KABANATA 4

Third year College na siya sa kursong Education. Hindi naman talaga iyon ang pinapangarap niyang kurso pero limitado lang ang mga kursong ino-offer sa paaralan sa bayan. Gustuhin man niyang sa Maynila sana magkolehiyo ay wala naman siyang maipantustos sa pag-aaral niya roon. 

Nakahiga siya kama niya at nakatitig sa nag-iisang larawan ni Clyde na nakadikit sa dingding niya. Nakita niya kasi ang larawang iyon sa isang magazine nang mapunta siya ng bayan kaya't bumili siya kaagad at ginunting ang mukha nito. Katabi nito sa picture ang kambal nito at ang lola ng dalawa. Siyempre, ang picture lang ng sinisinta niya ang idinikit niya sa kwarto. 

Ilang taon nang hindi napupunta ang kambal sa kanila. Hindi naman sa may pakialam siya sa kambal nito pero napapansin niya lang na laging ang lola lang ng mga ito ang dumadayo sa kanila para magpakunsulta pa rin sa lola niya.

Nalulungkot siya dahil miss na miss na niya ang lalaki. Alam niyang tinamaan talaga siya kaya't hindi siya sumusuko kahit matagal na niya itong hindi nakikita. Nakangiting tumayo siya at nilapitan ang picture ng lalaki. Ang gwapo talaga nito. 

Sikat pala ang pamilya ng kambal dahil sa Maynila dahil sa modeling agency na pag-aari ng pamilya ng mga ito. Binasa niya ang nasa magazine dahil na-feature ang mag-lola. Nalaman niyang ang lola pala ng dalawa ang nagpalaki sa mga ito dahil parehong namatay sa aksidente ang mga magulang ng kambal nu'ng apat na taon pa lang sila.  Naiiyak pa nga siya habang binabasa ang storya ng pamilya del Espania.

Galing pala sa mahirap na pamilya ang lola ng dalawa at nang mapangasawa ang lolo ng kambal na medyo may kaya ay nagsumikap itong mapaunlad ang mga negosyo nila lalo na nu'ng mamatay ang asawa nito. Bilib na bilib siya sa matanda dahil nakaya nitong buhayin ang mga apo at napaunlad din nito lalo ang mga negosyo nila nang mag-isa.

Inaasahan nitong ang mga apo nito na ang magpapatuloy ng pamamalakad kapag nakatapos na ang dalawa sa pag-aaral. Nakita niya sa interview din na nasa magazine ang mga achievements ni Clyde. Napapangiti pa siya lalo.

" Ang galing talaga ng mahal ko," kunyari ay kinukurot pa niya ang pisngi ng lalaking nasa larawan. Mabilis na hinalikan din niya ang picture na kilig na kilig pa.

Tumunog ang cellphone niya kaya't kinuha niya iyon. Binasa niya ang text. Galing iyon sa nag-iisa niyang kaibigan sa bayan na si Shirley. Pinapaalala nito ang lakad nila mamayang gabi sa bayan. May concert daw kasi at dahil bibihira lang namang may mga ganoong kasiyahan sa kanilang lugar kaya't hindi nila palalampasin iyon.

Nakapagpaalam na siya sa lola niya at pinayagan na siya nito. Malaki ang tiwala nito sa kanya lalo't bibihira lang naman talaga siyang lumalabas ng bahay. 

Nag-reply siya sa kaibigan. Alas singko ng hapon ang usapan nila dahil alas siyete ng gabi ang concert ng isang banda na galing pa raw ng Maynila. Hindi niya matandaan ang pangalan ng banda dahil hindi naman siya mahilig sa mga ganu'n.

Binuksan niya ang kabinet at napatitig sa mga damit na naroroon. Kabilin-bilinan ni Shirley na huwag iyong damit na hanggang sakong-sakong ang susuotin niya dahil hindi raw iyon bagay doon. Napakunot-noo siya. Wala naman talaga siyang iba pang maisusuot. Naghalungkat pa siya at may nakita siyang maong na pantalon. Hindi pa siya nakapagsuot nang ganu'n pero regalo iyon sa kanya ng Ninang niya nu'ng isang taon pa. May nakita rin siyang blouse na na puti na parang kay Imelda Marcos ang mga manggas. Pwede na siguro iyon. Kibit-balikat na kinuha niya iyon. Maliligo na siya dahil malapit nang mag-alas kwatro ng hapon. 

Nakaligo na siya't nakapagbihis at nakatitig lang sa repleksiyon niya sa salamin. High waist kasi ang pantalon tapos naka-insert pa ang blouse na suot niya. Tiningnan niya ang sapatos. Naka rubber shoes siya ng puti rin. Ang buhok niya ay ipinusod niya lahat para walang sagabal. Inayos niya ang malaking salamin sa mata.

Pwede na siguro iyon.

Agad na bumaba siya at nakita niya ang lola niya na nakaupo sa sofa nang pababa na siya ng hagdanan. Nakatingin din ito sa kanya na nakakunot ang noo. Naninibago rin yata sa suot niya.

Nakangiting umikot siya sa harap ng matanda nang nasa harap na siya nito. Alam niyang ayaw nitong nagsusuot siya ng pantalon pero wala naman siyang nakitang disgusto sa mukha ng matanda nang makita ang suot niya.

" Maganda ba, lola?" masayang tanong niya.

Nakita niyang napangiti na rin ito.

" Kahit ano pa'ng suotin mo, apo, magandang-maganda ka pa rin," sagot nito na tinitingnan siya na parang ang ganda-ganda nga niya.

Sanay na siya sa lola niya. Alam naman niya sa sarili nya na wala talaga siyang gandang maipagmamalaki pero dahil sa trato ng lola niya ay pakiramdam na rin niya ay maganda siya kaya kahit paborito siyang i-bully sa school ay wala siyang pakialam sa mga iyon. Hindi siya basta-basta nagsi-self pity dahil sa hitsura niya.

Ngumiti pa siya lalo saka niyakap ang lola niyang nakaupo. Hinalikan niya ito sa pisngi.

" Alis na po ako, la. Baka gabihin ako pero kasama ko naman po si Shirley," paalam niya rito.

" Oh, siya. Mag-ingat kayo lagi. Baka nagbibilang ka na ng nobyo, ha?" sabi nito.

Napatawa siya sa sinabi ng lola niya. Alam niyang nagbibiro lang din ito. 

Paano naman siya magbibilang, eh, halos iwasan siya ng mga kaklase sa school mapababae man o lalaki?

Ngumiti lang siya sa matanda bago lumabas ng bahay. Gamit niya uli ang bike niya papuntang bayan. Dumiretso siya sa bahay nina Shirley. Agad na kumaway ito nang makita siya dahil hinihintay na siya nito sa labas ng gate. Huminto siya sa harap ng kaibigan. May salamin din ito sa mata. Nakasuot din ito ng pink na blouse at shorts na hanggang tuhod. 

" Wow! Parang principal ang kasama ko, ah!" sabi nito nang mapagmasdan siya.

Tumawa lang siya. Sinamahan siya nito sa loob para maiwan nila ang bike niya sa bahay ng mga ito. Wala ang mga magulang nito dahil may lakad daw kaya't hindi na siya pumasok sa loob.

Masayang nilakad nila ang parke na malapit lang sa bahay ng mga ito. Doon kasi magaganap ang concert. Andaming tao sa paligid. Bumili muna sila ng makakain nila habang gumala-gala. May nakita silang isang mini-bus malapit sa bahay ng Mayor. Iyon daw ang sasakyang gamit ng bandang magko-concert sa lugar nila. Siguro pinatuloy muna ng Mayor sa bahay nila.

Maaga silang bumili ng ticket at pumila kaya't nakapwesto sila sa unahan. Walang mauupuan doon kaya't lahat ng manood ay tatayo lang hanggang sa matapos ang concert. Bago mag-alas siyete ay pinatay na ang ilaw. Ang tanging tabing sa ulunan nila ay isang malaking trapal. Malaki rin naman ang park pero nagsisiksikan pa rin ang mga tao lalo na sa likod dahil halos dinagsa 'ata iyon ng buong populasyon sa lugar nila.

Naghiyawan ang mga tao nang namatay na nga ang ilaw. Hudyat iyon na magsisimula na. 

" Good Evening mga Kalipayans. Let's welcome the Kronicklez Band!" narinig nilang sigaw sa gitna ng dilim.

Biglang umilaw ang stage at pumunta sa harap ang limang lalaki na sa tingin niya ay ang mga miyembro na ng banda. Halos mabingi siya sa sigawan ng mga kababaihan.

" Hello, Kalipayanz!" sigaw ng lalaki na nasa gitna na may nakasukbit na gitara. Hindi pa makita ang mukha nito dahil dim lang ang ilaw sa harap. Maganda ang boses nito kahit nagsasalita pa lang.

Sigawan at hiyawan ang sagot ang mga nanonood. Narinig niyang sumisigaw na rin si Shirley sa tabi niya kaya't nakatawang nakikisigaw na rin siya. Biglang tumugtog na ng gitara ang lalaki kaya't natahimik ang lahat.

Ohhhh!

Girl, you are the fire in my eyes. Yeah!

You always make me feel so good.

Nagsimula nang kumanta ang lalaki. Hindi pa niya narinig ang kantang iyon kaya't sigurado niyang sariling kanta ng banda ang pinapatugtog ng mga ito. Maganda ang beat ng kanta kaya't napapasabay na rin siya sa palakpak ng lahat. Itinataas pa nila ang mga kamay habang umiindak.

Buti na lang at pumayag siyang sumama kay Shirley dahil nag-eenjoy siya ng gabing iyon. Patuloy sa pagkanta ang lalaki na masarap sa tenga ang boses. Biglang umilaw na sa stage at nakikita na nila ang mukha ng bawat miyembro nang papatapos na ang kanta. 

Girl, you are the one for me! Wooh!

Iyon ang huling pasigaw na kanta ng lalaki na nasa gitna.

Napatigil sa ere ang mga kamay niya nang makita ang mukha nito.

Clyde! Idinilat pa niya lalo ang mga mata para masiguro.

Clyde! Gusto niyang tumalon sa tuwa. 

" Whew! Kumusta kayo mga Kalipayanz? Sa ngayon ay pipili po kami ng pwedeng maimbitahan dito sa stage. I think di na ako mahihirapan pa," biglang sabi ng lalaki na itinuro ang kamay sa kanya.

Itinuro ako ni Clyde? Uminit agad ang mukha niya. Nakita niya nang pinagtitinginan siya ng mga tao. Nakilala ba siya ni Clyde? Hindi siya nakakalimutan ng mahal niya? Ayyyieee!

Parang gusto niyang himatayin.

" Yes, Miss, please join us here," biglang sabi nito.

Natulala siya lalo na nakatitig lang sa lalaki na aktong bababa ng stage para sa kanya.

" Hoy! Ibaba mo na nga iyang mga kamay mo at napansin ka na. Grabe! Ang swerte mo!" sigaw ni Shirley sa kanya na hinila pa pababa ang mga kamay niya. 

Nang hindi pa rin siya kumikilos ay itinulak siya ng mga tao sa likod.

Nakita niyang bumaba na sa may hagdanan ng stage si Clyde habang nakalahad ang mga kamay at hinihintay siya. 

Oh no! Clyde ko!

Mabibilis ang mga hakbang na pumunta siya sa harap.

" Ngee, bakit siya?" narinig pa niyang sabi ng babaeng nasa harap na kuntudo make-up ang mukha.

Pero wala siyang pakialam dahil nakatuon lang ang mga mata niya sa minimithi niya. Nang ganap na maiabot ang kamay sa lalaki ay damang-dama niya ang kuryente sa katawan niya. Mahigpit na hinawakan nito ang kamay niya saka siya iginiya sa gitna ng stage.

" Alright, we have this pretty lady here. Siya ay makakatanggap ng copy ng album namin with our signatures and pictures na rin," tumingin pa ito sa kanya habang sinasabi iyon at kumindat.

Biglang napahawak siya sa dibdib. 

Pretty? Ako? Clyde, gusto kong umiyak sa tuwa.

Clyde, bakit mo naman ako binibigla nang ganito...

" Siang, tumabi ka nang mapicturan ko kayo," biglang sabi ni Shirley na umakyat pa sa stage at pumunta sa harap nila.

Ngumiti naman ang lalaki saka siya inakbayan. Hindi niya alam kung gaano karaming pictures ang kinuha ni Shirley dahil parang hindi na siya humihinga sa sobrang excitement. May pictures din siya na kasama ang lahat ng myembro ng banda. Nakisali na rin si Shirley sa last na picture at inutusan pa talaga nito ang drummer ng banda.

Mabilis na bumaba ito habang nakangiti.

" Lady, tonight is your lucky night dahil bibigyan ka namin ng ticket sa concert namin sa Manila. I hope makakapunta ka," nakangiting sabi nito sa kanya na nakaakbay pa rin.

Panay lunok lang ng laway ang nagagawa niya.

" By the way, what's your name?"

" Tas... Natasha," kiming sagot niya.

" NIce name. Do you know my name?" pabirong tanong nito.

Yes, of course! Clyde!

Gusto niyang isigaw.

KYLE!

Bago pa siya nakasagot ay sinigaw na ng mga nanonood ang pangalang iyon.

Kyle? Ang kambal ni Clyde? Bigla siyang napatitig sa mukha nito. Matagal na pinagmamasdan niya iyon. Nakita nga niya ang isang hikaw sa tenga nito. Hindi nagsusuot ng ganu'n si Clyde. Napatingin siya sa pantalon nito sa may tuhod. May butas nga iyon!

Paano'ng hindi niya agad nalaman na hindi ito ang lalaking mahal niya?

Narinig niya nang tumikhim ang lalaki. Hindi niya namamalayan kasi na hindi pa rin niya inaalis ang tingin dito.

" I'm very flattered by the way you stare at me, Natasha, but... I'm already taken," bumulong ito sa tenga niya.

Bigla namang naghiyawan ang mga nanonood dahil akala nila ay kung ano ang ibinulong sa kanya ng lalaki. Nandilat ang mga mata niya rito. Hindi pa rin pala ito nagbabago. Antipatiko pa rin ito! Parang hindi na rin naman siya naaalala ng lalaki dahil matagal na panahon na mula nang huli itong sumama sa lola nito para pumunta sa kanila.

Puputakan niya sana ito kahit sa gitna ng lahat nang maghiyawan uli ang mga tao.

Kiss! Kiss! Kiss!

Tumingin uli ang lalaki sa kanya.

" Well, I guess, this is really your lucky night," sabi nito na gamit na ang mic saka mabilis na hinalikan siya sa pisngi.

Para siyang tuod na nakatayo lang doon. Hindi niya alam kung paano siya nakababa uli. Ibinigay pa muna ng lalaki sa kanya ang napanalunan niya bago siya inihinatid sa baba. 

Dumilim na uli ang stage at nagsimula na naman itong kumanta. Nagwawala na naman ang mga tao. Saka lang siya nahimasmasan nang yugyugin ni Shirley ang mga balikat niya.

" Ang swerte mo! Alam mo ba'ng matagal ko nang crush na crush iyang si Kyle! Grabe!" sinisigaw nito iyon para marinig niya.

Ngumiwi lang ang mukha niya.