KABANATA 3

Magmula nu'n ay lagi na niyang inaabangan ang pagbisita uli ng lola ng kambal at umaasang kasama nito ang isa sa kambal at iyon ay walang iba kundi si Clyde. Halos hindi na nga siya pumupunta sa bayan tuwing Sabado at Linggo. Lagi ay nasa veranda siya nakaupo nang halos buong araw. Sa tuwina naman ay lagi siyang bigo dahil hindi na muling napadpad sa bahay nila ang mga ito. Mahigit isang buwan na mula nang makita niya ang binatilyo.

Sabado uli nu'n. Inutusan siyang pumunta sa bayan para bumili ng mga kakailanganin nila ng lola niya. Matamlay na sumunod siya sa utos ng matanda. Kapag weekends kasi ay lagi niyang naaalala ang lalaki. Gusto niya kasing umasa na makikita niya itong muli.

Maaga siyang pumunta ng bayan dahil mahaba-haba ang listahang binigay ng lola niya. Mabuti na lang at may malaking basket ang harapan ng bisikleta niya para doon ilalagay ang mga bibilhin. Sobra isang oras din siya sa palengke at halos ang mga pinamili lang naman niya ay ang mga sangkap na ginagamit ng lola niya sa ginagawa nitong ritwal sa ibang customers nito.

Punung-puno na ng pawis ang noo niya nang malapit na siya sa bahay nila. Tirik na tirik kasi ang araw kaya't damang-dama niya ang init habang nagbibisikleta. Tumigil na siya sa isang malaking puno sa harap ng bahay para isandal ang bike du'n nang matigilan.

I don't know

What you're doing to me

Your sweet smile is what

I'd like to see

Be with me, girl

Be my darling babyyyy...

Ang ganda ng boses ng naririnig niyang kumakanta at magaling din itong magpatugtog ng gitara. Agad na napatingin siya sa may veranda nila. Biglang lumaki ang mga mata niya at sumikdo ang d****b nang makita ang likod ng pinanggalingan ng boses.

Ang pinakamamahal niya! 

Kulang na lang ay tumakbo siya palapit dito at hayaan na lang ang bike na matumba kasama ng mga pinamili niya. Huminga muna siya nang malalim para kontrolin ang sarili. Naramdaman niya ang pawis na dumaloy sa gilid ng pisngi niya at saka lang niya naalala ang pagmumukha. Nagpa-panic na itinaas niya ang laylayan ng damit para ipahid sa mukha at leeg.

Nakakahiya namang magpakita sa mukha niyang iyon. Kinuha niya ang salamin sa mata at binugahan ito ng hangin galing sa bibig saka pinunasan ng damit niya at isinuot uli.

Iniwan niya muna ang mga pinamili sa basket ng bike saka nakangiting lumapit nang dahan-dahan sa kumakanta pa ring binata. Inayos-ayos pa niya ang makalat na kulot na buhok. Hindi naaalis ang ngiti sa mga labi niya nang  pumunta siya sa veranda. Tumayo siya sa harap ng binata. Bigla itong tumigil sa pagkanta at napahinto ito sa paggigitara.

Napalis naman agad ang ngiti niya nang makita nang tuluyan ang mukha nito. Pumalit ang simangot sa mukha niya nang makilala ito. Ang kambal pala ng ultimate crush niya ang nasa harapan niya. Nakilala niya ito dahil sa isang hikaw sa tenga nito at butas-butas uli nitong pantalon. Hindi kasi ganu'n manamit ang iniirog niyang si Clyde.

Ito naman ang may malaking ngiti sa mga labi nang makita siya.

" Parang disappointed ka, ah? Pinapasabi pala ni kambal na hindi siya makakapunta kasi busy siya sa projects sa school," nakangiti pa ring sabi nito.

Biglang nawala ang simangot sa mukha niya.

" Talaga?" namimilog ang mga matang tanong niya.

Nauwi sa mahinang tawa ang ngiti nito.

" Joke lang, but hindi naman ako nagsasawa sa pagpapaalala sa kanya tungkol sa babaeng naghihintay sa kanya rito. By the way, maganda ba iyong kanta? I wrote it myself," nakangiting tanong nito habang inaalis na ang gitarang hawak sa kandungan at inilagay iyon sa mesa sa harap.

Ismid lang ang isinagot niya rito. Ayaw niyang lalong lumaki ang ulo ng lalaki kapag sinabi niyang maganda nga ang kantang gawa nito.

Mataman pa nitong pinagmamasdan ang mukha niya na parang pinag-aaralan siya. Gusto niyang mailang pero pilit na nilalabanan niya naman ang tingin ng kinaiinisang lalaki.

" Alam mo... Dapat mo akong tratuhin nang maaayos dahil magiging hipag mo ako in the future," nakataas ang kilay na sabi niya na napahalukipkip pa.

Bumunghalit ito ng tawa habang hindi inaalis ang tingin sa mukha niya. Nananatiling nakatingin lang din siya rito nang hindi ngumingiti. Parang nakakainsulto ang tawa nito pero hinayaan niya lang hanggang sa mapagod ito.

" Bilib talaga ako sa fighting spirit mo. Well, magiging masaya naman ako kapag ikaw nga ang mapapangasawa ng kapatid ko. Nakakatuwa ka kasi," sabi nito nang tumigil na sa pagtawa.

Parang ang saya-saya nga ng mukha ng loko!

" Tasyang!" napalingon siya nang marinig ang boses ng lola mula sa loob ng bahay.

" Hmm... Mrs. Tasyang del Espania, not bad. Mukhang bagay naman ang pangalan mo sa apelyido namin," nangingislap pa sa kapilyuhan ang mga mata nito.

Napatingin uli siya sa lalaki nang magsalita ito. Andu'n pa rin ang nang-aalaskang ngiti nito. Inilapit niya ang mukha rito at tiningnan ito sa mga mata. Nabigla ito sa ginawa niya kaya't hindi ito nakakilos.

" Yes, I will be Mrs. del Espania one day kaya't itaga mo iyan sa bato. Sigurado akong mawawala ang nakakainis mong ngiti kapag parte na ako ng family tree ninyo!" inis na sabi niya saka nagmamadaling tumalikod para pumasok ng bahay at puntahan ang lola.

Napaharap lang din muli nang maalala ang mga pinamili na nasa basket pa ng bike. Patakbong tinungo niya ang bike na nakasandal sa malaking puno. Mabilis na kinuha niya ang mga binili kanina.

Bago pa siya makapasok uli sa bahay nila ay nagsalita pa ang binata.

" I will be the happiest man on earth kapag nangyari iyon," malakas na sabi nito na dinugtungan uli ng malakas na tawa.

Hindi na niya ito nilingon dahil baka mabato niya lang ito ng mga bitbit niya.

Nagmamadaling tinungo niya ang lola niya sa kwarto kung saan ito tumatanggap ng customers. Nakita nga niya roon ang lola ng kambal. Nagbigay galang siya rito at ngumiti naman ang matanda sa kanya. Nagmano na rin siya sa lola niya bago ibinigay ang mga pinabili nito.

" So, sa tingin mo ba dapat kong tanggapin ang pakikipagsosyo sa bagong negosyo na inoffer sa akin?" narinig pa niyang tanong ng matandang babae sa lola niya bago siya lumabas ng kwarto.

" Nakikita kong maganda ang kahihinatnan kung tatanggapin mo ang offer," walang gatol na sagot ng lola niya.

Pagkalabas ng kwarto ay dumiretso na siya sa kusina para makapagluto. Ayaw na niyang makaharap pa ang nakakainis na kambal ng Clyde niya dahil baka tuluyang masira lang ang araw niya.