Chapter 2

Matapos ang isang linggo, may client na ulit agad si Alora.

Pinagdadasal niya, kahit suntok sa buwan, na sana maging kagaya din ito ng huli niyang client. Buong magdamag lang silang nagkwentuhan at binigyan pa siya ng malaking tip. dinalaw niya kinabukasan ang kapatid niya sa ospital, at tuwang-tuwa si Arhon nang makita ang ate niya. Ibinalita pa ng nurse na bumubuti na lalo ang kalusugan nito.

"Room 666..."

Gaya ng kinagawian, iyon ang bungad sa kanya ng receptionist pagkarating niya sa premises ng Call Girl. Mabigat na agad ang kutob niya sa malas na numero pa lang. Sa kabila niyon, nagpatuloy pa rin siya sa paglakad hanggang sa makapasok ng elevator.

Pinindot niya ang 6th floor. Ilang segundo lang, narating na niya ang pakay. Tahimik siyang naglakad sa hallway. Kung noong nakaraan ay naka-pula siya, ngayon naman ay itim na itim ang kanyang suot hanggang sa kanyang stilettos, kaya mas lumabas pa ang kaputian at kakinisan ng kanyang balat.

"What are you waiting for?!"

Saka lang naputol ang pagkatulala ni Alora. Isang hindi pangkaraniwang babae ang tumambad sa kanya. Saksakan ito ng ganda mula ulo hanggang paa. Perpekto ang pagkahugis ng mukha nito, at mala-diyosa ang tindig. Nakakaakit—iyong tipong hindi mo pagsasawaang tingnan kahit gaano pa katagal. Ang pagkahulma sa katawan nito ay parang ginawa ng isang matayog na sculptor. Ito ang tipo ng babaeng pag-aagawan ng mga kalalakihan at kaiinggitan ng mga kababaihan. Napaka-expensive ng aura niya, mabango, at sopistikado.

Pakiramdam ni Alora, namali siya ng kwartong napasok.

"S-sorry, I think I got the wrong room," akmang lalabas na sana siya, pero agad siyang nahapit sa braso ng babae.

"You are exactly at the right place, honey," sabay hila sa kanyang batok at sunggab ng isang mapaghanap na halik sa kanyang mga labi.

Para kay Alora, mas masakit at mas mapang-angkin ang karanasang ito kaysa sa pakikipagtalik sa isang lalaki.

Nang matapos ang buong magdamag niya sa piling ni Zephy, agad siyang umuwi. Pagdating sa bahay, ibinaba lang niya ang kanyang bag saka direstong nagtungo sa banyo. Hindi pa man nakakapaghubad, pinihit na niya pabukas ang shower. Kasabay ng pagbagsak ng malamig na tubig sa kanyang mukha ang marahas na pagpikit ng kanyang mga mata.

Kiniskis niya gamit ang kanyang mga kamay ang bahagi ng kanyang leeg na animo'y duming-dumi, hanggang sa marahas niyang hubarin ang basang saplot upang buong katawan naman ang linisin. Nasusuka siyang maalala kung paano siya inangkin ni Zephyra—isang babae na kagaya niya. Nadidiri siya sa sarili.

Ito ang kauna-unahang pagkakataon na na-involve siya sa isang babaeng client. At hinding-hindi na iyon mauulit pa. May karapatan naman siyang tumanggi sa mga susunod na customer kung hindi niya nais, iyon nga lang—wala siyang kikitain ni singko.

Sandali lang at pilit na pinanumbalik ni Alora ang lahat sa dati, na tila walang nangyari. Patuloy pa rin siya sa buhay dahil wala naman siyang choice. Hindi niya afford mag-dwell ng matagal sa isang bagay na wala siyang kontrol. Tama na ang isang araw na iniyak at tila ipinagluksa niya ang madilim na karanasang iyon.

Makalipas ang isa pang araw, muli siyang binu-book ni Zephyra. At gaya ng plano niya, tinanggihan niya ito. Malakas ang loob niya dahil alam niyang marami pang pwedeng mag-book sa kanya na mga regular VIP clients nila. Makakabawi siya sa isang beses na pumalya siya. Isang client bawat linggo lamang ang pwede nilang tanggapin ayon sa rules ng Call Girl upang mapanatili ang kalidad ng ino-offer nilang serbisyo—sa madaling salita, ang pagiging fresh ng bawat babae. Ito ang dahilan kung bakit sila dinadagsa ng mga mayayaman dahil malinis, safe, at de-kalidad ang serbisyo.

Subalit dumaan ang isa pang linggo, at wala pa ring booking si Alora.

Bahagya na siyang nangamba dahil ito ang unang beses na nabakante siya matapos niyang tanggihan ang booking ni Zephyra. Pumunta siya sa receptionist na kilalang-kilala rin naman siya dahil nasa Top 5 siya ng ranking ng mga pinakamalalakas na Call Girl.

"Talaga bang wala pa akong booking?" tanong niya kay Arya, ang may hawak ng schedule ng lahat.

Umiling din nang may pagkadismaya si Arya matapos tingnan ang system nila. Maski ito ay nagtataka dahil never pang nawalan ng client si Alora.

"Sorry, Alora. Ang meron lang dito at hindi pa rin nawawala... ay ang booking sa 'yo ni Ms. Zamora."

Agad na nagsalubong ang kilay niya nang marinig ang pangalang iyon. Zamora. Iyon ang tunay na apelyido ni Zephyra.

Mabigat ang paghinga niyang tinanguan si Arya saka tumalikod at umalis. Nangingilid ang mga luha sa kanyang mga mata dahil sa bigat at takot na nararamdaman. Unti-unti niyang napagtatanto kung gaano kapangyarihan ang babaeng tinanggihan niya.