CHAPTER 2

Hindi ko alam na ang BGC pala ganun kaganda sa personal. Akala ko sa picture lang.

Pagbaba ko ng bus sa may Market, parang ibang mundo. Lahat mataas — building mataas, tao mataas, pati kilay nung babae sa harap ko mataas. Ako 5'0 lang, dala pink na maleta na sira na gulong kaya kinakaladkad ko na lang. Pawis na pawis na ako, pero ang bango pa rin ng paligid. Amoy aircon kahit nasa labas.

Naka red dress ako nun, yung best dress ko na binili ni Mama sa ukay sa Lipa, 150 pesos lang. Tapos nag heels ako. First time ko mag heels. Size 6, beige, nabili ko sa bangketa sa Lipa, 299 pesos. Sabi ni ate sa tindahan matibay daw, pang BGC daw.

Hindi pala.

Lakad ako papuntang High Street, dun daw kasi office ni Ninong Caleb sabi ni Ninong Boy. May binigay syang address na sulat kamay lang: "BGC, tapat ng Starbucks na malaki." Eh lahat ng kanto may Starbucks.

Hawak ko yung maliit na cactus na nasa paso, binalot ko sa dyaryo. Galing to sa Christmas party namin sa school, yun yung bunot ko. Sabi ko ibigay ko kay Ninong, kasi parang sya eh — matinik sa labas pero buhay pa rin kahit di dinidiligan.

Tapos yung pink na Tupperware, andun sa maleta, may lamang adobo na niluto ko kaninang 4am. Panis na ata kasi ang init sa bus pero okay lang, sayang eh.

Habang naglalakad ako sa High Street, naririnig ko tik-tak ng heels ko. Tik. Tak. Tik. Tak. Feeling ko ang tangkad ko na. Feeling ko bagay na ako sa BGC.

Hanggang sa...

_Pak!_

Natapilok ako. Hindi lang tapilok, natanggal yung takong. Yung left na heels, naiwan yung takong sa may butas ng sidewalk. Yung paa ko dumulas.

Tumumba ako. Hindi yung pa cute na tumba. Yung bagsak talaga na parang sako ng bigas. Yung cactus na hawak ko, nalaglag pero buti nabalot sa dyaryo kaya di nabasag. Pero yung maleta ko, bumukas, lumabas yung Tupperware.

Nakahiga ako sa gitna ng High Street, naka red dress, isang paa naka heels, isang paa nakamedyas lang na may butas.

Lahat ng tao tumingin. May babae na naka blazer, maputi, ang tangkad, naka size 7 na heels na ang kinis. Sya si Reese, pero di ko pa alam nun.

Tapos may lalaki na mabilis naglakad palapit.

Si Caleb.

Pero hindi yung Caleb na naka UST shirt na yellow at maong na punit. Naka black na polo, naka slacks, may ID na "ARCHITECT - DE GUZMAN". Malinis, mabango, yung buhok nya naka ayos, hindi tulad dati na parang kakagising lang sa ilalim ng mangga.

Tumigil sya sa harap ko. Tinitigan nya ako. Yung mukha nya... nagulat.

"Amara?"

Gusto ko lumubog sa lupa. Kasi yung adobo ko tumapon konti sa takip ng Tupperware, amoy na amoy na.

"Ninong..." sabi ko, mahina lang. Nahihiya ako tumayo kasi kita butas ng medyas ko.

Hindi sya lumuhod tulad dati nung 10 ako. Nanatili syang nakatayo. Tapos may nagsalita sa tabi nya, yung babaeng matangkad na naka blazer.

"Cal, who is she? Yung guard ba sa baba?"

Si Reese yun. Ngayon ko lang nalaman.

Sabi ni Caleb, "Ah, inaanak ng Tito Boy. From Lipa."

Inaanak ng Tito Boy. Hindi nya sinabi na "yung pang 51." Hindi nya sinabi na special.

Tumayo ako mag isa, kinuha ko yung takong na natanggal. Pinagpag ko dress ko. Yung tuhod ko may gasgas, dumudugo konti.

"Okay lang ako Ninong, may inaayos lang ako dito," sabi ko, pilit ngumiti. Yung ngipin ko dati may kulang, ngayon may braces na pero parang mas nakakahiya pa.

Tumingin sya sa cactus na hawak ko pa rin kahit nahulog na ako.

"What's that?" tanong nya.

"Ah, para sayo sana. Cactus. Kasi matibay, kahit di diligan..."

Hindi nya kinuha. Parang nandidiri pa sa dyaryo na pambalot.

"Amara, I'm in a meeting. Nasa rooftop bar kami. Iwan mo na lang sa guard."

Tapos umalis na sila. Si Reese, bago umalis, tinignan pa heels ko na sira. Hindi nang asar, pero yung tingin na parang naawa. Mas masakit pa yun kesa mang asar.

Naiwan ako dun sa High Street, hawak yung isang takong, isang cactus na may dyaryo, at Tupperware na may tumatagas na adobo.

Umupo ako sa gilid, tinanggal ko na lang pareho heels ko. Nag paa na lang ako. Mas komportable pa.

Dun ko naisip, tanga ko pala. Akala ko pag punta ko ng BGC, magiging BGC girl din ako. Akala ko pag nag heels ako size 6, magiging size 7 na ako tulad ni Reese.

Hindi pala. Pandak pa rin ako. Pang 51 pa rin ako na naiwan sa pila.

Pero hindi ako umiyak. Kasi yung adobo, sayang eh. Kahit panis na, kinain ko pa rin dun sa gilid habang nakayapak. Kasi galing pa Lipa yun.

At habang kumakain ako, tumutulo yung aircon galing sa taas ng building ni Caleb. Yung aircon na pang BGC, yung malakas, tumutulo sa balikat ko.

Yun pala yung simula ng tagas.