Gusto na lang ni Graciella na bumuka ang sahig at lamunin siya nito. Ano ang pinagsasabi ng mahadera niyang tiyahin? At sa harapan pa talaga ng asawa niya ito sinabi.
Tumayo si Graciella at nilapitan ang tiyahin. Binulungan ito. “Ano ba ang pinagsasabi niyo, tiyang?” Bakas sa boses niya ang pagtitimpi sa kinikilalang kamag-anak.
Madalas naman na pinagbibigyan niya ang mag-asawa dahil na rin sa respeto bilang mga kumupkop sa kanya. Pero, ang hayagan siyang itulak sa mayamang kamag-anak ay kalabisan na para kay Graciella. Hindi na siya nakatiis.
“Ano ba ang sinabi ko?” Patay malisya na tanong ni Lupita. Nasa isip niya na kaya naman niyang manipulahin ang isipan ng pamangkin lalo at mabait naman si Graciella.
“Hindi pwede ang sinasabi niyo sa akin. Ano naman mapapala ng mayayaman sa akin? Alam ko sa sarili ko na pinagsikapan nila ang pagyaman nila. At saka isa pa kaya namin umangat ni Menard na magkasama. Wala na akong intensyon na maghanap pa ng iba.”
