako nakaimik. Ako ay nakulong sa malalim na pagmumuni-muni. Lumalakbay ang barko ng aking isipan habang gustong kumawala ng aking puso sa kaba.

Ramdam na ramdam ko na may mangyayaring hindi kaaya-aya at ang aking tanging hiling, na sana ay hindi kasama si Ina sa kutob na iyon.