CHAPTER 10

CHAPTER 10

Kahit pilitin ay hindi makatulog sila Bethy at Lea dahil rinig na rinig nila na sagutan sa pagitan ni Kendall at Ahron. Malapit lamang kasi sila sa kusina kaya hindi maiiwasan na marinig nila ito.

"Kendall, alam mo ba na nakakatanggap ako ng mga messages sa social media account ko ng dahil sa ginawa mo? Paano ang gagawin ko? Gugustuhin mo bang ipahamak ang sarili mong ama?"

"Dad, sorry na po! Hindi ko naman po intensyon na gawin 'yun, ang sabi lang naman po kasi sa akin, paghusayan ko lang naman po ang bawat eksena, wala naman po akong kinalaman sa bagay na 'yan!"

Hindi na tumalab ang sorry at ang nakakaawang mukha ni Kendall sa kanyang ama. "Alam mo gasgas na ang sorry mo na 'yan Kendall! Akala mo ba na hindi ko alam na walang iyakan nang magsagutan kayo sa swimming pool? Pero bakit ka pa rin umiyak?"

Pilit na nagpakumbaba si Kendall sa kanyang ama. "Dad, hindi po ba't kakasabi ko lang po, hindi ko po talaga intention na gawin 'yun pramis!"

"So paano ang gagawin natin ngayon? Baka may media na lumapit sa akin at magtanong kung kamusta ang lagay mo dito sa mansion natin?" tanong ni Ahron na nanlilisik na ang mga mata sa galit.

"Ako na po ang bahala sa kanila, idi-defend ko na lang po kayo just in case na siyasatin ng media ang tungkol sa pamilya natin!"

Pumalakpak naman si Ahron sa tuwa dahil sa sagot ng kanyang anak. "Very good girl, ganyan lang dapat anak! Ang pamilya, kahit kailan hindi sila dapat magsiraan sa bawat isa, dahil-"

"Ang kasiraan ng isang miyembro ng pamilya ay ang kasiraan nilang lahat!" pagdudugtong ni Kendall.

"Siya nga pala, nakausap ko na si Ma'am Madison at sinabi niya sa akin na may mga endorsements kang isho-shoot so kailangan natin umattend lalo na't natanggap ko na ang advance payment nila," pagpapaalala ni Ahron.

"Dad, may presscon nga po pala kami, sorry hindi ko nasabi kaagad!"

"Oh, anong oras naman yan?"

"10 am po, sa sm makati! Lahat po ng cast namin kailangan dumalo, pinopromote din po kasi ang mall and syempre publicity na rin po!"

"At anong oras naman kayo matatapos?"

"Not sure po eh!"

"Sige, kakausapin ko na lang si Madison tungkol sa bagay na yan!"

"Hind ho ba't naka schedule na ang mga endorsements ko?"

Napakamot sa ulo si Ahron bigla. "Yun na nga eh, mayroon kasing lumapit ulit sa akin na negosyante, grand opening kasi ng kanyang bagong resort sa laguna and gusto ka niyang mag concert doon para marami ang dumalo, hindi dapat ako papayag pero million kasi ang offer niya kasi naniniwala siyang dadagsain ng mga tao ang resort! Actually, hindi lang naman sa laguna ang resort niya kung hindi sa iba't ibang parte ng Pilipinas, ako na ang pumirma ng kontrata mo!"

"Dad, hindi naman po kasi ako singer so bakit ako po ang kukuhain niya?"

"Anak, makitid ba talaga ang utak mo? Sa tinagal mo sa industriya ng showbiz, mas pinapahalagahan nila ang sikat kesa sa talento... kaya kahit sintunado ang boses mo, basta't may fan base ka, hindi na nila mapapansin ang boses mo, wag kang mag-alala anak, wala mang pumalakpak sa pagkanta mo, ang mahalaga dito eh bayad tayo!"

"Si Steve po sana ang irerecommend ko, magaling na singer po sana siya and hindi po siya mapili sa offer!"

"Alam mo ang tanga tanga mo talaga! Bakit mo ibibigay sa iba ang trabaho kung sayo ibinigay? At tsaka makipag plastikan ka lang sa mga 'yan kasi sa showbiz kayo kayo lang din ang magkakalaban... gamitin mo naman ang utak mo anak!"

"Hindi naman po 'yun ang ibig kong sabihin, ang gusto ko lang sana may kasama po ako na isang singer para kahit papaano, mai-blend po ang boses ko sa iba and hindi naman pumanget ang maging performance ko!"

"Sus, hindi na tayo maghahanap ng kahati anak, sosolohin natin ang kita! Ang hirap hirap ng buhay ngayon. Kung gusto nilang rumaket, hayaan mo sila!"

"Sige po, pupunta na po ako sa kwarto ko!" pagpapaalam ni Kendall na pilit ang ngiti.

"Okay, basta tandaan mo anak, ang oportunidad, bihira lang dumating sa tao kaya sulitin natin, sige matulog ka na at marami pa tayong raket bukas!"

Pagtalikod ni Kendall ay naging malungkot na ang mukha nito hanggang sa pagdating niya sa kanyang kwarto. Naupo siya at pinagmasdan ang kalangitan sa kanyang bintana at nagbasa ng mga comments sa kanyang social media account. 'Hays, ang galing galing ni Kendall, parang totoong totoo ang eksana sa swimming pool! Ramdam na ramdam ko ang iyak niya, sayang matatapos na ang teleserye niya!' napangiti si Kendall at nagbasa pa ng ibang mga comments. 'Grabe, ibang level ang aktingan ni Kendall, bigyan na yan ng oscar award, talo niya ang mga sikat na hollywood actress dahil sa husay niya!'

"Sa sobrang ganda ng episodes ng teleserye ni Kendall, hindi ko namalayan na patapos na pala, sana may part 2!" "Nakakapagod mag work kasi nakaka stress, mabuti na lang talaga at walang kupas ang galing ni Kendall kaya nakakawala ng problema, pero infairness naman, mas maganda talaga siya kesa sakin. yung filtered photo ko walang panama sa kanya na umiiyak hashtag sana all!" Bagamat marami ang mga positive comments, hindi rin naman maiiwasan ang mga bashers na lumaliit sa kanya at pumupuna sa kanyang ama. "Tumataba ang katawan ni Kendall, sana yung utak din!"

"Malalaos din 'yang babae na yan, tingnan natin kung ano ang magiging kapalaran niyang babae na 'yan na hindi man lang nakagraduate sa elementary! Baka nga hindi pa yan marunong magbilang ng pera eh!" "Grabe, halatang halata sa iyak ni Kendall na totoong nangyayari sa buhay niya ang teleserye niya, baka siya na ang magiging Britney spear version ng pinas, justice for Kendall, masyadong inabuso ng sakim na ama!" Hindi napigilan ni Kendall ang luha na pumatak sa kanyang mga mata nang mabasa ito. Gustuhin man niyang mag reply, subalit natatakot siya sa maaaring gawin ng kanyang ama sa kanya sakaling ito ay kanyang mabasa. Itinigil na lamang ni Kendall ang kanyang ginagawa at nanalangin na sana ay muling magparamdam si Scott sa kanya at iligtas siya.