Loveless Home: The Billionaire Stole Her Heart From Her Jerk

Kahit ang poste kapag sinuotan ng palda kapag ang lalaki kinati papatulan niya, paano pa kaya sa totoong babae? Iyon ang unang pumasok sa isip ni Solene matapos niyang matanggap ang video na isenend ng isang hindi niya kilalang tao. Paulit-ulit niyang pinanood ang video kahit ang kapalit nito ay ang pagkabasag ng kanyang puso.

Makikita sa video kung saan may isang babaeng kumakatok sa pintuan ng hotel suite ni Brent bandang alas-onse ng gabi. Nang bumukas ang p***o, si Brent mismo ang sumalubong dito at nakasuot lamang ng bathrobe.

Pagkapasok ng babae, hindi na muling bumukas ang p***o sa loob ng tatlong oras. Napatingin si Solene sa oras na nakalagay sa video, kahapon iyon at iyon ang ikatlong araw ni Brent sa business trip nito.

Baka nalungkot lang ito habang malayo sa kanya, baka hindi nito napigilan ang sarili at humanap ng paraan para maibsan ang pangangailangan nito. Kung ganun nga ang dahilan nito, pagtataksil pa rin ba iyon?

Sa pagkakaalam ni Solene, hindi naman problema sa kanilang pamilya ang ganitong bagay. Minsan pa nga, ganoon ang pananaw ng kanyang ina tungkol sa mga lalaki pero kahit anong pilit niyang kumbinsihin ang sarili, may kung anong bumabara sa dibdib niya dahil asawa niya si Brent.

Pinatay niya ang screen ng cellphone at tumingin sa cake na nasa harap niya, halos matunaw na ang icing nito. Hindi mahilig si Brent sa mga ganitong bagay at hindi nito binibigyang halaga ang mga birthday o anumang selebrasyon gayun paman ngayong birthday nito ay nag-effort siya kaso dahil sa tagal niyang naghihintay, unti-unti nang natutunaw ang cake pero wala sa isip ni Solene ang cake kundi ang video na paulit-ulit bumabalik sa isip niya.

Hindi na niya napansin ang pagpasok ng kotse ni Brent sa bakuran nila at makalipas lang ng ilang segundo, narinig niya ang pamilyar na yabag ng isang lalaki.

Napatingin si Solene sa may pintuan at mula sa madilim na hallway ay lumitaw si Brent.

Matangkad ito, maayos ang tindig at may malapad na balikat, matangos ang ilong, manipis na labi, at mga matang laging malamig kahit wala naman itong sinasabi. Sa loob ng dalawang taon nilang pagsasama, araw-araw niya itong nakikita pero sa tuwing kaharap niya si Brent, hindi pa rin niya maiwasang mapahanga sa mga katangian nito.

Kaya nang una niya itong makilala at malaman na si Brent pala ang lalaking ipinangako sa kanya mula pa noong bata sila, hindi na nakapagtatakang nahulog agad ang loob niya rito at agad siyang pumayag na magpakasal dito nang palihim. Isinantabi niya ang sarili niyang mga pangarap at tinanggap ang buhay bilang asawa nito, isang asawang hindi maaaring makita ng publiko.

Araw-araw, umikot ang mundo niya kay Brent, ginawa niya ang lahat para maging mabuting asawa, gaya ng itinuro sa kanya ng kanyang ina. Pero isang tanong ang matagal nang hindi niya masagot, mahal ba talaga siya ni Brent?

Naalala ni Solene ang nangyari dalawang taon na ang nakalipas, nalugi ang negosyo ng kanilang pamilya at halos bumagsak ang lahat ng kanilang ari-arian. Sa kagustuhang makahanap ng pera, pinilit siyang ipakasal ng kanyang ama sa isang matandang lalaki. Hindi niya alam kung paano siya makakatakas noon hanggang sa si Brent ang lumapit, sinabi nitong handa siyang tuparin ang kasunduang kasal na matagal nang ginawa ng dalawang pamilya. Dahil sa kanya, hindi napilitan si Solene na pakasalan ang isang lalaking hindi niya kilala.

Napabuntong-hininga si Solene, baka mali lang talaga ang iniisip niya. Hindi niya pa alam ang buong kuwento at ngayon ang birthday ni Brent, bukas na lang niya aalamin ang totoo.

Tumayo siya at lumapit dito. “Hindi ba sabi mo ay alas-sais ka uuwi?”

Kinuha ni Solene ang itim na suit na hinubad ni Brent, pagkakahawak niya rito, agad niyang naamoy ang matapang na pabango dahilan para matigilan siya at dahan-dahang napatingin kay Brent.

“Maraming trabaho.” Maikling sagot nito ni hindi man lang nag-abalang magpaliwanag.

Saglit na napunta ang tingin ni Brent sa cake na nasa mesa. Bahagyang kumunot ang noo nito bago inalis ang sariling necktie.

“Gawan mo ako ng sabaw para sa hangover.” sabi nito sa malamig na boses.

Doon niya napansin ang amoy ng alak na humahalo sa pabango nito, tumango si Solene kahit na may kung anong kumirot sa dibdib niya.

“Sige.” Agad siyang pumunta sa kusina para gawin ang utos nito. “Maligo ka muna, nakahanda na rin ang mainit na tubig.”

Wala siyang narinig na sagot at paglingon niya, nakita niyang paakyat na si Brent sa hagdan. Hindi man lang ito tumingin sa kanya, sanay na siya sa ganitong trato nito nung una ay masakit pero habang lumilipas ang panahon, natutunan na lang niyang masanay.

Nanahimik na lang siya dahil bukas, malalaman niya kung ano talaga ang nangyari sa hotel at kung totoo man ang hinala niya ay kailangan na niyang harapin ang isang bagay na matagal niyang ayaw isipin. Ang posibilidad na hindi sapat ang pagmamahal niya para maging tapat sa kanya si Brent.