HEAVENLY DESIRE (ALLURING AFFAIRS SERIES 6)

ABALA sa paggawa ng assignments ang sampung taong gulang na si Trevor sa loob ng kaniyang silid. Mayamaya ay nakarinig siya ng sunod-sunod na kalabog at sigawan mula sa katabi ng silid niya, ang silid ng kaniyang ina at ng live-in partner nitong si Carlos.

Nabitawan niya ang hawak na ballpen at napatingin sa dingding na nasa pagitan ng kanilang mga silid. Nangilid ang luha sa mga mata ng bata.

Nakuyom niya ang mga kamao. Gusto niyang tulungan ang mommy niya na walang awang binugugbog ni Carlos ng mga sandaling iyon, ngunit wala siyang magawa. Ano bang laban niya sa amain na bukod sa matangkad na ay malaki pa ang pangangatawan?

Nang mamatay ang ama ni Trevor noong nakaraang taon dahil sa heart attack ay muling nakipag-relasyon ang kaniyang ina sa ibang lalaki. Six months ago ay nag-live in ang dalawa at tumira si Carlos sa bahay nila. Noong una ay maayos ang pakikitungo nito sa kanilang mag-ina. Ngunit hindi naglaon ay lumabas din ang totoo nitong ugali. Lagi nitong sinasaktan ang mommy niya, lalo na kapag hindi nagbibigay ng pera para sa pangsugal at pang-inom nito.

Ilang buwan nang ganito ang sitwasyon sa bahay nila kaya naman nasanay na rin si Trevor. Wala naman siyang magagawa. Gustuhin niya mang awatin si Carlos sa pananakit nito sa mommy niya ngunit hindi niya magawa. Kapag umawat kasi siya ay siguradong sasaktan lamang siya nito.

Pinagpatuloy na lang ni Trevor ang paggawa sa mga assignments niya. Ilang sandali pa ay tumigil na ang mga kalabog at sigawan sa kabilang kwarto. Ang tanging naririnig niya na lang ay ang malakas na paghagulgol ng kaniyang ina.

Nang marinig niya ang malakas na pagbukas at pagsara ng pinto sa kabilang silid ay tumayo na rin siya. Nagpalipas muna siya ng ilang sandali. Nang masigurong naka-alis na ng bahay si Carlos ay lumabas na siya ng silid. Patakbo siyang bumaba ng hagdan at dumerecho sa banyo. Kumuha siya ng bimpo at nilagyan ng tubig ang isang palanggana. Kinuha niya rin ang medicine kit tapos ay umakyat sa silid ng mommy niya.

Nakasanayan na niyang gawin ang bagay na ito sa tuwing matatapos mag-away ang dalawa.

Nakagat ng bata ang pang-ibabang labi nang makita ang ina na naka-upo sa isang sulok ng silid. Putok ang labi nito at may black eye sa kanang mata.

Patakbo siyang lumapit sa ina at agad na pinunasan ng basang bimpo ang duguang mukha nito. Habang nilalagyan ng gamot ang mga sugat ng ina ay tahimik lamang itong umiiyak.

Napa-iyak na rin si Trevor dahil sa matinding awang nararamdaman para sa ina.

"Umalis na tayo rito, mommy. Natatakot na po ako sa bahay na 'to. Please umalis na tayo," umiiyak niyang pakiusap sa ina.

"Hindi ko p'wedeng iwanan ang Tito Carlos mo. Siguradong susundan niya tayo kahit saan tayo magpunta. Papatayin niya ako 'pag iniwan ko siya. Baka pati ikaw madamay, anak. At iyon ang ayokong mangyari." Bakas sa bawat salitang binitawan nito ang matinding takot para kay Carlos.

Umangat ang kanang kamay ni Annie at masuyong hinaplos ang mukha ng kaisa-isang anak.

"Tinawagan ko kanina ang Tito Christian mo." Ang tinutukoy ni Annie ay ang kapatid nito na nakatira sa kabilang bayan. "Binigay ko na sa kaniya ang naiwang pera ng daddy mo. Doon ka muna tumira sa bahay niya. Siya muna ang pansamantalang magpapa-aral at magpapalaki sa 'yo."

Natigilan si Trevor sa ginagawa. Hindi siya makapaniwala sa mga narinig. Hindi niya lubos maisip na ipapamigay siya ng sariling ina sa kapatid nito. Mabait naman si Christian. Parang anak nga ang turing nito sa kaniya sa tuwing magkasama sila. Kaya lang ay ayaw niyang mapahiwalay sa mommy niya. Wala na nga ang daddy niya, pati ba naman ang mommy niya ay mawawala rin?

Nag-unahan sa pagtulo ang luha sa kaniyang mga mata. Sa labis na pagkabalisa ay nabitawan niya ang hawak na bimpo.

"Hindi mo na ba ako mahal, mommy? Ayaw mo na ba akong makasama?" umiiyak niyang tanong.

"Mahal na mahal kita, anak. Kaya ko nga ito gagawin kasi mahal kita at gusto kong maging maayos ang buhay mo."

"Pero bakit mo ako ipamimigay? Kung mahal mo ako, hindi mo ako ipamimigay kay Tito Christian."

"Dahil mas magiging ligtas ka kung aalis ka sa impyernong bahay na 'to. Mas mapapanatag ang kalooban ko kung pansamantala kang titira sa tito mo. Walang mananakit sa iyo ro'n. Mas maaalagaan ka niya. Susunduin ka niya bukas sa eskwelahan. Sumama ka sa kaniya, Trevor." Pilit na nginitian ni Annie ang anak.

Mariin siyang umiling bilang pagtutol. Ayaw niyang mapalayo sa mommy niya. Mas gugustuhin na niya ang magulong buhay sa piling nito at ni Carlos kaysa magkahiwalay silang dalawa.

"Huwag kang mag-alala, anak. Pansamantala lang naman 'to. Kukunin din kita sa kaniya kapag naayos ko na ang problema ko sa Tito Carlos mo."

"Ayoko pong sumama sa kaniya, mommy. Nangako ako kay daddy noon na hindi kita iiwan. Dito lang po ako sa tabi n'yo. Hinding-hindi ko po kayo iiwan."

"Pero, anak-"

"Mommy, please dito lang ako. Ayoko pong magkahiwalay tayo. Okay lang po sa akin kahit lagi akong saktan ng Carlos na 'yon basta makasama ko lang kayo." Yumakap siya sa ina at tuluyang napahagulgol ng iyak. "Magpapalakas po ako para maipagtanggol kita kay Carlos. Kapag malaki na ako, mapo-protektahan na kita at hindi ka na niya masasaktan."

Napahagulgol na rin ng iyak si Annie. Gumanti ito ng yakap sa anak at pinaghahalikan si Trevor sa tuktok ng mukha.

"I'm sorry, anak. Pati ikaw nadamay sa gulo ng buhay ko."

Ilang sandali silang nanatiling magkayakap. Mayamaya ay pinilit tumayo ni Annie kahit na nanginginig ang katawan nito.

"Magluluto muna ako, Trevor."

"Gutom ka na ba, mommy? Ipagluluto po kita."

"Huwag na, anak. Ako na lang. Siguradong magagalit na naman ang Tito Carlos mo kapag umuwi siya at inabutan niyang walang pagkain sa kusina." Pinilit maglakad ni Annie ngunit nakaka-ilang hakbang pa lamang ito ay agad din itong bumagsak.

Agad na lumapit si Trevor sa ina. Inalalayan niya ito paupo sa gilid ng kama. "Dito ka na lang, mommy. Ako na po ang magluluto." Nginitian niya ang ina tapos ay patakbo nang lumabas ng silid nito at nagtungo sa kusina.

Wala silang katulong kaya naman sa murang edad ay nasanay na siya sa mga gawaing bahay, lalo na kapag hindi makakilos nang maayos ang mommy niya sa tuwing pinagmamalupitan ito ni Carlos.

Dati ay may dalawang katulong sila sa bahay. Subalit parehong umalis ang mga ito dahil pinagtangkaang halayin ni Carlos.

Tahimik na umiiyak si Trevor habang nagluluto ng corned beef. Nanginginig ang mga kamay niya sa sobrang galit.

Balang araw ay makakaganti rin siya kay Carlos. Ipaparanas niya rito ang lahat ng hirap at pasakit na lagi nitong pinapatikim sa kaniyang ina.