Chapter 52

ALAS OTSO na ng gabi nang makauwi ako galing sa shop. Matagal kaming nagsarado dahil hindi man lang maubos-ubos ang mga costumers, sobrang saya ko nga dahil sa pangyayaring iyon.

Halos nakapikit na ako habang pinupunasan ang buhok ko matapos kong maligo. Hindi naman tumatalab ang malamig na tubig sa katawan ko, dahil inaantok pa rin ako.

Tila nakikisabay sa akin ang araw na ito dahil pakiramdam ko ay ito na ang pinakamaswerteng araw sa buong buhay ko.

Naglakad ako patungo sa labas ng kwarto at dumiretso sa balkonahe upang magpahangin saglit. Nasa pang-apat na palapag ako ng aking tinutuluyang kondominyum kaya maganda ang tanawin sa tuwing gabi, medyo malayo ang kondo na ito sa kalsada at malapit sa karagatan kaya ganoon nalang ang mararamdaman mong lamig ng hangin.