Chapter 9

Chapter 9

            Ipinarada ni Amara Stephanie ang kanyang sasakyan sa harap ng mansion ng hipag niya na nasa loob ng exclusive village ng Northshire town. Maraming kotse na nakasampa sa Bermuda grass pati na rin sa parking space. Dinig na dinig niya ang pambatang tugtog at sigawan ng mga bata na nagmumula sa hardin ng mansion.

            Kinuha niya ang malaking paper bag bago siya bumaba sa kanyang kotse. Sinalubong siya ng isang kasambahay ng mga Rocc at iginiya siya sa garden ng mansion. Bibong-bibo na tumakbo papunta sa kanya ang birthdays celebrant na si Sevi.

            “Tita!” maligalig nitong wika at agad na kumunyapit sa kanyang hita bago siya tiningala at kumurap-kurap ang bata.

            “Happy birthday,” she greeted and kissed her nephew’s forehead. 

            Hinawakan ni Sevi ang dala niyang paper bag at ngumisi sa kanya. “Is this for me?”

            Tumango siya at tuluyang inabot dito ang regalo. Tuwang-tuwa ito at gusto na sanang buksan kung hindi lang pinigilan ng ate niya.

            “Sevi, mamaya ka pa mag-oopen ng gift. Ilagay mo na iyan doon sa may table para sabay-sabay.”

            Tutol man, sumunod na lang ang bata nang panlalakihan ito ng mata ni Neshara. Humalik pa sa pisngi niya si Sevi bago ito tumakbo patungo sa mesa kung saan nakalagay ang mga regalong natanggap nito.

            Inaya siya ng kapatid sa mesa. Hindi pa nagsisimula ang children’s party dahil hindi pa dumarating ang cake na inorder ni Sebastian.

            Nakuha pang bumungisngis ni Neshara nang sabihin sa kanya na inis na nagsumbong ang ama nila dahil nakita raw siya nito na kasama si Nexus.

            Overacting talaga ang papa niya.

            “Sabi ko, baka chance mo na na ayusin ang love-life mo.”

            Marahas siyang napalingon sa kapatid. “Hindi ko kailangan ‘yan.”

            Tumawa ito at isinukbit ang isang kamay sa braso niya.

 “Bakit hindi mo subukan, Baby Sis. Kasi naniniwala ako na palaging may second chance. Kasi di ba kami ni Sebastian nagkahiwalay naman kami tapos nagkaroon ng second chance. Tingnan mo masaya na kami ngayon.”

            “Hindi tayo pareho,” iling niya. “He has a valid reason at marunong tumupad ng pangako si Sebastian.”

            Noong college kasi ang ate niya, nabuntis ito ng ka-schoolmate nito na si Sebastian Rocc. Ang nag-iisang anak ng mayamang nagmamay-ari ng isa sa mga pinakasikat na pharmaceutical company sa bansa. Ang alam niya, dakilang gago no’n si Sebastian na napatino ng ate niya.

            Iyon nga lang, gago pa rin dahil iniwan ang ate niya nang walang sinabing dahilan. Makalipas ang ilang taon, bumalik ang lalaki at nagpaliwanag.

            “Bakit si Nix, hindi?”

            “Hindi. Hindi iyon marunong tumupad ng pangako.”

            “Kahit minsan?” kulit pa rin nito na hindi na niya sinagot.

            Lihim siyang nakahinga nang maluwag nang lumapit sa kanila si Sebastian para sabihin sa ate niya na dumating na ang cake na inorder nito.

            Kinuha niya ang cellphone sa loob ng kanyang bag upang tingnan kung may text ba sa kanya si Nexus o kahit si Ali o kaya si Rex. Subalit, katulad nang nagdaang dalawang buwan, wala man lang siyang natanggap kahit isang tuldok mula sa mga ito.

            Dalawang buwan na rin ang nakalilipas simula nang umalis si Nexus sa hacienda para pumunta sa Maynila para sa therapy nito. Unang buwan ay walang palya ang pagtawag ni Nexus. Nag-uusap sila sa pamamgitan ng video call kahit nagtatrabaho siya o kaya hanggang sa pagtulog niya.

            Ngunit nang sumunod, ay hindi na. Patext-text na lang ito hanggang sa wala na talaga.

            Katulad nang ilang beses, nagtipa siya ng mensahe ngunit mabilis niya rin lang binubura. Inuunahan siya ng pride niya.

            Pinatay niya ang kanyang cellphone at ibinalik sa loob ng dala niyang shoulder bag. Napatingin siya sa dalawang lalaking nagpapasok ng cake na may tatlong layer. Kasunod ng mga iyon ang mag-asawang Rocc kausap ang isa pang lalaki na pamilyar sa kanya.

            Napatayo siya nang maalala kung saan niya nakita ang lalaking iyon. Iyon ang waiter sa bar na pinuntahan niya dati. Iyon ang waiter na nagbigay ng inumin sa kanya na nag-uwi sa kanya sa kapahamakan.

            Malalaki ang hakbang na nilapitan niya ito. Gulat pa ang ate niya nang humarang siya sa daan ng mga ito.

            “Steph, magsisimula na ang party. Saan ka pupunta?”

            Mas dumiin ang titig niya sa lalaki na nanlalaki rin ang mga mata. Mas lalo niyang nakumpirma na may alam nga ito.

            “Kakausapin ko lang ‘to,” wika niya at pasimpleng dinaklot ang kwelyo ng lalaki.

 Hindi na nakapalag pa si Sebastian at Neshara nang malakas niyang kinaladkad palabas ng garden ang lalaki.

            Nang masiguro niyang hindi na sila tanaw ng mga bisita sa garden, malakas niyang itinulak sa pader ang lalaki at idiniin ang kanyang siko sa lalamunan nito.

            “Remember me?” marahas na tanong niya.

Mas nanlalaki ang mga mata nito nang idiniin niya ang kanyang tuhod sa p*gkalalaki nito. Pipisain niya ang itlog kapag nagkamali ng sagot sa kanya.

            “H-Hindi ko alam ang sinasabi mo.”

            Mas diniinan niya ang pagkakalapat ng siko niya sa lalamunan nito. “Alam mo bang dahil sa ibinigay mo sa akin na inumin, nasira ang buhay ko. Sabihin mo sa akin kung sino ang nag-utos sa ‘yo na ibigay sa akin ang inumin na ‘yon?”

            “W-Wala.” Nahihirapan na itong huminga at halos magkulay violet na ang labi.

            “Maling sagot,” gigil niyang wika at umigkas ang kanyang kamao pasikmura na ikinaingit ng lalaki.

            “Tita!” tawag ni Sevi na tumatakbo.

            Nilingon niya ang bata kaya nakakuha ng pagkakataon ang lalaki na alisin ang ang kanyang kamay sa pagkakasakal niya. Naitulak siya nito kaya mas lalo siyang napikon.

            “Don’t push my Tita!”

            Dinaklot niya ang kamay ng lalaki at pinilipit iyon bago palihim ngunit malakas na sinikmurahan ulit. 

            “Sevi, go back to your mom. Susunod ako.”

            “Are you in trouble. Tatawagin ko si Daddy.” Kumaripas ng takbo paalis ang pamangkin. 

            “Sumagot ka ng maayos. Sino ang nag-utos sa ‘yo na ibigay sa akin ang inumin na may droga two years ago?”

            Nakita niya si Sebastian na papalapit kaya binitawan niya na ang lalaki. Kandaubo itong sumalampak sa sahig.

            “Hindi pa tayo tapos,” mariin niyang banta bago siya naglakad pasalubong sa mag-asawa.

            “May problema ba, Tep?”

            Umiling siya kay Sebastian at hinila ito pabalik sa garden.

            Awtomatikong hinanap ng kanyang mga mata ang kapatid. Nakita niya itong kasama ang mga magulang ni Sebastian. Nakangiti ang mga ito habang pinagmamasdan si Sevi na kumikislap ang mga mata sa tuwa habang nakatingin sa cake nito.

            Huminga siya ng malalim at piniling huwag sirain ang magandang mood ng ate niya. Makapaghihintay naman ang impormasyon na kailangan niya.

            Hindi na niya muling nakita ang dating waiter hanggang sa matapos ang children’s party. Mas mabuti na iyon dahil mas maalala niya lang kung paano nagsimulang gumuho ang buhay niya. Party ng mga negosyante ang sumunod. Siya ang nag-akyat sa tulog na tulog na si Sevi sa kwarto nito dahil busy ang kapatid niya at si Sebastian sa pag-estima ng mga bigating bisita.

            Inalisan niya ng sapatos si Sevi at hinaplos ang buhok na nakatabing sa noo nito. Lumamlam ang kanyang mga mata habang nakatingin sa pamangkin. Siguradong magka-close sana si Sevi at ang anak niya kung hindi lang namatay.

            Nang masiguro niyang maayos ang bata sa kinahihigaan nito, bumalik na siya sa garden para magpaalam sa kapatid na uuwi na. Maraming mga negosyante sa hardin, mga mukhang bigatin at kagalang-galang. Subalit, isa lang ang umagaw ng atensyon niya.

            The woman on her red dress is smiling at the man beside her. Nakaangkla pa ang braso ng babae sa lalaking iyon at parang linta sa pagkakadikit ng katawan.

            Nang nahagip siya ng tingin ng babae, tumaas ang sulok ng labi niya para sa isang patuyang ngisi.

            The woman is Angel Love Sedeno, Nexus’ fiancée.