Kabanata 13.7

Kabanata 13.7

Pinasadahan ng tingin ni Jett si Arya mula ulo hanggang paa. Ngumuso siya. Nagsalubong ang kaniyang mga kilay. “Magpalit ka kaya muna ng damit bago tayo magpunta sa store ng kapatid ko?”

“Ano bang mali sa suot ko? Okay na ‘to sa akin.” Pinagpagan ni Arya ang oversized t-shirt niya. Nagtalsikan ang mga gabok mula roon.

“Kung alam ko lang na dadaan muna tayo sa site bago pumunta sa clothing store ni Diana, eh ‘di sana, pinagbaon kita ng damit. Hindi ko akalaing nagbubuhat ka rin ng mga CHB at semento. Ibang klase ka talaga,” ani Jett.

“Tinulungan ko si Lolo Rudy kanina habang binibilhan mo sila ng lunch. Kawawa naman eh. Biruin mo senior citizen na siya pero nagtatrabaho pa rin siya ng mabigat. Inalok ko siyang magtrabaho sa isa sa mga restaurant namin kaso tinanggihan niya. Okay na raw siya sa construction.” Bumuntong hininga si Arya. “Binibigyan ko siya ng pera pero ayaw niya ring tanggapin. Ang sabi pa niya, mas kailangan ko raw ang pera dahil mas bata pa ako sa kaniya.