KABANATA 2

Mabilis na umalis siya nang akmang titingin na si Clyde, ang iniirog niya. Nahihiya kasi siyang makita nito uli ang nakakasukang mukha niya. Pumunta siya sa likod ng bahay. Dumiretso na agad siya sa banyo para makaligo uli. Mabilis lang ang pagligo niya. Siniguro niyang naalis na ang ebak ng kalabaw sa mukha niya pati na ang amoy nito. Ibinabad naman niya sa tubig na may maraming sabon ang panyo ng crush niya. Nakangiti pa siya habang inilalagay iyon sa maliit na planggana. Mamaya na niya iyon babalikan at papaliguan niya rin iyon ng fabric conditioner.

Lumabas na siya ng banyo nang matapos. Nakabestida pa rin siya nang hanggang sakong-sakong niya. Hindi na muna niya sinuklayan ang mahabang kulot na kulot na buhok dahil mauubos ang oras niya.

Pumunta siya sa kwarto kung saan tumatanggap ng customers ang lola niya. Maingat na binuksan niya ang pinto. Sumilip siya roon. Pagagalitan kasi siya nito kapag pumapasok siya doon habang may customer ito. Nakita niya ang nakatalikod na matanda na kasama ng mga kambal kanina sa kotse.

" Ano ba ang mga dapat kong gawin para magtuluy-tuloy ang pag-unlad ng mga negosyo at kompanya ko?" narinig niyang tanong nito sa lola niya.

As usual, nasa harap ng matanda ang maliit na bolang krystal ito at mga baraha. Matagal na tinititigan nito ang bolang iyon bago sumagot.

" Huwag kang mag-alala. Nakikita kong walang magiging problema ang kompanya mo at mga negosyo. Siguraduhin mo lang na maglagay ka lagi ng mga prutas sa altar mo gabi-gabi. Punuin mo rin ang bahay mo ng mga kulay ginto na mga mwebles, kurtina, kahit na ano. Basta ba iyong kulay na iyon ang laging sasalubong sa mga mata mo kapag papasok ka sa bahay mo," sagot ng lola niya rito.

" Maraming salamat. Gagawin ko ang lahat ng sinasabi mo. Nirekomenda ka kasi sa akin ng kumare ko. Sabi niya ay nagkakatotoo raw ang lahat ng mga hula at payo mo sa kanya. Babalik ako rito buwan-buwan. Naway makatulong nang malaki itong ibibigay ko sa iyo," masayang sabi nito at nakita niyang may inabot itong makapal na sobre sa lola niya.

Ngumiti lang nang tipid ang lola niya at itinabi na muna ang sobre.

" Aalis na ako at mahaba pa ang byahe namin. Ito ang calling card ko. I-text mo sa number ko ang contact information mo para matatawagan kita lagi kapag kailangan ko ang serbisyo mo," tumayo na ito at inabot ang maliit na card sa lola niya.

Kinuha naman iyon nang tahimik ng matanda at tumayo na rin. Agad na isinara niya ang pinto at umalis na roon bago pa siya makita ng mga ito. Naisipan niyang lumabas din agad para makita pa muna si Clyde bago pa umalis ang mga ito.

Sabay pang napalingon ang kambal sa kanya nang lumabas siya ng pinto. Nakita niyang napatitig sa mukha niya ang dalawa saka biglang bumunghalit ng tawa ang kinaiinisan niya sa kambal.

" Nakaligo ka na pala pero mukhang hindi uso ang suklay dito sa inyo. Wow! Ang haba pa ng buhok mo. Here, sa iyo na lang," tinitigan pa nito buhok niyang sabog-sabog sa mukha niya na hanggang puwet niya ang haba. Inabot din nito ang isang suklay na dinukot nito sa bulsa nito.

Napamulagat siya. Nakalimutan niyang hindi pala siya nagsuklay. Mukha pa naman siyang bruha kapag hindi nakatali ang buhok niya. Nakalapit na ito sa kanya habang nakangisi pa rin at inabot ang suklay. Awtomatikong inirapan niya ang binatilyo at hindi kinuha ang suklay sa kamay nito.

Bumukas na uli ang pinto at lumabas ang lola niya at lola ng kambal na nag-uusap pa rin. Napalingon siya at umalis sa bukana ng pinto. Biglang kinuha ng binatilyo ang kamay niya at inilagay ang suklay sa palad niya. Napatingin siya sa kamay niya at ibabalik niya sana iyon dito with matching irap uli pero nakalayo na ito sa kanya.

" Aalis na kami. Salamat uli," sabi ng lola ng mga ito sa lola niya.

Tumango at ngumiti lang din ang lola niya. Agad na tinawag ng customer nito ang kambal para umalis na. Tiningnan niya uli ang bagong crush niya at nakalimutan na nang tuluyan ang suklay na hawak. Hindi siya nito tinatapunan ng tingin. Bigla namang humarang ang nakakainis na mukha ng kambal nito kaya't hindi na niya makita si Clyde. Malaki ang ngiti ng isa na nakatingin sa kanya.

" Don't worry, I will make sure my twin will remember you always dahil ipapaalala kita sa kanya everyday," parang nang-aasar na sabi nito.

Inis na inirapan niya ito saka inumangan ng kamao. Tumawa ito nang malakas bago tuluyang tumalikod. Kandahaba naman ang leeg niya para lang makita si Clyde bago ito pumasok ng kotse.

Nawala ang inis sa mukha niya nang matitigan uli ang mukha nitong nakatagilid habang papasakay na ng kotse. Parehong sinusundan nila ng tingin ng lola niya ang papalayong sasakyan. Naramdaman na lang niya nang akbayan siya ng lola niya.

" La, I think I'm in love na po!" parang nangangarap na sabi niya.

Bigla siyang napasigaw nang maramdaman ang kurot nito sa tagiliran niya.

" Aray!" napahawak pa siya sa tagiliran niya nang lumayo bahagya sa matanda.

" Umayos ka at ang bata-bata mo pa. Kapag nakatapos ka na ng pag-aaral saka mo ako sabihan niyan at susuportahan kita para mapasaiyo ang lalaking gusto mo," hindi nakangiting sabi nito.

Kahit nararamdaman pa rin niya ang sakit sa tagiliran ay napangiti siya sa narinig.

" Talaga, La? Oh my God! Sure na sure na akong magiging Mrs. Del Espania sa future! Salamat, La. Pangako ko na magtatapos talaga ako ng pag-aaral ko po," napayakap pa siya sa matanda na parang OA na mapapaiyak.

" Heh! Tumigil ka nga! Alam mo namang gawa-gawa ko lang ang mga pinagsasabi ko sa customers ko. Ang ibig kong sabihin du'n,eh, kung kailangang pikutin mo ang lalaki na gusto mo, susuportahan kita at tutulungang mag-isip kung paano gawin iyon," tinampal pa nito nang mahina ang braso niya.

Napaingos pa siya habang hinihigpitan ang yakap sa matanda. Naniniwala siya sa kakayahan ng lola niya dahil sa loob-loob niya ay magagawa talaga niyang gayumahin kahit sino sa tulong ng mga ritwal at orasyon ng matanda. Ilang beses na niyang nasaksihan ang mga babaeng bumabalik sa kanila at kasama na ang mga asawang ginayuma lang ng mga ito. Alam niyang may isang libro ang lola niya para sa gayuma lang. Nakangiting pumikit pa siya habang ini-imagine ang mukha ng lalaking minimithi.

Bigla namang sumingit sa utak niya ang nang-aasar na mukha ng kambal nito. Napabitiw siya sa pagyakap sa abuwela at agad na pumiksi at tinampal-tampal ang gilid ng ulo para alisin sa isip ang lalaking kinaiinisan.

Nagtatakang napatingin ang matanda sa kanya kaya't tumigil na rin siya at ngumiti pa rito.

" Ahm, may bigla lang po akong naisip na asungot," sabi na lang niya.