Chapter 5

Naputol ang pag-uusap naming dalawa ni Thaft nang may biglang kumatok sa pintuan.

"Mr. Mondino, si Nurse Karina po ito. Oras na po para sa gamot niyo!"

Mabilis na kinuha ni Thaft ang maliit na notebook sa ilalim ng unan niya. Pumilas ng papel at may sinulat na kung ano rito. Habang ako naman ay tumayo para sana buksan ang pintuan pero pinigilan ako ni Thaft.

"Bakit?" tanong ko. Pero hindi siya sumagot.

"Sir, papasok na po ako, ha?"

Bago pa man mabuksan ng nurse ang pintuan, mabilis na inabot ng mga kamay ni Thaft ang tali ko sa buhok. Tinanggal niya ito kaya naman sinamaan ko siya ng tingin.

Ilang oras kong inayos iyon tapos sisirain niya lang?

"Ay, may kasama pala kayo, Sir. Hello, ma'am!" Binati ako ng nurse kaya naman nginitian ko siya. Tumayo ako sa pagkakaupo sa kama ni Thaft at lumipat sa couch na nasa gilid lang.