CHAPTER 7

HABANG nagda-drive si Trevor pauwi sa bahay ay biglang may nag-over take na kotse at hinarangan ang daraanan niya. Biglang nag-init ang ulo niya. Napamura siya at hinampas ang mga kamay sa manibela. Mabuti na lang at agad siyang nakapagpreno kaya hindi nabangga ang sinasakyan niya.

Nakita niyang bumukas ang pinto ng driver seat ng kotseng nasa harapan niya. Agad niyang binaba ang bintana sa gawi niya at pinagmumura ang driver sa kabilang sasakyan.

"Gago ka! Hindi ka ba marunong mag-drive?!"

Bumaba ang lalaki. Napa-iling siya nang makilala kung sino ito, si Tommy, ang boyfriend ni Scarlett.

Lumabas na rin siya ng sasakyan. Ngayon ay hindi na siya magdadalawang isip na harapin ito dahil wala na sila sa loob ng coffee shop niya.

"Ikaw na naman? Ano na namang problema mo?!" naiinis niyang tanong.

"Ikaw ang problema ko!" gigil nitong sigaw sabay duro sa kaniya. "Iniwan ako ni Scarlett nang dahil sa 'yo!"

Napangisi siya. "Bakit ako ang sinisisi mo? Ang girlfriend mo ang lapit nang lapit sa akin. Siya ang nang-akit sa akin at nag-alok na maging fuck buddies kami. Kaya siya ang dapat na sisihin mo, hindi ako."

Lalong nanggigil si Tommy sa mga sinabi ni Trevor. "Hayop ka! Papatayin kitang gago ka!"

Nang makalapit si Tommy ay agad itong nagpakawala ng isang suntok. Mabilis na naka-iwas si Trevor. Gumanti siya at malakas na sinuntok ito sa mukha. Bumagsak ito sa kalsada. Sinamantala niya iyon at pinagsisipa ito sa hita, tiyan at dibdib.

"Kahapon pa ako nababanas sa 'yo. Hindi lang kita mapatulan dahil marami akong customers sa shop," nanggigigil niyang wika habang patuloy sa pagsipa rito. Laking pasalamat niya na sa labas sila nagpang-abot ni Tommy dahil malaya na siyang makakaganti sa mga pinagsasabi nito sa kaniya.

Sa sobrang abala sa pananakit kay Tommy ay hindi niya namalayan na muling bumukas ang pinto ng kotseng sinasakyan nito kanina. Bumaba mula roon ang isang lalaki na may hawak na kahoy.

Saka lang natigil sa pagsipa si Trevor nang paluin siya sa likuran ng lalaki. Sa lakas ng palo nito at nabali ang kahoy. Namilipit siya sa sakit at siya naman ngayon ang tumumba sa kalsada.

Bumangon si Tommy at nagtulong ang magkaibigan sa pambubugbog sa kaniya. Pinagsusuntok siya sa mukha ni Tommy habang ang kasama naman nito ay sinisipa siya.

Hindi magawang makatayo ni Trevor dahil sunod-sunod na suntok at sipa ang inabot niya.

Natigil lang ang dalawa sa ginagawa nang may humintong motor sa likuran ng kotse ni Trevor. Bumusina ito nang paulit-ulit at tinutok ang headlight sa direksyon nila.

"Sibat na tayo, pare!"

Napamura si Tommy. Halatang gusto pa nitong saktan si Trevor. "Hindi pa tayo tapos. Babalikan pa kitang hayop ka!"

Tumakbo na ang dalawa pabalik sa sasakyan at agad na pinaharurot iyon palayo.

Masakit man ang buong katawan ay pinilit makabangon ni Trevor. Hindi niya magawang makatayo kaya naupo na lamang siya at sinandal ang likuran sa gilid ng kotse niya.

Napatingin siya sa pinagmumulan ng liwanag. Mula iyon sa isang scooter na minamaneho ng isang babae. Base sa suot nitong uniform ay isa itong nurse.

Pinarada ng babae ang motor sa likod ng kotse niya. Patakbo itong lumapit sa kaniya at lumuhod sa tapat niya.

Napa-awang ang mga labi ni Trevor nang tanggalin nito ang suot na helmet at bumulaga sa kaniyang mga mata ang napakaganda nitong mukha.

"Okay ka lang?" nag-aalalang tanong ng babae habang nakatingin sa kaniya.

Naamoy niya ang mabangong hininga nito nang magsalita.

Napalunok si Trevor. Hindi agad siya nakapagsalita. Nakatitig lang siya sa mukha ng magandang babae at tila nahipnotismo sa kagandahan nito.

"Okay ka lang ba?" muli nitong tanong.

"Yeah. Okay lang ako." Sa wakas ay nagawa na niyang magsalita.

"Grabe ang mga sugat mo. Sino ba ang nambugbog sa 'yo?" Kinuha nito ang backpack na nakasukbit sa likuran nito at nilabas ang isang medicine kit.

"Ewan ko. Hindi ko sila kilala," kaila niya.

"Bibigyan muna kita ng first aid. Pumunta ka na lang sa hospital mamaya para ma-check ka ng mga doctor."

"Okay. Salamat."

Sinimulan na ng nurse na gamutin ang mga sugat niya sa mukha. Habang abala ito sa ginagawa ay abala rin siya sa pagtitig sa napakaganda nitong mukha.

Alon-alon ang mahaba nitong buhok. Sobrang kinis at napaka-amo ng mukha. Matangos ang ilong nito, namumula ang makipot na mga labi, almond shaped ang brown nitong mga mata na binagayan ng makapal at mahabang eye lashes.

Tila labis na nanghinayang si Trevor nang matapos gamutin ng nurse ang mga sugat niya.

Niligpit na nito ang mga gamit tapos ay inabutan siya ng ilang pirasong gamot.

"Pain reliever 'yan. Inumin mo 'to kapag kumirot ang mga sugat mo."

Tumayo na ito at muling sinukbit ang backpack sa likuran. Maglalakad na sana ito papalayo subalit pinigilan niya ang isa nitong kamay.

"Thank you, miss."

Isang matamis na ngiti ang sinukli nito sa kaniya. "Don't mention it. I'm just doing my job."

Muling napa-awang ang mga labi niya. Lalo kasi itong gumanda nang ngumiti. Lumabas ang mapuputi at pantay nitong mga ngipin. Lalo ring umumbok ang cheek bones ng babae, na lalong nagpa-cute dito.

"P'wede ko bang malaman ang pangalan mo?"

Hindi nito sinagot ang tanong niya. Pinilit nitong bawiin ang kamay mula sa pagkakahawak niya.

Napansin ni Trevor ang badge na nakadikit sa suot nitong uniform. Pasimple niyang binasa ang nakalagay doon.

Nakalagay din doon ang pangalan ng hospital na pinagtratrabahuhan nito.

"I'll go ahead. Mag-ingat ka pauwi."

Nang mabitawan niya ang kamay ng babae ay agad itong tumalikod at naglakad na pabalik sa motor nito. Binuhay na nito ang makina ng sasakyan at pinaharurot na iyon palayo.

Napangiti si Trevor. Hindi niya man nakuha ang pangalan ng babaeng nagligtas sa kaniya ay alam niya naman kung saan ito matatagpuan.

Pinsan ng daddy niya ang nagmamay-ari ng hospital na pinagtatrabahuhan nito, ang Ignacio Memorial Hospital. Kung gugustuhin niyang makita ulit ang magandang nurse ay madali na iyon para sa kaniya.

"Alvarez, H. Nice name," tila wala sa sariling sambit niya. "Malalaman ko rin ang buo mong pangalan."