Chapter 12

Tahimik akong nakatitig sa wedding ring na ngayon ko lang muling isusuot. Hindi ko naman sinusuot ito sa tuwing nagtatrabaho pero dahil bibisita ako kina Tita at paniguradong… may ilang negosyante ring pupunta roon.

Nakasisiguro akong kailangan naming panindigan ni Lionel ang pagiging mag-asawa sa harap nila.

‘Paano kung may makakita sa kalandian mo? Ha? Ilugar mo naman!'

Parang sirang plaka pa rin iyong nagpapaulit-ulit sa pandinig ko hanggang ngayon. Magmula nang isigaw iyon ni Lionel sa harap ko kahapon ng umaga ay naging laman na iyon ng isip ko. 

Pero siguro nga ay tama siya. Mas kailangan ko pa yatang mag-ingat. Baka mamaya may bumulusok na issue. Hindi maaaring masira ang reputasyon namin dahil lang sa akin.