Kabanata 2

"Sir," magalang na bati ni Sylvia nang makapasok sa malamig na opisina ng amo.

"Coffee," seryosong utos nito habang iniikot-ikot ang swivel chair at may hawak na papel na tila binabasa.

"Iyong Starbucks po ba?"

Binato lamang siya nito ng tingin agad naman siyang ngumiti. Alam naman niyang Starbucks ang lagi nitong iniinom. Gusto niya lang umasang magpapatimpla na lang ito sa kaniya, kasi naman napakalayo pa ng bilihan ng sosyal na kapeng paborito nito.

"Faster," maawtoridad nitong ulit.

Napapikit si Sylvia dahil sa inis. Kailan ba ito makakadama ng awa o kahit pakisama man lang sa kaniya?

Napatingin si Troye nang ibagsak ng sekretarya niya ang pinto. Dahil nakalabas na ito ay wala siyang nagawa kung 'di kagatin ang ibabang bahagi ng labi.

"Bwisit talaga," kausap niya sa sarili habang patamad na naglalakad palabas ng office.

"Kung alam niya lang kung gaano kalayo ang lintek na bilihan ng kape niya na iyon," reklamo niya.

"Good morning!" bati ni Patrick.

Matuling napadako ang mga mata ni Sylvia sa hawak nitong Starbucks. Napangiti siya ng maluwag bago sinalubong ang tingin nito.

"Nainuman mo na ito?" tanong niya.

"Kaunti pa lang," nagtatakang sagot ni Patrick.

Walang sinayang na oras si Sylvia agad niyang kinuha ang hawak nito. 

"Hoy!" bayolenteng reaksyon ng kaniyang workmate.

"Babayaran ko na lang! Mamili ka na lang ng bago!" Agad siyang kumuha sa bulsa ng pera at pilit na inilagay sa kamay ni Patrick.

Tumalikod na si Sylvia habang dala ang 'second hand' na kape. Kung noon, nakikipagsiksikan pa siya sa mga tao sa coffee shop para lang mauna. Ngayon ay easy na lang para sa kaniya.

Wala namang makaaalam na kinuha niya iyon kay Patrick.

"You're early," halatang nagulat si Troye sa mabilis na pagbalik ng kaniyang sekretarya.

Mayabang na nakangiti si Sylvia habang marahang ibinaba sa mesa nito ang kape. 

Sinilip pa ng boss niya ang kape, tila naniniguro kung tama ba ang binili niya.

"Anything, Sir?" buong kumpiyansang tanong niya.

"You're 30 minutes early, huh?" Nakangiting bigkas nito at sandaling sinulyapan ang branded na wrist watch.

Mayabang na nagkibit-balikat si Sylvia. Lihim na nagdiwang ang isip niya dahil naisahan niya kahit papaano ang gwapo niyang boss.

"Mukhang sa lahat ng tumatanda, ikaw ang malakas!"

"May iuutos pa po ba kayo?" pag-iiba niya dahil alam niya kung saan tutungo ang usapang ito.

"Yeah. Can you do some push-ups?" nakalolokong request ni Troye habang prenteng nakasandal sa upuan.

Awtomatikong tumaas ang kilay ni Sylvia na nagpangiti sa binata.

"What?" pigil na tawang dagdag pa ni Troye.

"You have a strong body despite of your age."

"Pwede ba, Sir?" napipikon niyang sagot.

Agad na tumalikod si Sylvia, alam na niya ang kailangan pa nito. Ang bwisitin at sirain na agad ang umaga niya sa panlalait sa edad niya.

Habang nakasimangot at nakaupo, muli niyang tinanaw si Troye. Busy na ito at nagbabasa ng kung anu-anong papel. Itinaas niya ang ballpen at akmang ibabato rito.

Kahit makakapal ang kilay nito, kahit na matangos ang ilong, manipis at mapulang labi ay hindi niya magawang humanga sa batang ito. 

Ubod kasi ito ng yabang at malakas mang-asar. Palibhasa na sa 20's pa, kaya hindi pa masyadong nagseseryoso sa buhay. Hindi katulad ng kuya nito na si Trevor, ang dating nakaupong CEO

Ang original niyang boss!

Kaso nag-asawa na at namuhay na sa America. Kaya ang sumunod na tagapagmana ng Ledesma Company na si Troye ang namamahala. 

Isang tawag ang nagpabalik sa wisyo ni Sylvia.

"Yes, hello?"

"Oh, yes, Ma'am!"

"Alright, I'll get back to you. Thank you and bye!"

Binaba niya agad ang tawag at mabilis na lumapit sa pinto at kumatok. 

"Come in!"

"Sir, nagpapa-set po ng meeting si Miss Bianca Danilo. Lunch po sa restaurant niya."

"Tell her, I can't."

Hindi man lang nag-angat ng mukha si Troye nang sagutin si Sylvia at patuloy lang sa tila pagpirma ng hawak na folder.

"Ala'y, bakit po? Last week pa po nanghihingi ng meeting si Miss Danilo sa inyo para mag-invest sa company."

"Just follow me, can you?" iritableng sagot nito habang lukot na lukot ang noo.

"Hindi n'yo ba naisip na malaki siyang investor sa kumpanya? Isa siyang kilalang businesswoman up to this day," katwiran ni Sylvia.

Malakas na isinarado ni Troye ang folder at matalim na tingin ang lumipad sa kaniya.

"Miss Dimaculangan, your job is to take care of my schedule. Thats it, don't try to ask my decision. You don't have any right to do that, understand?" masungit nitong litanya.

"Understand?" pangagaya ni Sylvia habang nakatirik ang mga mata.

"Now, get out. And tell to your co-old maid to get lost."

Padabog niyang ibinaba ang mga kubyertos matapos kumain ng lunch. Makahulugang nagkatinginan sina Gabe, Patrick at Lorie na kaharap niya.

"Ikaw na magtanong," Siniko ni Gabe si Lorie.

"Sis, anyare? Bakit beast mode ka na naman?" may takot na tanong ng bestfriend niya.

"Alam na namin kung sino ha? Ang gusto naming malaman, kung ano na naman ang ginawa niya para bwisitin ka ng ganiyan?" singit naman ni Gabe.

Halos mapatingin ang lahat ng mga ka-trabaho nila nang ubod na lakas niyang sinarado ang takip ng plastic tupperware niyang baunan.

"Iyong boss natin, nire-reject si Miss Danilo?" asik niya.

"Nag-offer na naman ba?" tanong ni Patrick habang ngumunguya.

"Hindi ba't no'ng isang araw ay nagsadya pa 'yong matanda para lang makapag-set ng meeting kay boss?" sambit naman ni Gabe na kaakbay si Patrick.

"Kaya nga umiiwas si Boss at nire-reject 'yong offer. Feel niyang type siya no'ng matanda," Humalakhak na saad ni Lorie at nakipag-apir pa sa katabing si Gabe.

Napakurap si Sylvia, noong una pa lang na nagpunta ang matandang business woman ay mukhang natipuhan agad ang boss niya. Kahit na nasa edad na 50's, ay mukhang magaling pa rin mamili ng jojowain.

Kaya naman si Troye ay todo iwas sa matanda. Dahil na sense siguro nito ang paghanga ng matanda sa kaniya.

"Napaka-arte naman niya! Bakit hindi na lang niya sakyan o kaya pagpasensiyahan? Pati tuloy opportunities para sa kumpanya, nadadamay!" galit na pahayag ni Sylvia.

"Don't worry, Miss Dimaculangan. if you are worried about investors, I've talked a lot. Huwag kang manghinayang sa isang matandang dalagang kagaya mo."

Pigil ang hiningang sabay-sabay silang napalingon sa binata na nakatayo at magka-krus ang braso sa dibdib.

"Sir, kanina pa ba kayo riyan?"