Kabanata 34

SUMILIP muna si Alyssa sa malaking pinto bago tuluyan pumasok sa mansiyon.

Maingat ang mga hakbang na ginawa niya, siguro nasa sala pa din ang mga kasama niya. Tuloy-tuloy ang lakad niya nang makarinig siya ng ingay sa bandang kusina.

Ang mga kasama niya ang kanyang nakita, nagmemeryenda ang mga ito habang nagbibiruan.

"Alyssa!" bulalas ni Maggie nang makita siya sa bungad ng kusina. "Gusto mo ba ipagtimpla kita ng kape?"

"Huwag na ako na lang." Malumanay niyang sagot. Kumuha siya ng tasa at nagtimpla ng kanyang kape.

"Anong nangyari saiyo, bakit parang pasan mo ang daigdig?" Puna ni Maggie sa kanya ng makaupo na siya ng silya.