16 Lavienne, Pt. 1/2

Wari ni Garreth ay ilang minuto na ang lumipas, pero hindi pa rin tumitigil sa kakahagalpak ng tawa si Aubrey matapos niyang sabihin rito kung sino at ano ang namagitan sa kanila ni… Ellaine Morrigan. 

Natatandaan na niya ang pangalan nito matapos niyang maengkwentro ito sa pangalawang beses at mabasa ang napakaraming impormasyon tungkol dito.

Nahalata kasi ni Aubrey na ang pagkikita nila nito sa hardin ay hindi ang unang beses. Napukaw ang kuryososidad at interes ng kaibigan niyang ito na malaman ang tungkol sa una nilang pagtatagpo at kung paano sila nagkakakilala.

Wala talagang balak si Garreth na sabihin ito kay Aubrey, pero dahil sa kababata niya ito at isa sa mga pinakanakakakilala sa kanyang ugali, walang epekto rito ang kanyang malamig na ekspresyon na siyang karaniwan niyang ginagamit bilang pang-iw