Chapter Nineteen

                       KINABUKASAN ay nagising ako dahil sa matinding sikat ng araw na tumatagos mula sa bintana ng aking silid. Kunot-noong nagpalinga-linga ako sa paligid upang hanapin si Thana ngunit hindi ko man lang ito nahagilap. Marahil ay maaga itong nagising. Baka sinadya niyang hindi magpaalam nang sa gayo'n ay hindi na maistorbo pa ang pag tulog ko.

Dali-dali akong bumangon at bahagya akong natawa sa aking sarili matapos kong mapagtanto na tanging kumot lang pala ang bumabalot sa aking buong katawan. Kaya naman nagmamadaling tinungo ko ang banyo.,

Nagbabad ako sa bath tub na naroon at muli kong sinariwa ang mga nangyari kagabi. Kapagkuwa'y inisip ko rin kung ano kaya ang magiging reaksiyon ni Thana kapag nagkita kami mamaya. 

Paano kong nadala lang pala siya sa bugso ng kanyang damdamin? Paano kung hindi niya ako magustuhan kapag muli akong nagtapat ng nararamdaman ko sa kanya?