CHAPTER SIX – Serious Talk

ICE’S POV

Mapula at may nakasalpak na cotton ang ilong ni Richard ng lumabas ng clinic. Agad ko siyang sinalubong.

“Ano ba ang nangyari at di mo nailagan yung bola?” Tanong ko sa kanya

“Wala. Distracted lang ako kanina” sagot niya

“Distracted saan?”

“Basta!” sabi niya habang kinakapa ang ilong

“Masakit?”

“Sa palagay mo?” sagot niya habang nakatingin sa akin.

“Sa palagay ko? Oo, masakit” pangiti kong sagot.

“Kasalanan mo ito eh”

Nagulat ako sa sinabi nya. “Huh? Paanong naging kasalanan ko?”

“Wala” maikli niyang sagot sabay lakad.

“Teka! Hintayin mo ako.”

Sinamahan ko si Richard pabalik ng kanyang room. Nasa basketball court pa ang kanyang mga roommates kaya walang tao ng dumating kami. Agad syang pumunta sa kanyang higaan at nahiga.

“Magbihis ka kaya muna? Natuyuan ng pawis yang damit mo” sabi ko sa kanya

“Mamaya na”

“Sige, alis na ako. Pupuntahan ko pa si Miguel sa study hall” Paalam ko sa kanya

“Teka! Pwede dito ka muna?”

“Bakit?”

“Wala lang. Malay mo, biglang may mangyari sa akin dito. Injured pa naman ako”

“Asus! Ano namang mangyayari sayo? Sige na nga, mamaya na ako aalis”

“Gusto mong kumain? May biscuit ako dyan” pag-anyaya niya

“Hindi busog pako. Nabusog ako doon sa siopao na binigay mo. Salamat pala.”

“Bakit ka pala nasa basketball court kanina?” Tanong niya

“Napadaan lang ako. Galing ako ng library may hinanap na libro.”

“Ahhh ganun ba? Sinong kasama mo?”

“Ako lang mag-isa”

“Sigurado ka? Mag-isa kalang?” paninigurado niyang tanong

“Oo. Bakit?”

“Wala naman”

Hindi ko alam kung anong nangyari pero biglang tumahimik ng ilang minuto. Hindi na sya nagsalita.

“Kumusta na ang ilong mo? Masakit paba?” tanong ko

“Hindi naman na masyado” sagot niya “Ice, diba sabi mo wala kang girlfriend at hindi kapa nagkakagirlfriend?”

“Oo, bakit?”

“Na-inlove kana ba?”

Hindi ko agad sinagot ang tanong niya. Hindi ko din kasi alam kung paano sagutin. Sa babae, hindi pa ako na-inlove. Sa lalake? Ngayon palang. Pero hindi ko rin sigurado kung love naba itong nararamdaman ko o paghanga lang.

“Hindi ko alam eh. Ano ba ang pakiramdam ng in-love? Paano mo ba malalaman kung love naba iyon?” sagot ko

“Siguro pag naramdaman mong special na sya para sayo. Yung unang kita mo palang may special kanang naramdaman para sa kanya. Yung masaya ka kapang nakikita mo sya at nakakasama. Yung hindi mo namamalayan na parang nasasaktan ka kapag may nakita kang kasama siyang iba. Para sa akin, yun nayun.”

Hindi ako nakakibo sa mga sinabi ni Richard. Yun na yun din ang nararamdaman ko ngayon para sa kanya.

“Ice, paano kung may mahal ka, tapos naramdaman mong may mahal ka ring iba. Ano ang gagawin mo?” Tanong uli ni Richard sa akin.

“Siguro titimbangin ko kung sino ang mas mahal ko sa kanilang dalawa.”

“Papakawalan mo yung isa?”

“Oo, para hindi na sya masaktan pa. Ganun naman dapat diba? Piliin mo kung sino ang mas mahal mo.” Sagot ko

“Paano kung ang mas mahal mo ay yung taong hindi mo dapat mahalin? Susugal kaba?”

“Oo, susugal ako”

“Hahit na alam mong maraming hahadlang?”

Napatingin ako sa huling tanong nayun ni Richard. Hindi ko din alam. Susugal ba ako? Nagkatinginan kami ni Richard ng biglang bumukas ang pinto at pumasok ang kanyang mga roommates.

“Oh Richard, kumusta na ang ilong mo? Pretty boy andito Kadin pala” sabi ng isa

“Ayos na. Hindi na masyado masakit” sagot ni Richard

“Sinamahan ko lang siya saglit habang hinihintay kayo. Aalis nadin ako at may nag-aantay din sakin sa study hall” paalam ko sabay labas ng kwarto.