13 Julie

ILANG LINGGO NA ako sa bagong pinagtatrabahuan ko bilang part ng production staff pa rin na trainee na para maging parte ng creative team. Ilang linggo na ring may nangyayari sa amin ni Roma. Gabi-gabi rin kasi siyang umuuwi sa tiny house ko.

Katunayan ay kasalukuyan kong tinutulungan ang mga kasamahan ko sa paghahanda ng set para sa exclusive interview na pinangako niya sa network na ‘to. Nando'n na tayo sa maganda iyong makukuha ka sa trabaho mo dahil sa talento, passion, at tiyaga, pero iba rin kasi talaga kapag may backer ka o kapit. Sa kaso ko naman ay si Roma iyon.

Inaayusan ng mga dala niyang make-up at wardrobe artist si Roma. He was dressed humbly today. Naka-puting jabot blouse siya na nakatuck-in sa itim niyang slacks tapos black Chelsea boots at golden chain ear cuffs. May suot din siyang dark blue contact lens. Iyong buhok niya naman naka-brush back pa rin kagaya nang tipikal na estilo nito.