CHAPTER 1

Third Person POV

Sa isang madilim na kagubatan tanging huni ng Ibon, galaw ng mga tuyo't na halaman at iyak ng isang bata ang maririnig.

Patuloy itong umiiyak habang tinatawag ang kaniyang Ina, lingid sa kaalaman na may mababangis na hayop ang nagmamasid sa kanya.

Isang presensya ng hindi kilalang nilalang na may madilim na aura ang nagpatigil at nagpatakbo sa mga mababangis na hayop. Ang nilalang ay unti-unting lumapit sa batang tumigil na sa pag-iyak at napuno ng kuryosidad ang mga mata, habang sinusundan ng tingin ang nilalang.

Nang ito ay makalapit ay lumuhod ito upang mag pantay sila ng tingin ng maliit na bata, sila'y nagkatitigan at dumaloy ang kuryente na galing sa pulang mga mata ng lalaki patungo sa berdeng mala-ahas na mata ng bata.

Ang batang may inosenteng mukha ay biglang naglaho at napalitan ito ng matatalim na mga mata. Ang pang-ibabang katawan nito ay nagkatawang-ahas at agad na mahigpit na lumingkis sa tuhod ng lalaki. Pahigpit ito nang pahigpit hanggang sa isang kagat ng matatalim na pangil ng nilalang ang nagpatigil sa bata dahilan upang mawalan ito ng malay at bumagsak sa mga tuyong dahon.

Humahangos na nagising si Satana mula sa paulit-ulit na panaginip na iyon. Mula nang magkaisip ito ay palaging ganoon ang napanaginipan nito. Pero kahit paulit-ulit ay may kakaiba pa ring epekto sa kaniya ang panaginip. Minsan na niya itong nasabi sa kaniyang Ina ngunit ang sabi lang nito ay marahil dahil iyon sa pagkahilig niya sa mga Ahas.

Lumingon si Satana sa orasan na nasa kaniyang bed side table dahilan ng pagtama ng sikat ng araw sa kaniyang makinis at matabang pisnge. Nang makita niyang sakto ang oras ng kaniyang gising upang pumasok sa paaralan ay tumayo na ito upang maligo at magbihis.

Habang nagbibihis ay nasagi nito ang suot na kwintas. Ito ay bilog at sa loob ng bilog na iyon ay isang maliit na imahe ng ahas na mayroong pula at berdeng likido na patuloy na umiikot rito, ngunit hindi naghahalo. Ang natatanging bilin sa kaniya ng kaniyang Ina ay hindi niya maaring tanggalin ito, minsan na rin niyang nasubukang tanggalin ang kwintas ngunit matapos noon ay wala na siyang maalala sa nangyari.

Ipinasok niya ito sa loob ng suot na uniporme upang matakpan at pinagpatuloy ang pag-aayos ng sarili.

Matapos mag-ayos ay lumabas na ito mula sa kaniyang kwarto at pumunta sa breakfast nook, na matatagpuan malapit sa pool ng kanilang bahay.

"Good morning Mom, Dad, and Angel!" masayang bati ni Satana sa kaniyang pamilya na nasuklian naman ng mga ngiti.

"Good morning din, ate," ani Aien Jiel, Angel for short. Nakababatang kapatid ni Satana.

"Hindi ka papasok sa eskwela ngayon?" tanong ni Satana sa kaniyang kapatid nang mapansin na hindi ito naka-uniform.

"First day of school pa lang naman puro pakilala ang gagawin nila," bagot na sagot nito.

"Ang sabihin mo tinatamad ka lang," ani ng kanilang Ina na si Amelia kaya naman agad na malambing na ngumiti si Angel rito.

"Mommy sobrang talino naman na ni Ate para dumagdag pa ako. Dapat balanse ang buhay at saka iisa lang naman ang pupwedeng magmana ng kumpanya at kaya na ni Ate iyon, hindi ba Ate?"

"At ano naman balak mong gawin sa future mo?" tanong ni Satana.

"Gusto kong maging artista!" Napailing ang pamilya sa naging sagot nito.

Maganda, magiliw at talented si Angel, pwedeng-pwede ito na maging artista, ang kaso ay ayaw iyon ng kanilang Ama na si Julio. Kahit anong pupwedeng makadikit sa publicity ay iniiwasan nito.

Kaya nga tutol rin ito sa pagkakaibigan ng kaniyang anak na si Satana at Zayleen dahil sa pagkakaroon nito ng ama na isang kilalang senator. Sadyang wala nalang itong nagawa nang makitang tanging si Zayleen lang ang kinagaanan ng loob ng kaniyang anak.

Bagamat hindi alam ni Satana ang dahilan ng kaniyang Ama tungkol dito ay hinayaan niya nalang dahil mas gusto niya rin namang malayo sa publicity nang makita ang buhay ng kaibigan.

Mabilis na kumain si Satana nang maalala na kailangan pa nga pala niyang dumaan sa kuhaan ng PE Uniform.

"Slow down, Satana. Baka mabilaukan ka niyan." Natatawang saad ni Amelia sa kaniyang anak.

Agad na nilunok ni Satana ang nasa kaniyang bibig bago magsalita.

"Dadaanan ko pa po pala 'yong uniform ko kaya kailangan kong bilisan baka mahuli ako sa klase."

"Ate, 7 o'clock pa lang naman po 8am pa ang klase mo at 10 minutes lang ang arrival papunta sa school mo."

"Baka kasi may pila sa pagkuha ng Uniform," sagot ni Satana pagkalunok ng pagkaing nasa kaniyang bibig at saka uminom ng juice at nagpaalam na upang makaalis patungo sa eskwelahan.

Nang makalabas sa bahay ay nakaabang ang driver na para kay Satana na siyang maghahatid sa eskwelahan nito.

Pagkarating sa eskwela ay sakto na nahagip ng kaniyang mga mata ang kaibigan na si Zayleen na siyang umiinom ng Pineapple Zesto.

"Zayleen!" tawag ni Satana sa kaibigan pagkababa nito ng sasakyan. Napailing na lang ang driver nito sa ginawa ni Satana dahil tuwing nakikita ang kaibigan ay ganoon lagi ang inaakto nito.

"Zayleen Gabriel!" Sa pangalawang pagkakataong tawag ni Satana ng hindi siya lingonin ng kaibigan.

Parang nag-slow mo ang paglingon ni Zayleen na siyang pinagtinginan ng mga kapwa estudyante. Kung iisipin para itong bidang karakter sa isang storya sa sobrang ganda at bait nito.

"Satana!" Nakangiting tawag ni Zayleen kay Satana nang makita ang kaibigan. Tumakbo ito palapit kay Satana at saka umakla sa braso nito.

"Sabay na tayong pumunta sa kuhaan ng PE uniform?"

"Oo ba," masayang sagot ni Satana at saka sila nagtungo sa pagkukuhaan nila ng kanilang PE Uniform.

Nang makarating sa office ay wala namang nakapila kaya agad din nilang nakuha ang PE Uniform at saka dumiretso sa kanilang classroom.

The class went smoothly, katulad ng nakasanayan kapag first day ay purong pakikilala lang. Marami rin ang nakakilala kay Zayleen at Satana dahil sa pagiging Valedictorian at Salutatorian ng dalawa, bukod pa doon ay dahil sa latest release na magazine kung saan kasama ni Zayleen ang kaniyang Ama.

"Bye Satana!"

"Bye Zayleen bukas ulit!" masayang paalam ni Satana dito at pumasok na sa kotse.

"Kuya, nasa bahay na po sila Mommy and Daddy?" tanong nito sa driver.

"Opo ma'am."

Tumango si Satana dito at saka tumingin sa labas, pinagmamasdan ang nadadaanang tanawin. Naglalakihang bahay, punong kay taas, at tahimik na kalsada.

Satana's life is really good compared to other people. She have a loving family, doesn't have any financial problem, she don't have any health problem, she have a good sister and a bestfriend. Maganda rin ito at matalino, everything is perfect not until she heard what her father said that night.

Nang nakabalik ito sa kanilang bahay ay dali-dali itong pumunta sa opisina ni Julio upang bumati ngunit natigilan ito sa pagpasok nang makita nito ang kaniyang mga magulang na kasalukuyang nasa pormal na pag-uusap.

Aalis na sana ito upang bigyang respeto ang pag-uusap ng kaniyang mga magulang nang narinig nitong banggitin ang kaniyang pangalan. Bagamat alam ni Satana na mali ang makinig sa usapan ng matatanda ay ang inosenteng batang puno ng kuryosidad ay hindi pa rin maitatanggi sa kaniya.

"Julio, tingin mo ba kailangan pa nating tuparin ang kasunduan? Pupwede naman na tayong tumakas at ilayo si Satana mula sa taong iyon," ani Amelia habang nakaupo sa harap ng desk ni Julio at nakatingin dito.

"Ang kasunduan ay kasunduan, Amy," sagot ni Julio habang patuloy itong nagbabasa ng mga papeles na marahil ay para sa trabaho.

"Kasunduan pa rin ba kung anak mo na ang pinag-uusapan?"

'Kasunduan tungkol sa akin?' Tanong ni Satana sa kaniyang sarili

"Nangako tayo, Amy. Kaya mayroon tayong ganitong karangyang buhay at kung bakit nandiyan pa ang anak natin ay dahil iyon lahat kay Mr. Lamprouge, kaya ang kasunduan ay dapat na tuparin." Itinabi nito ang ang binabasa at tumingin sa Asawa.

"At paano ang anak natin? Hindi mo man lang ba naisip na masasaktan siya pag nalaman niya na sa murang edad ipinagkasundo natin siya sa lalaking doble o triple ang edad sa kaniya?!" Sumbat ni Amelia sa asawa.

Habang si Satana ay mas lalong naguluhan sa sinabi ng Ina.

"Bakit ikaw? Hindi mo man lang ba naisip ang maaaring mangyari sa iyong anak nang iniwan mo siyang mag-isa sa gubat noon?!" sigaw na pabalik ni Julio kay Amelia.

Iniwan?

Sa gubat?

Mga salitang umikot sa kaniyang isipan kasabay ng mga pamilyar na imahe mula sa kaniyang panaginip. Ngunit imposible!

Kalahating tao at kalahating ahas ang nasa panaginip niya!

"Iba ang noon sa ngayon, Julio!" Habang naglalakad papalapit sa asawa.

"Walang pinagkaiba, babalik at babalik siya sa ganoong katangian sa ika-dalawampu't tatlo ng kaniyang kaarawan kapag hindi natin siya ibibigay kay Zacharias!"

Dahil sa pagkatakot, galit, lungkot, at kaguluhan sa mga narinig mula sa kaniyang mga magulang ay ni nais ni Satana na tumakbo. Ngunit aksidente nitong nabangga ang vase na nasa gilid ng pintuan dahilan upang magdulot ng ingay at maagaw nito ang atensyon ng kaniyang mga magulang.

"Satana." Bakas ang gulat at takot sa mga matang tawag ni Amelia sa anak.

Gustohin man niyang walang maintindihan at maalala sa mga narinig ay nagdulot na ito ng matinding lamat.

11 years later

"Ziantynna!" galit na sigaw ni Julio habang marahas na katok ang ibinibigay sa pintuan ni Satana.

Pagod na iminulat ni Satana ang kaniyang mga mata nang marinig ang katok na iyon. It's been Eleven years since that day but still, she can remember everything clearly.

Bagot na bagot na tumayo at naglakad si Satana patungo sa pintuan ng kaniyang kwarto at pinagbuksan ito dahil pilitin niya mang makatulog ay hindi na siya makakatulog pa sa uri ng pagkatok nito.

Hindi maitago ni Satana ang kaniyang ngisi nang makita ang galit na galit na itsura ng kaniyang Ama na halos pumutok na ang ugat sa mukha sa sobrang galit. Habang si Amelia at Angel naman ay patuloy itong pinipigilan.

"Ano itong nabalitaan kong ginawa mo sa libing ng ama ni Madilynn Vidal? Ha?!" Lumapit ito at itinuro kay Satana ang hintuturo niya.

"Ibinuhos ko sa kaniya ang wine," diretsang sagot ni Satana rito dahilan upang diretsang sampal din ang iginawad nito sa anak.

Gulat ang lumukob sa buong pamilya dahil ito ang unang beses na pinagbuhatan ni Julio ng kamay ang Anak. Sa dami ng kalokohang ginawa nito mula nang marinig ang bagay na iyon.

"Julio, Tama na!" awat ni Amelia nang makita na sasampaling muli ni Julio ang anak.

"Kung para man sa namayapa mong kaibigan o para sa pagrerebelde mo sa amin ang ginawa mo. Mananatili pa rin ang kasunduan na ipapakasal ka! Bukas, sa ika-dalawampu't tatlong kaarawan mo ay dadalhin ka namin kay Mr. Lamprouge sa ayaw at sa gusto mo!" Gigil itong umalis kasama si Amelia na nais sanang aluin ang anak ngunit alam na hindi tatanggapin ng anak iyon.

"Ate," ani Angel at umiiyak na yumakap sa kapatid.

"Tutulungan kitang tumakas, Ate." Inilayo ni Satana ang katawan at ngumiti rito.

"Ako na ang bahala wag ka nang makielam. Ang dapat mong gawin ngayon ay mag-aral, malapit na ang finals niyo hindi ba?"

Kung gagawa man nang kalokohan si Satana ay sinisiguro pa rin nitong hindi madadawit ang kapatid sa gulong tinatahak niya. Dahil para rito si Angel na lang ang naging totoo sa kaniya.

Matapos rin ang araw nang matuklasan ni Satana ang bagay na iyon ay si Angel na ang pumalit sa dapat ay obligasyon ni Satana bilang panganay. Kaya naman alam niyang hirap na hirap na ito dahil marami sa pangarap nito ang naglaho kasama na ang maging artista.

"Paano ka?"

"Tingin mo ba mahina si ate?"

"Hindi, ikaw na ang pinakamalakas na babaeng nakilala ko." Pinunasan ni Angel ang sariling luha at ngumiti sa kapatid.

"Then trust me."

Tumango si Angel dito bilang pagsang-ayon at saka iniangat ang kamay para sana haplusin ang sampal ng kanilang Ama sa pisnge ng kaniyang ate ngunit iniiwas ni Satana ang kaniyang mukha at pinabalik na ang kapatid sa kwarto nito.

Ayaw pa sana ni Angel ngunit nang makita ang pagod sa mga mata ng kapatid ay nagpatianod na lang siya.

Pagkaalis ni Angel ay sinarado ni Satana ang pinto ng kaniyang kwarto at saka doon tumulo ang mga pinipigilan niyang luha.

Simula nang malaman niya ang kasunduan na iyon ay ginawa na niya ang lahat upang hindi siya magustuhan ng taong ipapakasal nila sa kaniya.

Bumaba ang grades, nag-cutting, uminom ng alak, natutong manigarilyo at iba pa. Ngunit sa kabila ng lahat ng iyon ay tama ang kaniyang Ama.

Ang kasunduan ay kasunduan.

At pagod na siyang umiwas pa sa problemang ito. Si Zayleen na siyang nag-iisa niyang kaibigan ay wala na rin sa tabi niya. Ang natatanging kaibigan na mapagkakatiwalaan at maiiyakan niya ay iniwan na siya sa madilim na mundong ito.