Chapter Two

NARAMDAMAN na lang ni Savannah ang pagbigat ng kanyang balikat nang ilagay ni Zach ng blazer nito. Malamig na ang simoy ng hangin sa dalampasigan at hindi niya namalayan na nahubad na pala ng binata ang suot na itim na blazer para ibigay sa kanya.

“Salamat.”

Ngumiti ito at nagpatuloy sa pagsabay sa kanya sa paglalakad. “Maganda pala dito sa inyo. Nakakawala ng stress.”

“Kaya nga hindi ko maiwan. Ilang beses ko nang sinubukan pero bumabalik pa rin ako.”

“Kahit ako siguro, babalik-balikan ko ‘to. Sariwa ang hangin, tahimik. Parang ibang mundo.”

“Kung mabibigyan ka ba ng chance na dito tumira, papayag ka?”

“Bakit hindi?” Napatingin ito sa kanyang direksiyon. 

“May bakanteng posisyon sa resort, assistant general manager. Baka gusto mo.”

“Seryoso?”

Napangiti siya. “Kung seryoso ba, mag-a-apply ka?”

“Kung urgent, I’m sorry but I have to decline the offer. Maybe someday?”

Itatanong pa sana ni Savannah ang dahilan pero nagkibit-balikat na lang siya.

“Pasensiya ka na nga pala, ha. Hindi man lang ako nakapagdala ng birthday cake. Hindi ka tuloy nakapag-blow ng candle at nakapag-wish.”

Natawa siya. “Ano ako, bata?”

“Bata lang ba ang may karapatang magkaroon ng birthday cake?”

“Sa totoo lang, hindi naman talaga ako nagse-celebrate ng birthday. Itong si Mikee lang talaga ang makulit. Alam naman niya na ayoko ng hassle - no offense meant, Zach. Hindi itong dinner, hindi ikaw ang tinutukoy kong hassle. It’s just that-”

“Don’t worry, gets ko naman.”

“Feeling ko lang kasi…I’m too old for this kind of stuff.”

“Nobody’s too old to enjoy this kind of stuff.” Huminto si Zach sa paglalakad at kinailangan pa niya itong lingunin. 

“Well.” Nang lumakas ang hampas ng hangin ay napahalukipkip siya. “Hindi na kasi ako mahilig sa mga ganitong bagay...”

“Ganitong…bagay?”

“Ito. Dating. Romance. O kung ano man ang gusto mong itawag dito.”

Ito na ang lumapit sa kanya nang nanatili lang siyang nakatayo roon. “Tama nga si Miss Mikee. Masyado kang naging abala sa trabaho na hindi mo na alam kung paano mag-enjoy.”

Napaangat siya ng tingin. 

“Hindi ko alam kung ano ang istorya ng buhay mo pero gusto ko lang malaman mo na lahat - at walang exception - lahat ng tao, dapat marunong mag-enjoy sa buhay. Ma-in love, ma-experience ang pleasure. Hindi mo alam kung ano ang nami-miss mo, Savannah. At nakakalungkot lang malaman na isang napakagandang babae na tulad mo ang walang desire for pleasure…” 

Hindi inaasahan ni Savannah na tatagos sa kanya ang sinabi ng binata. “Male escort ka ba talaga o therapist, huh, Zach?”

“P’wedeng pareho.”

~~ 

TILA kumikinang ang balat ng dalaga sa tama ng liwanag ng buwan. Kanina pa kating-kati si Zach na hawakan ang mahaba nitong buhok na sumasabay sa ihip ng hangin. Kitang-kita ang magandang hubog ng katawan nito sa suot na puting summer dress at hindi niya alam kung pansin nito ang mga titig niya.

Nang alukin siyang muli ng trabaho ni Mrs. Legaspi, nagdalawang-isip siya kung tatanggapin iyon. Isang taon na mula nang iwan niya ang pagiging male escort at sinabi niya sa sarili na hangga’t maaari ay hindi na siya babalik sa ganoong trabaho pero wala naman siyang ibang pagpipilian. 

Gusto niyang magalit sa ama at sisihin ito sa lahat ng nangyayari sa kanilang magkapatid. How dare him make a deal with someone without consulting them in the first place? Hanggang ngayon ay iniisip pa rin niya kung paano nito nagawang ipagkatiwala ang kapatid na si Tanja sa taong hindi nito kilala na para bang pambayad-utang? May rason ang tatay nila, iyon ang laging sinasabi ni Tanja pero hindi niya iyon pinaniniwalaan. Hindi niya maintindihan kung bakit kailangang isakripisyo ang kanyang kapatid dahil lang mga kasalanan ng kanilang ama? Ngayon, kailangang bumalik ni Zach sa dating gawi, at lunukin ang kanyang dignidad para lang mailigtas ang kapatid sa kung sino mang lalaking iyon. At ang masahol pa roon ay kailangan din niyang isakripisyo ang sarili at ibigay ang lahat ng kagustuhan ng kanyang kliyente sa ayaw man niya o sa gusto.

Pero hindi napigilan ni Zach na mapangiti muli niyang lingunin si Savannah. Mas maganda ito sa inaasahan niya, mas maganda ang hubog ng katawan, at kailangan niyang aminin na si Savannah ang magiging kliyente niya ay wala siyang pagsasakripisyong kailangang gawin. Kailangan pa nga yata niyang ipagpasalamat sa Diyos na kinailangan niyang bumalik sa pagme-male escort dahil kung hindi ay hindi siya magkakaroon ng pagkakataon na makilala ang isang Savannah Marie Castello.

Nawala ang lahat ng agam-agam niya nang sandaling makita niya ang dalaga na nakatayo sa entrance ng resort. Hindi niya maipaliwanag pero para siyang na-hipnotismo sa kagandahan nito. Alam niyang hindi niya kailangang mag-effort sa trabaho ngayong gabi dahil sa tulad ni Savannah, willing siyang gawin ang kahit na ano para lamang magustuhan siya nito.

“Medyo mahirap kunin ang kiliti n’yan,” babala pa ni Miss Mikee sa kanya noong tawagan siya nito kahapon. “Basta, hindi siya mabilis ma-turn on. Parang may wall ‘yang babaeng ‘yan sa paligid niya para hindi lumapit ang mga lalaki. Let’s just say na bukod sa masyadong busy ang kaibigan ko na ‘yan, nawalan na siya ng ganang makipag-date. She has become...dull and I want to change that. Sa tulong mo sana, Mr. Zachary. Iparamdam mo sa kanya na kailangan pa rin niya ng lalaki sa buhay. Introduce romance to her again. Let her feel passion. Tease her if you must, do whatever it takes to make her give in to her desire.”

Oh, iyon lang pala. Sisiguraduhin niya na bago matapos ang trabaho niya ay mababago niya ang kung ano mang paniniwala ni Savannah tungkol sa romance.

Hindi man iyon ang unang pagkakataon na nakatanggap siya ng ganoong klaseng misyon, ngayon lang yata siya nagkaroon ng kliyente na tulad ni Savannah. Bukod sa responsibilidad na gawin nang tama ang trabaho, he also has to keep himself in check.

Ang tanong, kaya ba niyang maisakatuparan ang tungkulin sa loob lamang ng isang gabi?

Muli, tinapunan niya ito ng tingin. Kung pagbabasehan ang itsura nito at paraan ng pagdala nito sa sarili, walang makapagsasabi na may galit ito sa lalaki. She looks too lovely to indicate such. Sayang, naisip niya. Sayang ang ganda at karisma nito kung itatago lang nito iyon sa baul. She doesn’t know what she’s missing if she keeps on staying away from men.

“B-bakit mo ako tinititigan nang ganyan?” tanong nito nang mahuli siya nitong nakatitig. 

“I’m sorry. Nai-imagine ko lang na marami siguro ang lalaki na baliw na baliw sa ‘yo.”

Hindi napigilan ni Savannah na matawa. “Well, I don’t think so.”

“Oh believe me. Kung may ibang tao lang siguro dito ngayon, sigurado na mapapatitig silang lahat sa iyo, Savannah. At hindi ko lang maiwasang ma-proud kasi, ako ang kasama mo ngayong gabi.”

Yumuko ito at ngumiti pero ilang saglit lang ay nag-angat rin ito ng tingin. “Alam na alam mo talaga ang mga gustong marinig ng mga babae, ano?” 

“Nagsasabi lang ako ng totoo.” Lumapit siya rito para makita nang husto ang maganda nitong mga mata. Kanina pa niya gustong haplusin ang pisngi nito para malaman kung gaano iyon kakinis pero pinigil niya ang sarili kaya ipinamulsa na lamang niya  ang dalawang kamay para pigilan ang sarili.

“Huwag mo nga akong tingnan nang ganyan, please.”

“Bakit, hindi ka ba komportable?”

Tumango ito.

“Matagal ka na bang hindi nakikipagtitigan nang ganito kaya hindi na komportable sa’yo?”